នាយិកាធនាគារអភិវឌ្ឍន៍អាស៊ី ប្រចាំនៅកម្ពុជា អ្នកស្រី Sunniya Durrani Jamal មានប្រសាសន៍ថា កត្តាសំខាន់មួយ ដែលអាចនាំឱ្យសេដ្ឋកិច្ចកម្ពុជាមានកំណើនក្នុងរយៈពេលវែងនោះ គឺការអភិវឌ្ឍធនធានមនុស្ស។ ធនធាន ដែលរួមបញ្ជូលទាំងជំនាញបច្ចេកទេស និងជំនាញវិជ្ជាជីវៈ ដែលឆ្លើយតបនឹងតម្រូវការទីផ្សាររបស់វិស័យឯកជន។ អ្នកស្រីបន្តថា កម្ពុជាសម្បូរកម្លាំងពលកម្ម ដែលមានប្រាក់ឈ្នួលទាបធ្វើការដោយកម្លាំង ខណៈដែលអ្នកបច្ចេកទេសជំនាញមិនទាន់មានគ្រប់គ្រាន់។
អ្នកស្រី Sunniya បញ្ជាក់ថា « កម្ពុជា ជាប្រទេសទី៣ ក្នុងអាស៊ានបើគេរាប់ពីក្រោមឡើងលើ (ក្នុងសន្ទស្សន៍ធនធានមនុស្ស) ដូច្នេះកម្ពុជាចាំបាច់ត្រូវពង្រឹងការអនុវត្តន៍គោលនយោបាយអភិវឌ្ឍន៍ធនធានមនុស្សបន្ថែមទៀត។ កម្ពុជា ត្រូវការគ្រូបង្រៀនជាច្រើននាក់ ដែលមានសមត្ថភាពខ្ពស់ និងត្រូវការការគាំទ្រផ្នែកហិរញ្ញវត្ថុចំពោះសិស្សក្រីក្រដែលរៀនពូកែ និងរៀនជំនាញដែលស្របតាមយុគសម័យឌីជីថលនេះ។ រាជរដ្ឋាភិបាល ត្រូវធ្វើឱ្យជាក់ស្ដែងឱ្យច្បាស់លាស់ទើបបានផលពិតប្រាកដ»។
អត្ថបទទាក់ទង!
ទាក់ទងនឹងការអភិវឌ្ឍកម្លាំងពលកម្មជំនាញនេះ រាជរដ្ឋាភិបាលកម្ពុជា បានដាក់ចេញនូវគោលនយោបាយជាតិមួយស្ដីពីការអប់រំបណ្តុះបណ្តាលបច្ចេកទេស និង វិជ្ជាជីវៈ ២០១៧ ដល់២០២៥ ។
តាមរយៈគោលនយោបាយនេះ ប្រមុខរាជរដ្ឋាភិបាលសម្តេច ហ៊ុន សែន កត់សម្គាល់ថា ការកសាងកម្លាំងពលកម្មជំនាញ ឱ្យមានសមត្ថភាព និងមានលទ្ធភាពប្រើប្រាស់បច្ចេកវិទ្យាខ្ពស់ គឺជាកតព្វកិច្ចសំខាន់របស់រាជរដ្ឋាភិបាលកម្ពុជាក្នុងការឈានទៅសម្រេចបាននូវកំណើនសេដ្ឋកិច្ច និងស្ថិរភាពសង្គមកម្ពុជា។
គោលនយោបាយជាតិស្ដីពីការអប់រំបណ្តុះបណ្តាលបច្ចេកទេសនិង វិជ្ជាជីវៈ ២០១៧ ដល់២០២៥ បង្ហាញថា យ៉ាងហោចណាស់មានបញ្ហាប្រឈមចំនួន ៨ធំៗដែលធ្វើជាឆ្អឹងទទឹងក ចំពោះការអភិវឌ្ឍន៍កម្លាំងកម្មករជំនាញ។ បញ្ហាទាំងនោះរួមមាន៖
គុណភាពអប់រំនៅសាលាមិនឆ្លើយតបនឹងទីផ្សារការងារ (បង្រៀនយកតែលុយ ឬយកតែសញ្ញាបត្រ ) ការមើលស្រាលជំនាញបច្ចេកទេស(ស្ថានភាពសង្គមទូទៅ) កង្វះថវិកាសម្រាប់វគ្គបណ្តុះបណ្ដាលធនធានបច្ចេកទេស ពុំមានការទទួលស្គាល់ទូលំទូលាយ (សូម្បីក្នុងចំណោមស្ថាប័នរដ្ឋ) កង្វះជំនាញមូលដ្ឋាន ឬជំនាញទន់ (ស្តាប់អានសរសេរសន្ទនា) ការចូលរួមរបស់ភាគីពាក់ព័ន្ធនៅមានកម្រិតទាបកង្វះធនធានសម្ភារ (សម្រាប់ពិសោធន៍នានា) អន្តរក្រសួងពាក់ព័ន្ធមិនសូវស៊ីខ្សែគ្នា(ធ្វើការមិនសូវចុះសម្រុង)៕
None
