ការលាតត្រដាងអំពីគោលបំណងរបស់ក្រុមហ៊ុន AIAI នេះ ធ្វើឡើងនៅក្នុងជំនួបរវាងលោក Lu Wei ប្រធានក្រុមប្រឹក្សាភិបាលក្រុមហ៊ុន AIAI ជាមួយនឹងឯកឧត្តម ជា វុទ្ធី អគ្គលេខាធិការគណៈកម្មការធិការវិនិយោគកម្ពុជា នាថ្ងៃទី ៤ ខែកញ្ញា ឆ្នាំ២០២៤។
លោក Lu Wei បានថ្លែងថា ក្រុមហ៊ុនមានគម្រោងសិក្សាបឋមក្នុងការអភិវឌ្ឍតំបន់ថាមពលពិសេសនៅកម្ពុជា ដោយបានសហការជាមួយក្រុមហ៊ុន Energy China YNPD ដែលជាក្រុមហ៊ុនចិន បង្កើតឡើងតាំងពីឆ្នាំ១៩៥៨ និងមានជំនាញផ្នែកថាមពលអគ្គិសនី។ លោកបន្ថែមថា គម្រោងថាមពលពិសេសនេះ នឹងមានរៀបចំផលិតថាមពលអគ្គិសនីដើរដោយពន្លឺព្រះអាទិត្យ, Biomass, ថាមពលដើរដោយខ្យល់ និងប្រព័ន្ធផ្ទុកថាមពល (Energy Storage) ផងដែរ។
ឯកកឧត្តម ជា វុទ្ធី បានបង្ហាញនូវការគាំទ្រចំពោះគម្រោងរបស់ក្រុមហ៊ុន AIAI នេះ និងបានស្នើក្រុមហ៊ុនធ្វើការសិក្សាលម្អិតជាមួយនឹងក្រសួងរ៉ែ និងថាមពល ជាមុនសិន មុននឹងដាក់ពាក្យស្នើសុំវិនិយោគនៅក្រុមប្រឹក្សាអភិវឌ្ឍន៍កម្ពុជា។
បើតាមក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ខ្លួនបានទទួលជួបថ្នាក់ដឹកនាំរបស់ក្រុមហ៊ុន AIAI នេះ ម្ដងរួចហើយ កាលពីខែឧសភា កន្លងទៅ ដែលពេលនោះ ក្រុមហ៊ុន បានស្វែងរកការគាំទ្រ ដល់គម្រោងវិនិយោគអភិវឌ្ឍតំបន់សេដ្ឋកិច្ចនៅជិតអាកាសយានដ្ឋាន ហើយការវិនិយោគនោះ គ្រោងនឹងផ្ដោតលើសកម្មភាពបឋមចំនួន ៣ គឺការវិនិយោគថាមពលកកើតឡើងវិញ ដើរដោយពន្លឺព្រះអាទិត្យ (សូឡា), ការវិនិយោគក្នុងវិស័យទេសចរណ៍ និងការវិនិយោគនៅក្នុងវិស័យកសិកម្ម។
