អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ថា ការអភិវឌ្ឍអាកាសយានដ្ឋានថ្មីនេះ គឺរងផលប៉ះពាល់ខ្លះដែរ ដោយសារមេរោគកូវីដ១៩។
អ្នកនាំពាក្យដដែលបានបន្តថា ការយឺតយ៉ាវនេះ ដោយសារតែនៅក្នុងដំណើរការសាងសង់ព្រលានយន្តហោះថ្មីនេះ ភាគច្រើនជាក្រុមហ៊ុនចិន ហើយអ្នកជំនាញការចិនមួយចំនួន ដែលបានត្រឡប់ទៅប្រទេសចិន មិនទាន់អាចវិលត្រឡប់មកវិញបាននៅឡើយ។ ប៉ុន្តែ ការសាងសង់នៅតែដំណើរការជាធម្មតា គ្រាន់តែយឺត។
អត្ថបទទាក់ទង
តាមរយៈការចុះផ្សាយរបស់សារព័ត៌មានក្នុងស្រុក កន្លងទៅ បានឲ្យដឹងថា ព្រលានយន្តហោះអន្តរជាតិខ្នាតធំមួយនេះ សាងសង់នៅលើផ្ទៃដីទំហំ ២៦០០ហិកតា នៅក្រុងតាខ្មៅ ស្រុកកណ្តាលស្ទឹង ខេត្តកណ្តាល ដែលជាការវិនិយោគក្នុងទំហំទឹកប្រាក់ ១៥០០លានដុល្លារអាមេរិក ដោយក្រុមហ៊ុន Cambodia Airport Investment Co., Ltd ដែលជាក្រុមហ៊ុនភាពជាដៃគូវិនិយោគរវាងវិស័យសាធារណៈ និង ឯកជន។
គួរបញ្ជាក់ថា ការវិនិយោគព្រលានយន្តហោះលំដាប់ថ្នាក់អន្តរជាតិថ្មីនេះ បានទទួលទុនវិនិយោគពីកម្ចីពីធនាគារបរទេស ចំនួន១១០០លានដុល្លារសហរដ្ឋអាមេរិក កម្ចីពីភាគទុនពីក្រុមហ៊ុនវិនិយោគទុនអាណិកជនកម្ពុជា (OCIC) របស់ឧកញ៉ា ពុង ឃាវសែ ២៨០លានដុល្លារសហរដ្ឋអាមេរិក និង ដើមទុនចុះបញ្ជី ១២០លានដុល្លារសហរដ្ឋអាមេរិក។ ក្នុងនោះ ទុនរបស់ក្រុមហ៊ុនវិនិយោគទុនអាណិកជនកម្ពុជា (OCIC) មាន៩០ភាគរយ ខណៈរដ្ឋលេខាធិការដ្ឋានអាកាសចរណ៍ស៊ីវិលតំណាងឲ្យរដ្ឋាភិបាលកម្ពុជាមាន ១០ភាគរយ៕
