យ៉ាងណាមិញ ក្រុមអ្នកជំនាញសេដ្ឋកិច្ចបានកត់សម្គាល់ឃើញថា នាពេលថ្មីៗនេះចរន្តនៃការវិនិយោគក្នុងវិស័យកសិកម្មបានស្ទុះឡើងគួរឱ្យកត់សម្គាល់ ដោយទទួលបានការចាប់អារម្មណ៍យ៉ាងខ្លាំងពីសំណាក់សេដ្ឋីៗ និងអ្នកមានធនធាននានា ជាពិសេសក្រុមអ្នកជំនួញដែលធ្លាប់រកស៊ីក្នុងវិស័យអចលនទ្រព្យ។
ស្របពេលដែលពិភពលោកកំពុងញាំញីដោយសង្គ្រាម អតិផរណាហក់ឡើងខ្ពស់ និងការប្រែប្រួលអាកាសធាតុ ដែលកំពុងគំរាមកំហែងយ៉ាងធ្ងន់ធ្ងរដល់សន្តិសុខស្បៀងសកល តើនេះជាឱកាសល្អសម្រាប់អ្នកមានធនធាននៅកម្ពុជា ក្នុងការបង្វែរទិសដៅមកចាប់យកឱកាសវិនិយោគលើវិស័យកសិកម្មដែរឬទេ?
អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុន វើលដ៍ប៊្រីដ គ្រុប បានគូសបញ្ជាក់ថា វិស័យកសិកម្មនៅកម្ពុជា កំពុងមានការរីកចម្រើនគួរឱ្យកត់សម្គាល់ ដែលវាជាឱកាសដ៏ល្អសម្រាប់អ្នកមានធនធានក្នុងស្រុកអាចសម្លឹកមើលក្នុងការបោះទុនវិនិយោគ។
ជាការកត់សម្គាល់របស់អ្នកជំនួញដ៏ល្បីល្បាញរូបនេះ កន្លងមកអ្នកមានធនធានភាគច្រើនតែងសម្លឹងទៅលើការវិនិយោគក្នុងវិស័យអចលនទ្រព្យ ប៉ុន្តែនៅពេលវិស័យអចលនទ្រព្យធ្លាក់ចុះ ពួកគេហាក់ងាកមកសម្លឹងមើលឱកាសវិនិយោគក្នុងវិស័យកសិកម្មច្រើនគួរឱ្យកត់សម្គាល់។ អ្នកឧកញ៉ា សៀ ឬទ្ធី បានសង្កត់ធ្ងន់ថា ការប្រកួតប្រជែងទីផ្សារកសិកម្មនៅលើពិភពលោក គឺមានទំហំធំធេងណាស់ ដូច្នេះកម្ពុជា គួរចាំបាច់ធ្វើពិពិធកម្មទៅលើកសិផលណាដែលអាចបង្កើនតម្លៃបន្ថែមខ្ពស់ និងងាយស្រួលក្នុងការដឹកជញ្ជូននាំចេញ។
អត្ថបទគួរអាន
ជាមួយគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា វិបត្តិសង្គ្រាមនានានៅលើពិភពលោកនាពេលបច្ចុប្បន្ន បានក្លាយជាកត្តាអំណោយផលមួយសម្រាប់ជំរុញការនាំចេញកសិផលកម្ពុជា ទៅកាន់ទីផ្សារអន្តរជាតិ និងជំរុញឱ្យការវិនិយោគលើវិស័យនេះមានការរីកចម្រើនគួរឱ្យកត់សម្គាល់ តួយ៉ាងអ្នកធ្លាប់រកស៊ីក្នុងវិស័យអចលនទ្រព្យមួយចំនួនបានងាកមកវិនិយោគលើវិស័យកសិកម្មវិញជាបន្តបន្ទាប់ផងដែរ។ បើតាមអ្នកជំនាញរូបនេះ ស្ថិតក្នុងកាលៈទេសៈបច្ចុប្បន្ន វាជាឱកាសមាសសម្រាប់អ្នកដែលមានធនធានក្នុងការវិនិយោគលើវិស័យកសិកម្ម ដ្បិតវាមិនត្រឹមផ្តល់ផលចំណេញផ្នែកអាជីវកម្មប៉ុណ្ណោះទេ តែក៏បានចូលរួមចំណែកក្នុងការជួយរក្សាសន្តិសុខស្បៀងផងដែរ។
ដោយឡែក លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា ទោះបីជាការវិនិយោគក្នុងវិស័យកសិកម្មមានសញ្ញាវិជ្ជមានជាបន្តបន្ទាប់ក៏ដោយ ប៉ុន្តែទំហំ នៃការបោះទុននៅមានកម្រិតនៅឡើយ ដែលទាមទារឱ្យអ្នកមានធនធាន និងសេដ្ឋីគ្រាក់ៗក្នុងវិស័យអចលនទ្រព្យ ដែលកំពុងជួបប្រឈម គប្បីបង្វែរទុនមកវិនិយោគលើវិស័យនេះឱ្យបានកាន់តែច្រើន។ អ្នកជំនាញរូបនេះបានបន្ថែមថា ទោះបីជាផលចំណេញពីវិស័យកសិកម្មអាចមានល្បឿនយឺត និងមិនទាន់ចិត្តដូចវិស័យផ្សេងៗ ប៉ុន្តែវាជាគ្រឹះសេដ្ឋកិច្ចជាតិដ៏រឹងមាំ និងយូរអង្វែងបំផុត ដែលជួយទ្រទ្រង់សន្តិសុខស្បៀង និងកសាងជាតិប្រកបដោយនិរន្តរភាព ពិសេសក្នុងបរិបទដែលពិភពលោកកំពុងជួបវិបត្តិសង្គ្រាម និងការប្រែប្រួលអាកាសធាតុយ៉ាងធ្ងន់ធ្ងរ។
បើតាមការបញ្ជាក់របស់អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នាពេលថ្មីៗនេះបានឱ្យដឹងថា ទំហំទុនវិនិយោគក្នុងវិស័យកសិកម្មនៅកម្ពុជា បានកើនឡើងពីប្រមាណជាង១០០លានដុល្លារក្នុងឆ្នាំ២០២៤ ដល់ប្រមាណ៤០០លានដុល្លារនៅក្នុងឆ្នាំ២០២៥ និងបន្តមានកំណើនបន្ថែមទៀតនៅឆ្នាំ២០២៦ នេះ៕
