លោក រេហ្សាល ខាអ៊ីរី អាម៉ាដ (Rezal Khairi Ahmad) នាយកប្រតិបត្តិក្រុមហ៊ុន NanoMalaysia បានថ្លែងនៅក្នុងបទសម្ភាសជាមួយសារព័ត៌មានជប៉ុន Nikkei Asia ថា "ក្រុមហ៊ុនកំពុងត្រៀមបើកដំណើរការរោងចក្រផលិតអាគុយរថយន្ត EV ក្នុងស្រុកដំបូងបង្អស់របស់ប្រទេសម៉ាឡេស៊ី"។ លោកបានបន្តថា គម្រោងនេះ ប្រហែលជាគម្រោងដំបូងគេបង្អស់នៅក្នុងតំបន់អាស៊ាន ព្រោះនៅមិនទាន់មានក្រុមហ៊ុនក្នុងស្រុកនៃប្រទេសណាមួយក្នុងតំបន់នេះ កំពុងផលិតបច្ចេកវិទ្យាអាគុយរបស់ខ្លួនក្នុងស្រុកនៅឡើយទេ។
គួរបញ្ជាក់ផងដែរថា សម្រាប់រថយន្តអគ្គិសនី គ្រាន់តែអាគុយ ១មុខប៉ុណ្ណោះ គឺមានតម្លៃដល់ទៅ ៤០% នៃតម្លៃទាំងមូលរបស់រថយន្តអគ្គិសនីទៅហើយ។ នេះបើយោងតាមទីភ្នាក់ងារថាមពលអន្តរជាតិ ដែលបានឱ្យដឹងទៀតថា អាគុយរថយន្តអគ្គិសនី ភាគច្រើនត្រូវបានផលិតចេញពីរ៉ែកម្រ លីចូម-អ៊ីយ៉ុង ដោយក្នុងឆ្នាំ២០២៥ ប្រទេសចិនបានក្ដោបក្ដាប់ការផលិតអាគុយប្រភេទនេះ រហូតដល់ទៅជាង ៨០% ក្នុងពិភពលោក។
ទោះយ៉ាងណាក៏ដោយ លោក Rezal Khairi បានអះអាងថា សម្រាប់អាគុយរបស់ក្រុមហ៊ុន Gigafactory Malaysia នឹងផលិតដោយរូបមន្តគីមី នីកែល-ម៉ង់ហ្គាណែស-កូបាល់ (Nickel-Manganese-Cobalt) ដែលបង្កើនសមត្ថភាពបន្ថែមដោយសារធាតុ ក្រាហ្វីន ធ្វើឱ្យវាអាចផ្ទុកថាមពលបានខ្លាំងរហូតដល់ទៅ ៣ដង ហើយសម្រាប់ផលិតកម្ម រំពឹងថា នឹងចាប់ផ្តើមដំណើរការយ៉ាងឆាប់បំផុតនៅក្នុងខែកញ្ញាខាងមុខនេះឯង។
នៅក្នុងតំបន់អាស៊ាន ក្រៅពីប្រទេសម៉ាឡេស៊ីហើយ នៅមានប្រទេសចំនួន ៣ទៀត កំពុងប្រជែងគ្នាក្លាយជាមជ្ឈមណ្ឌលផលិតអាគុយ និងរថយន្ត EV នេះផងដែរ ក្នុងនោះប្រទេសឥណ្ឌូនេស៊ី មានមហិច្ឆតាខ្ពស់ជាងគេក្នុងអាស៊ាន ដោយសារខ្លួនមានទុនបម្រុងរ៉ែ Nickel ដែលជាវត្ថុធាតុដើមដ៏សំខាន់បំផុតក្នុងការផលិតអាគុយ EV ធំជាងគេលើពិភពលោក ដោយឥណ្ឌូនេស៊ីបានចាប់ដៃគូជាមួយក្រុមហ៊ុនយក្សៗ ដូចជា CATL របស់ចិន និង LG Energy Solution របស់កូរ៉េខាងត្បូង ក្នុងការសាងសង់រោងចក្រផលិតអាគុយរថយន្ត EV ធំៗជាច្រើន។
ចំណែកប្រទេសថៃ តាមរយៈគោលនយោបាយជំរុញការផលិតរថយន្តគ្មានការបំភាយជាតិកាបូននៅឆ្នាំ២០៣០ ថៃប្រឹងប្រែងទាក់ទាញក្រុមហ៊ុនចិន និងជប៉ុនជាច្រើនឱ្យមកវិនិយោគសង់រោងចក្រដំឡើងរថយន្ត និងអាគុយ EV នៅក្នុងប្រទេសខ្លួន។
ឯដោយឡែក ក្រុមហ៊ុន VinFast ដែលជាក្រុមហ៊ុនផលិតរថយន្តក្នុងស្រុករបស់វៀតណាមវិញ ក៏កំពុងជំរុញការវិនិយោគយ៉ាងខ្លាំងលើការផលិតអាគុយរថយន្ត EV ផ្ទាល់ខ្លួន តាមរយៈការសាងសង់រោងចក្រផលិតកោសិកាអាគុយ ឬ Battery Cell នៅក្នុងស្រុក ដើម្បីផ្គត់ផ្គង់តម្រូវការរថយន្ត EV របស់ខ្លួន និងសម្រាប់នាំចេញផងដែរ៕
អត្ថបទៈ សួន ឡង់ទី
