រដ្ឋមន្ត្រីការបរទេសអាមេរិក លោក អាន់តូនី ប្លីងខេន អំឡុងដំណើរបំពេញទស្សនកិច្ចនៅអូស្រ្តាលីកាលពីសប្តាហ៍មុនបាននិយាយថា ប្រទេសផ្សេងទៀតកំពុងតាមមើលអាមេរិក និងសម្ព័ន្ធមិត្ត ដើម្បីដឹងពីរបៀបដែលប្រទេសលោកខាងលិចឆ្លើយតបទៅនឹងបញ្ហានៅអ៊ុយក្រែន ហើយការឆ្លើយតបនោះក្នុងកម្រិតណា?»។
ដោយឡែក មានមន្ត្រីក្រុងវ៉ាស៊ីនតោនដទៃទៀតបាននិយាយថា ពួកគេជឿថា រដ្ឋាភិបាលរបស់លោក ស៊ី ជីនពីង កំពុងសិក្សានិងតាមដានយ៉ាងយកចិត្តទុកដាក់ ថាតើសម្ព័ន្ធមិត្តណាតូមានការរួមសាមគ្គីគ្នាកម្រិតណានៅចំពោះមុខការគម្រាមកំហែងលើអ៊ុយក្រែន និងក្នុងតំបន់អឺរ៉ុបខាងកើតទាំងមូល ស្របពេលដែលលោកខាងលិច កំពុងដុតដៃដុតជើងជួបចរចាជាមួយរុស្សីដើម្បីបន្ថយភាពតានតឹង។
យ៉ាងណាមិញ ក៏មានដែរការទាស់គំនិតគ្នាបន្តិចបន្តួច រវាងសម្ព័ន្ធមិត្តជុំវិញ ការដាក់ទណ្ឌកម្មធ្ងន់ធ្ងរលើរុស្សីបើហ៊ានឈ្លានពានអ៊ុយក្រែន ដែលជាការស្នើឡើងពីសហរដ្ឋអាមេរិក ខណៈអាល្លឺម៉ង់ដែលជាបងធំរបស់អឺរ៉ុបឯណោះវិញ មិនសូវពេញចិត្តការដាក់ទណ្ឌកម្មប៉ុន្មានទេ ហើយបន្តជ្រើសយកផ្លូវការទូត ប៉ុន្ដែទីក្រុងប៊ែកឡាំងក៏បានរិះគន់យ៉ាងចាស់ដៃផងដែរ ទៅលើក្រុងម៉ូស្កូ។
អត្ថបទគួរអាន
ក្រុងវ៉ាស៊ីនតោនជឿជាក់ថា ការបន្តរក្សាភាពស្ងៀមស្ងាត់របស់ប៉េកាំង គឺជាការរង់ចាំមើលគំរូពីអាមេរិក និងរុស្សីសម្រាប់យកអនុវត្តលើកោះតៃវ៉ាន់។ ជាក់ស្តែង ចិនអាចប៉ាន់ស្មានបានថា តើអាមេរិកអាចនឹងឆ្លើយតបកម្រិតណា បើសិនជាចិនធ្វើការគំរាមកំហែងតៃវ៉ាន់ ដូចដែលរុស្សីបញ្ជូនទ័ពមកព្រំដែនអ៊ុយក្រែនដូចនេះ។
សូមជម្រាបថា ចិនតែងចាត់ទុកកោះតៃវ៉ាន់ថា ជាផ្នែកមួយក្រោមការគ្រប់គ្រងរបស់ខ្លួនេហូតមក ហើយទីក្រុងប៉េកាំង តែងកំណត់បញ្ហារបស់តៃវ៉ាន់ថាជារឿងសំខាន់ និងចាំបាច់បំផុត ព្រមទាំងបានសច្ចាថា នឹងបង្រួបបង្រួមតៃវ៉ាន់ឲ្យបាននៅពេលអនាគត។
គួរកត់សម្គាល់ដែរថាកន្លងមក លោកខាងលិចជារឿយៗបានទទូចឲ្យចិនជួយនិយាយជាមួយរុស្សីដើម្បីបន្ធូរបន្ថយស្ថានការណ៍ខ្លះ តែត្រូវចិនបដិសេធដោយអះអាងថាខ្លួនគ្មានសិទ្ធិអ្វីត្រូវលូកដៃក្នុងកិច្ចការផ្ទៃក្នុងរបស់រុស្សីឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
