ថៃទម្លាក់ការព្យាករកំណើនសេដ្ឋកិច្ចពី ៤,៥%មកត្រឹម ២,៨%ក្នុងឆ្នាំ២០២១

ប្រទេសក្បែរខាងកម្ពុជាមួយនេះ ត្រូវបានធនាគារ​កណ្តាលរបស់​ខ្លួន ព្រមទាំងស្ថាប័ន​រូបិយវត្ថុអន្តរជាតិ​នា​នា​សុទ្ធតែ​បានព្យាករពីការធ្លាក់ចុះនៃ GDP ក្នុងស្រុកសរុបរួមទាំង ទំហំសេដ្ឋកិច្ចជារួម។

រដ្ឋាភិបាលថៃចាប់ពីពាក់កណ្តាលខែធ្នូ២០២០មក បានទម្លាក់កញ្ចប់ថវិកាជំនួយចំនួន ២១០ ពាន់លានបាតបន្ថែមឬស្មើ​នឹង​ជាង​៧ពាន់លានដុល្លារអាមេរិក ដើម្បីទប់ទល់នឹងរលកឆ្លងកូវីដ១៩ដែលបាននឹងកំពុងរាលដាលខ្លាំងដោយមានអ្នកឆ្លងកើន​ឡើងសរុប​ដល់ទៅជាង​១ម៉ឺន៦ពាន់នាក់ហើយ គិតមកទល់ពេលនេះ។

ថៃក៏ជាប្រទេសមួយដែលរំពឹងលើចំណូលពីវិស័យទេចរណ៍ខ្លាំងណាស់ដែរ ដោយ​កាលពី​ឆ្នាំ២០១៩​កន្លងទៅ ថៃទាក់ទាញភ្ញៀវទេសចរបានចំនួនជាង ៤០លាននាក់ឯណោះ ខណៈ២០២០ ភ្ញៀវទេសចរដែលមកទស្សនា​នៅថៃបានដាំក្បាលចុះខ្លាំងមកនៅត្រឹម ៦លាននាក់ប៉ុណ្ណោះ។ ក្រសូងទេសចរណ៍ថៃក៏ប៉ាន់ប្រមាណដែរថា ឆ្នាំ២០២១អាចនឹងធ្លាក់ចុះ​បន្ថែមទៀតមកត្រឹម ៥លាននាក់។ 

កត្តានេះបានបណ្តាលឲ្យថៃបាត់បង់ចំណូលមួយភាគធំ ហើយថៃក៏នឹងត្រូវបង្កើន​ការចំណាយបន្ថែមទៀតក្នុងថវិកាជាតិឆ្នាំនេះ ក្នុងរង្វង់ជាង១៣៣ពាន់លានដុល្លារអាមេរិក។

សូមជម្រាបជូនថា នៅខែកុម្ភៈខាងមុខនេះ ប្រទេសថៃ នឹងលក់បណ្ណសន្សំរដ្ឋាភិបាល​ប្រមាណ ២ពាន់លានដុល្លារ ដើម្បីជួយដល់វិធានការជំរុញសេដ្ឋកិច្ច សំដៅដល់កាត់បន្ថយផលប៉ះពាល់ ដែល​បណ្ដាលមក​ពីការផ្ទុះ​រាល​ដាល​មេរោគកូវីដ-១៩៕