របាយការណ៍ថ្មីចុងក្រោយមួយដោយអង្គភាពគាំទ្រគោលនយោបាយរបស់ Apec បានបង្ហាញថា កំណើន GDP នៅក្នុងតំបន់អាស៊ីប៉ាស៊ីហ្វិកនឹងកើនឡើងក្នុងរយៈពេលខ្លី ពីកំណើនដែលធ្លាប់សម្រេចបាន២,៦% នៅឆ្នាំ២០២២កន្លងទៅ ដូចគ្នាទៅនឹងការប៉ាន់ស្មាននៅក្នុងរបាយការណ៍ទស្សនវិស័យសេដ្ឋកិច្ចពិភពលោករបស់មូលនិធិរូបិយវត្ថុអន្តរជាតិដែរ។
យ៉ាងណាមិញ នៅឆ្នាំនេះ សេដ្ឋកិច្ចតំបន់អាស៊ីប៉ាស៊ីហ្វិក នឹងត្រូវបានជំរុញដោយឱកាសកើនឡើង ដូចជាការបើកព្រំដែន និងអាជីវកម្មឡើងវិញ ក៏ដូចជាការកើនឡើងនៃការប្រើប្រាស់ក្នុងវិស័យឯកជនជាដើម។
របាយការណ៍ថែមទាំងបានគូសបញ្ជាក់ទៀតថា ហានិភ័យដែលអាចទាញទម្លាក់សេដ្ឋកិច្ចដាំក្បាលចុះ ដូចជា អតិរផណា អត្រាការប្រាក់កើនខ្ពស់ និងបញ្ហាភូមិសាស្ត្រនយោបាយ នឹងបន្ដមានឥទ្ធិពលក្នុងកម្រិតមធ្យមលើសេដ្ឋកិច្ចតំបន់។
នៅក្នុងឆ្នាំ២០២២ អតិរផណានៅក្នុងតំបន់ប៉ាស៊ីហ្វិក គឺមានប្រមាណ ៥,៨% ជាកម្រិតខ្ពស់ជាងកាលពីអំឡុងវិបត្តិហិរញ្ញវត្ថុពិភពលោកឆ្នាំ២០០៨ទៅទៀត ដែលកាលនោះអតិផរណាមានត្រឹមតែ ៦,៦%ប៉ុណ្ណោះ។
ទោះយ៉ាងណា របាយការណ៍ដោយអង្គភាពគាំទ្រគោលនយោបាយ Apec បានប៉ាន់ប្រមាណថា អតិផរណានៅក្នុងតំបន់នឹងធ្លាក់ចុះមកនៅត្រឹម ៣,៩% វិញ នៅឆ្នាំ២០២៣នេះ មុននឹងបន្ដធ្លាក់ចុះមកនៅ២,៧% នៅឆ្នាំ២០២៤។
អត្ថបទគួរអាន
អ្នកស្រាវជ្រាវជាន់ខ្ពស់របស់ស្ថាប័នដដែលនេះ បានអះអាងថា ការកើនឡើងប្រកបដោយចីរភាព និងទូលំទូលាយនៃតម្លៃ បានជំរុញឲ្យមានការឆ្លើយតបយ៉ាងខ្លាំងក្លាពីសំណាក់អាជ្ញាធររូបិយវត្ថុនៅទូទាំងពិភពលោក ដើម្បីគ្រប់គ្រងលើអតិផរណាកុំឲ្យប៉ោងឡើងហួសហេតុ។ ក្នុងនោះ ធនាគារកណ្ដាលជាច្រើននៅតំបន់អាស៊ីប៉ាស៊ីហ្វិក ក៏មានការដំឡើងអត្រាការប្រាក់គោលរបស់ខ្លួនជាបន្ដបន្ទាប់ ដើម្បីបន្ថយសម្ពាធតម្លៃនេះ។
ដោយឡែក សម្រាប់កំណើនពាណិជ្ជកម្មនៅក្នុងតំបន់នេះវិញ ត្រូវបានព្យាករថា នឹងធ្លាក់ចុះនៅឆ្នាំ២០២៣ ដោយសារតែតម្រូវការពិភពលោកធ្លាក់ចុះ។ របាយការណ៍បានបង្ហាញថា កំណើននៃបរិមាណនៃការនាំចូលទំនងជានឹថមថយមកនៅត្រឹមអត្រា ២,៤% នៅឆ្នាំ២០២៣ ធៀបនឹងឆ្នាំ២០២២ធ្លាប់មានកំណើន៤,២% ខណៈការនាំចូលវិញ រំពឹងកើនឡើង១,៦%។
ទោះជាបែបនេះក្ដី សម្រាប់ទស្សនវិស័យពាណិជ្ជកម្មនៅឆ្នាំ២០២៤ របស់តំបន់អាស៊ីប៉ាស៊ីហ្វិក ត្រូវបានព្យាករថា នឹងមានភាពភ្លឺស្វាងជាងឆ្នាំ២០២៣ ដោយការនាំចេញទំនិញនឹងកើន ៣,៥% និងនាំចូលទំនិញនឹងកើន៣,៧%។
សូមជម្រាបថា បើតាមរបាយការណ៍របស់ធនាគារពិភពលោក សេដ្ឋកិច្ចសកលនៅឆ្នាំ២០២៣នេះ ត្រូវបានប៉ាន់ប្រមាណថា នឹងកើនឡើង២,៩% មុននឹងបន្ដកើនដល់ ៣,១%វិញនៅឆ្នាំ២០២៤។ ជាមួយគ្នានេះ តម្លៃថាមពល និងអាហារពិភពលោកក៏កំពុងស្ថិតនៅក្នុងនិន្នាការធ្លាក់ចុះផងដែរសម្រាប់ឆ្នាំ២០២៣ បន្ទាប់ពីបានកើនឡើងយ៉ាងគំហុកកាលពីឆ្នាំមុន ដោយសារតែផលប៉ះពាល់ទៅលើខ្សែចង្វាក់ផ្គត់ផ្គង់៕
