លោកបណ្ឌិត ផុន ណារិន នាយកវិទ្យាស្ថានពាណិជ្ជសាស្ត្រអេស៊ីលីដា បានឲ្យដឹងទៀតថា ដោយមើលឃើញពីតម្រូវការធនធានមនុស្សផ្នែកគណនេយ្យ និងហិរញ្ញវត្ថុនេះ វិទ្យាស្ថាន ពាណិជ្ជសាស្ត្រអេស៊ីលីដា គ្រោងនឹងបើកទទួលសិស្សឲ្យចូលរៀន លើកដំបូងនៅខែ វិច្ឆិកាខាងមុខនេះ។
មានផ្ទៃដីជាង ៧ម៉ឺន ៥ពាន់ម៉ែត្រការ៉េ វិទ្យាស្ថានពាណិជ្ជសាស្ត្រអេស៊ីលីដានេះ នឹងអាចទទួលនិស្សិតចូលរៀន ពី៦ ទៅ៧ពាន់នាក់ក្នុងមួយឆ្នាំ។
បើតាមការគូសបញ្ជាក់ពី នាយកវិទ្យាស្ថានពាណិជ្ជសាស្ត្រអេស៊ីលីដា ដដែលនេះ បានឲ្យដឹងថា វិទ្យាស្ថាននេះ បានចាប់ផ្ដើមសាងសង់តាំងពីដើម ឆ្នាំ២០១៦ ដោយប្រើប្រាស់ក្រុមហ៊ុនជាង១០ ទាំងក្នុងស្រុក និងបរទេសដើម្បីសាងសង់ឡើង។
អត្ថបទគួរអាន!
ស្របពេលដែលមានការបណ្ដុះបណ្ដាលធនធានមនុស្សទាក់ទងនឹងជំនាញធនាគារ និងហិរញ្ញកាន់តែច្រើនឡើង វិស័យធនាគារ និងហិរញ្ញវត្ថុនាពេលបច្ចុប្បន្នត្រូវបានអ្នកជំនាញ អះអាងថា កំពុងវិវត្តទៅរកប្រតិបត្តិការបែបឌីជីថល កាន់តែច្រើនឡើង ពោលគឺ រាល់ប្រតិបត្តិការនានា របស់អ្នកប្រើប្រាស់ គឺនឹងធ្វើជាមួយនឹងម៉ាស៊ីន ច្រើនជាងមកការិយាល័យ ឬស្នាក់ការ ធនាគារ ឬមីក្រូហិរញ្ញវត្ថុដោយផ្ទាល់ ដើម្បីប្រើប្រាស់សេវាកម្មជាមួយបុគ្គលិក។ ក្នុងន័យនេះ អាចនិយាយបានថា កម្លាំងពលកម្មក្នុងវិស័យនេះ អាចនឹងមានកំណើនថមថយចុះ ដោយសារតែការនិយមប្រើបច្ចេកវិទ្យា។
ទោះយ៉ាងណា លោកបណ្ឌិត ផុន ណារិន នាយកវិទ្យាស្ថានពាណិជ្ជសាស្ត្រអេស៊ីលីដា បានះអាងថា ធនធានមនុស្សផ្នែកធនាគារ ឬគណនេយ្យហិរញ្ញវត្ថុ នៅតែមានតម្រូវការលើទីផ្សារ បើទោះបីជាវិស័យធនាគារ និងហិរញ្ញវត្ថុបច្ចុប្បន្ន បាននិងកំពុងវិវត្តរត់ទៅរកប្រតិបត្តិការតាមបែបឌីជីថលក៏ដោយ ព្រោះថា បច្ចុប្បន្នកំណើនអាជីវកម្ម និងក្រុមហ៊ុនមានកាន់តែច្រើនឡើង ដូច្នេះ ធនធានមនុស្សដែលមានជំនាញទាក់ទងនឹងការរៀបចំបញ្ជីស្នាម គណនេយ្យ និងហិរញ្ញវត្ថុ គឺមិនអាចខ្វះបានឡើយ ខណៈដែលការប្រើប្រាស់បច្ចេកវិទ្យាហិរញ្ញវត្ថុ ក៏នៅតែទាមទារឲ្យមានមនុស្សជំនាញ ដើម្បីគ្រប់គ្រងដូចគ្នាដែរ។
អត្ថបទគួរឲ្យចាប់អារម្មណ៍!
នាយកវិទ្យាស្ថាន ពាណិជ្ជសាស្រ្ត អេស៊ីលីដា រូបនេះ បានបន្ថែមទៀតថា ទោះបីជាវិស័យធនាគារ និងហិរញ្ញវត្ថុនៅកម្ពុជា បាននិងកំពុងវិវត្តខ្លួន ទៅរកធនាគារឌីជីថល ដែលមានប្រតិបត្តិការច្រើន នៅលើបច្ចេកវិទ្យាក៏ពិតមែន ប៉ុន្ដែ មិនមែនមានន័យថា អ្នកដែលរៀនផ្នែកធនាគារ ឬគណនេយ្យហិរញ្ញវត្ថុ លំបាករកការងារធ្វើនោះទេ ព្រោះការងារទាក់ទងនឹងផ្នែកគណនេយ្យ និងហិរញ្ញវត្ថុនេះ មានច្រើនណាស់ នៅតាមអាជីវកម្ម ឬក្រុមហ៊ុននានា ដែលកំពុងកកើតឡើងថ្មីៗជារៀងរាល់ថ្ងៃ មិនមែនមានតែនៅធនាគារ ឬមីក្រូហិរញ្ញវត្ថុនោះទេ។
លោក បញ្ជាក់ថា អ្នករៀនជំនាញគណនេយ្យ ឬធនាគារ មិនមែនត្រូវតែធ្វើការឲ្យធនាគារ ឬមីក្រូហិរញ្ញវត្ថុនោះទេ ពោលគឺពួកគេអាចស្វែងរកឱកាសការងារបានទូលំទូលាយ ទាក់ទងនឹងជំនាញនេះ ដូចជាអាចធ្វើជា អ្នកគិតលុយតាមហាងធំៗ អ្នករៀបចំបញ្ចីស្នាមហិរញ្ញវត្ថុ និងវិភាគរបាយការណ៍ហិរញ្ញវត្ថុជាដើម។ល។
គួររំលេចដែរថា បើតាមការអង្កេតផ្ទាល់របស់ខេមបូណូមីស លើគេហទំព័រធំៗមួយចំនួន ដែលបានផ្សព្វផ្សាយពីឱកាសការងារនៅកម្ពុជា នាពេលបច្ចុប្បន្ន ឃើញថា ឱកាសការងារទាក់ទងនឹងជំនាញ គណនេយ្យ ធនាគារ និងហិរញ្ញវត្ថុ គឺឈរក្នុងលំដាប់ខ្ពស់ជាងគេ ធៀបនឹងឱកាសការងារក្នុងជំនាញផ្សេងៗទៀត។
សូមជម្រាបថា បើតាមអ្នកជំនាញហិរញ្ញវត្ថុធ្លាប់បានលើកឡើងថា វិស័យធនាគារ និងហិរញ្ញវត្ថុ កំពុងដើរទៅរកប្រតិបត្តិការតាមបែបឌីជីថលកាន់តែខ្លាំងឡើងៗ ខណៈដែលប៉ុន្មានឆ្នាំខាងមុខទៀតនេះ ធនាគារឌីជីថលនឹងមានចំនួនកាន់តែច្រើនផងដែរ ក្នុងន័យនេះ គឺការទូទាត់ និងប្រតិបត្តិការនានាក្នុងវិស័យធនាគារ និងហិរញ្ញវត្ថុ នឹងត្រូវធ្វើឡើងតាមបច្ចេកវិទ្យាកាន់តែច្រើនឡើង៕
None
