ក្រុមហ៊ុនប្រេងសិង្ហបុរីធំមួយបោះទុន ១០លានដុល្លារ សង់ស្ថានីយស្តុកប្រេងនៅទីម័រខាងកើត

យោងតាមសារព័ត៌មាន Business Times បានរាយការណ៍ថា គម្រោងសាងសង់ស្ថានីយស្តុកប្រេងនៅក្នុងប្រទេសទីម័រខាងកើតនេះ គ្រោងនឹងបញ្ចប់ការសាងសង់ក្នុងរយៈពេល ១០ខែខាងមុខ ដោយស្ថានីយនេះនឹងមានស៊ីទែនស្តុកប្រេងមានដំបូលបណ្តែតទឹកចំនួន២ ដែលអាចស្តុកប្រេងម៉ាស៊ូតបានចំនួន ៣,៥លានលីត្រ និងប្រេងសាំងចំនួន ២,៥លានលីត្រ។ លើសពីនេះ ក្រុមហ៊ុននេះក៏មានផែនការពង្រីកសមត្ថភាពស្តុកប្រេងបន្ថែមទៀតនៅឆ្នាំ២០៣០ផងដែរ។
ស្ថានីយស្តុកប្រេងតម្លៃ ១០លានដុល្លារនេះ ស្ថិតនៅលើផ្ទៃដីទំហំ ២ហិកតា ដែលធំស្មើនឹងទីលានបាល់ទាត់ ៣បញ្ចូលគ្នា នៅក្នុងទីក្រុង លីគីសា (Liquica) ដែលជាតំបន់ឆ្នេរសមុទ្រភាគខាងជើងនៃប្រទេសដីកោះមួយនេះ។
ប្រេងឥន្ធនៈ ដែលរក្សាទុកនៅទីនោះ នឹងត្រូវបានប្រើប្រាស់ដើម្បីផ្គត់ផ្គង់ដល់អាជីវកម្មលក់រាយ និងលក់ដុំរបស់ក្រុមហ៊ុននៅទូទាំងប្រទេសទីម័រខាងកើតនេះ ដោយបច្ចុប្បន្នក្រុមហ៊ុននេះ គឺជាម្ចាស់កម្មសិទ្ធិ និងកំពុងដំណើរការស្ថានីយប្រេងឥន្ធនៈចំនួន ៩កន្លែងនៅទូទាំងប្រទេសទីម័រខាងកើត ព្រមទាំងកំពុងផ្គត់ផ្គង់ប្រេងដល់គម្រោងសាងសង់ធំៗ និងនាវារបស់កងទ័ពជើងទឹកផ្សេងៗ ដែលចូលមកចតនៅកំពង់ផែរបស់ប្រទេសនេះផងដែរ។
លោក ជូលៀន ជៀង (Julian Chiang) នាយកក្រុមហ៊ុន Global Group បានប្រាប់សារព័ត៌មាន The Business Times ថា ការសាងសង់ស្ថានីយប្រេងផ្ទាល់ខ្លួននេះ នឹងជួយជំរុញឱ្យសាខារបស់ក្រុមហ៊ុនប្រចាំនៅទីម័រខាងកើតនេះ មានភាពរឹងមាំក្នុងប្រតិបត្តិការកាន់តែខ្លាំងឡើង និងអាចគ្រប់គ្រងស្តុកប្រេងរបស់ខ្លួនបានកាន់តែប្រសើរឡើងផងដែរ។
លោក ជៀង បានថ្លែងថា យើងកំពុងស្ថិតក្នុងដំណាក់កាលមួយ ដែលប្រទេសទីម័រខាងកើតនេះបានត្រៀមខ្លួនរួចហើយ សម្រាប់សម្ទុះនៃកំណើនសេដ្ឋកិច្ចដ៏ធំមួយ ដោយលោកបានលើកឡើងពីកត្តាជំរុញនានា ដូចជាការចូលជាសមាជិកអាស៊ានកាលពីពេលថ្មីៗរបស់ប្រទេសនេះ បំណងក្នុងការធ្វើជាប្រធានប្ដូរវេននៅឆ្នាំ២០២៩ ផែនការអភិវឌ្ឍន៍ជាតិ និងការកើនឡើងនៃចំណាប់អារម្មណ៍របស់វិនិយោគិនបរទេសមកលើប្រទេសនេះ។

អត្ថបទៈ សួន ឡង់ទី