នៅក្នុងសប្តាហ៍នេះ ក្រុមហ៊ុន Kirin បានប្រកាសថាខ្លួននឹងដកខ្លួនចេញពីការបណ្តាក់ទុនជាមួយក្រុមហ៊ុនប្រទេសមីយ៉ាន់ម៉ា និង ចិន ក្រោមហេតុផលថា ទីផ្សាដែលធ្លាប់មានភាពរីកចម្រើនខ្លាំងទាំងពីរនេះ ពិសេសប្រទេសមីយ៉ាន់ម៉ា កំពុងមានភាពរអាក់រអួល ដោយសារអស្ថិរភាពនយោបាយ។ តាមការប្រកាសចុងក្រោយនេះ ក្រុមហ៊ុន Kirin នឹងលក់ភាគហ៊ុនរបស់ខ្លួនចេញពីក្រុមហ៊ុន China Resources Kirin Beverages ដោយដំណើការលក់ភាគហ៊ុននេះ មានតម្លៃជិត១ពាន់លានដុល្លារ។
អាជីវកម្មស្រាបៀរនៅក្នុងប្រទេសមីយ៉ាន់ម៉ា គឺជា ភេទអាជីវកម្ម ដែលមានសក្តានុពលខ្លាំង ដោយកាលពីឆ្នាំ ២០១៥ ក្រុមហ៊ុន Kirin បានទិញភាគហ៊ុនក្រុមហ៊ុនស្រាបៀមីយ៉ាន់ម៉ា គឺក្រុមហ៊ុន Myanmar Brewery និង ជាដៃគូបណ្តាក់ទុនរួមគ្នាគឺក្រុមហ៊ុន Myanma Economic Holdings ដែលជាក្រុមហ៊ុនមានជាប់ទាក់ទងនឹងយោធាមីយ៉ាន់ម៉ា។ ប៉ុន្ដែ ដោយសារតែ វិបត្តិនយោបាយនៅមីយ៉ាន់ម៉ា បានកើនឡើងនៅក្រោយការធ្វើរដ្ឋប្រហារបាន បង្ខំឲ្យក្រុមហ៊ុននេះ ត្រូវដកខ្លួនចេញពីការវិនិយោគនៅមីយ៉ាន់ម៉ា ពិសេសដកខ្លួនចេញពីក្រុមហ៊ុន ដែលស្ថិតក្រោមរបបយោធាមីយ៉ាន់ម៉ាតែម្ដង។
អត្ថបទគួរអាន
ក្រុមហ៊ុន Kirin អះអាងថា ខ្លួននឹងបញ្ចប់ភាពជាដៃគូបណ្តាក់ទុនជាមួយក្រុមហ៊ុននៅប្រទេសមីយ៉ាន់ម៉ា នៅត្រឹមខែមិថុនាខាងមុខនេះ។ ហើយបច្ចុប្បន្នក្រុមហ៊ុនជប៉ុនមួយនេះ កំពុងស្វែងរកការបង្វែរប្រាក់ចំណូលពីការលក់ទ្រព្យសកម្មនៅមីយ៉ាន់ម៉ាឆ្ពោះទៅរកការអភិវឌ្ឍអាជីវកម្មផលិតស្រាបៀរ និងផលិតផលសុខភាពនៅក្នុងសហរដ្ឋអាមេរិក និងអូស្ត្រាលីវិញម្ដង។
កាលពីខែធ្នូ ឆ្នាំ ២០២១ ក្រុមហ៊ុន Kirin បានបញ្ចប់ការទិញយកភាគហ៊ុនក្រុមហ៊ុនផលិតស្រាបៀរ អូស្ត្រាលី Fermentum Group ក្នុងទំហំទឹកប្រាក់ជាង៣៤០លានដុល្លារផងដែរ។ មួយខែក្រោយមក Kirin ក៏បានទិញក្រុមហ៊ុនផលិតស្រាបៀររបស់អាមេរិក Bell's Brewery ក្នុងប្រហាក់ប្រហែលគ្នានេះដែរ។ ក្រុមហ៊ុន Kirin ក៏រំពឹងការលក់ស្រាបៀរដែលនឹងផលិតឡើងនៅទីផ្សារអាមេរិក និងអូស្ត្រាលី នឹងជួយបង្កើនប្រាក់ចំណេញសម្រាប់ក្រុមហ៊ុននេះ កាន់តែច្រើនផងដែរនាពេលខាងមុខ៕
អត្ថបទ វ៉ាន់ ស្រីរ័ត្ន
None
