ប៉ុន្តែ បើប្រៀបធៀបចំនួនអាផាតមិន និងខុនដូនាពេលបច្ចុប្បន្នឃើញថា យូនីតរបស់ខុនដូមានចំនួនច្រើនជាងយូនីតរបស់អាផាតមិនជាងបីឯណោះ ដែលនេះឆ្លុះបញ្ចាំងឲ្យឃើញថា វិស័យខុនដូមានការរីកចម្រើនខ្លាំងនៅប៉ុន្មានឆ្នាំចុងក្រោយនេះ។ អ្នកជំនាញវាយតម្លៃថា វិស័យអចលនទ្រព្យរបស់កម្ពុជានៅឆ្នាំនេះ នឹងមានស្ថានភាពល្អប្រសើរជាងឆ្នាំមុន បើទោះបីនៅក្នុងរយៈពេល៣ខែកន្លងមកនេះទីផ្សារអចលនទ្រព្យមិនសូវមានភាពល្អប្រសើរក្តី។
លោកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ PropNex កត់សម្គាល់ឃើញថា ទោះបីទីផ្សារខុនដូមានការរីកចម្រើនខ្លាំងនៅប៉ុន្មានឆ្នាំចុងក្រោយក៏ដោយ តែវាមិនបានជះឥទ្ធិពលធ្ងន់ធ្ងរដល់អាផាតមិន ដែលមានគុណភាពកម្រិត A និង B នោះឡើយ។ ពោលគឺអាផាតមិន ដែលមានគុណភាពល្អនៅតែជាជម្រើសដ៏ល្អសម្រាប់ប្រជាពលរដ្ឋក្នុងការរស់នៅ ដ្បិតវាមានការផ្តល់ជូនសេវាកម្មបំពេញបន្ថែមសម្បូរបែបជាងខុនដូមួយចំនួន។ ប៉ុន្តែ អាផាតមិនកម្រិត C មានការរងផលប៉ះពាល់ខ្លាំងពីការរីកចម្រើននៃទីផ្សារខុនដូ ដោយសារសេវាកម្មរបស់អាផាតមិនកម្រិតនេះ នៅមានកម្រិតបើធៀបនឹងខុនដូ។
បើតាមការគូសបញ្ជាក់របស់លោកស្រី អាន សុធីតា បច្ចុប្បន្នរាជធានីភ្នំពេញមានអាផាតមិនប្រមាណ៩ពាន់យូនីត នៅមានចំនួនតិចតួចនៅឡើយបើធៀបនឹងខុនដូ ដែលមានប្រមាណ៣ម៉ឺនយូនីត។ សម្រាប់លោកស្រីចំនួនអាផាតមិន និងខុនដូនេះអាចឆ្លើយតបតម្រូវការគ្រប់គ្រាន់របស់ប្រជាពលរដ្ឋរស់នៅរាជធានីភ្នំពេញ។ អ្នកជំនាញរូបនេះសង្កេតឃើញថា ប្រជាជនខ្មែរនៅពីរបីឆ្នាំចុងក្រោយនេះហាក់មានការចាប់អារម្មណ៍ខ្លាំងលើវិស័យខុនដូ និងអាផាតមិន។
អត្ថបទគួរអាន
ដោយឡែកពាក់ព័ន្ធទីផ្សារខុនដូឯណោះវិញ លោក ងួន ឆាយលាង អគ្គនាយកក្រុមហ៊ុន Pointer បានគូសបញ្ជាក់ថា ក្រោយរាជរដ្ឋាភិបាលកម្ពុជាប្រកាសបើកប្រទេសឡើងវិញ និងបន្ធូរបន្ថយវិធានការកូវីដ-១៩ សម្រាប់អ្នកដំណើរចូលមកកម្ពុជា គួបផ្សំការបើកឲ្យមានការហោះហើរឡើងវិញពីបណ្តាប្រទេសក្នុងតំបន់ ទីផ្សារខុនដូមានស្ថានភាពល្អប្រសើរឡើងវិញបណ្តើរៗហើយ។ ពោលគឺការទិញលក់ខុនដូក្នុងគម្រោងល្អៗចាប់ផ្តើមមានចរន្តឡើងវិញ តែនៅមានចំនួនតិចតួចនៅឡើយបើធៀបនឹងពេលមិនទាន់មានកូវីដ-១៩។ លោកអះអាងថា បច្ចុប្បន្នមានវិនិយោគិនបរទេសមកពីប្រទេសផ្សេងៗមួយចំនួនបានចាប់អារម្មណ៍មកវិនិយោគ និងមើលគម្រោងខុនដូនៅកម្ពុជា។
ជាមួយគ្នានេះ ឧកញ៉ា ចេង ខេង អគ្គនាយក្រុមហ៊ុនអចលនទ្រព្យ CPL ជឿជាក់ថា វិស័យអចលនទ្រព្យរបស់កម្ពុជានៅឆ្នាំ២០២២ នឹងមានស្ថានភាពល្អប្រសើរជាងឆ្នាំមុន បើទោះបីបច្ចុប្បន្នវិស័យនេះ បន្តរងការគំរាមកំហែងពីវិបត្តិកូវីដ-១៩ និងឥទ្ធិពលភាពតានតឹងភូមិសាស្ត្រនយោបាយសកលក៏ដោយ។ កត្តាដែលធ្វើឲ្យ លោកឧកញ៉ា ជឿជាក់បែបនេះ គឺដោយសារកម្ពុជាជាប្រទេស ដែលមានចំនួនប្រជាពលរដ្ឋបានចាក់វ៉ាក់សាំងកូវីដ-១៩ ច្រើនជាងគេ និងមានការបន្ធូរបន្ថយវិធានការកូវីដ-១៩ ល្អប្រសើរជាងគេបើធៀបនឹងប្រទេសក្នុងតំបន់។ ជាក់ស្តែងកាលពីពេលថ្មីៗ រាជរដ្ឋាភិបាលកម្ពុជា បានសម្រេចលើកលែងការធ្វើតេស្តរកមេរោគកូវីដ-១៩ សម្រាប់អ្នកដំណើរចូលមកកម្ពុជា ដែល លោកឧកញ៉ា ចាត់ទុកជាការលើកទឹកចិត្តដ៏សំខាន់សម្រាប់វិនិយោគិនជាតិ និងអន្តរជាតិ។
ដោយឡែក ពាក់ព័ន្ធវិស័យអចលនទ្រព្យរបស់កម្ពុជានេះដែរលោកស្រី អាន សុធីតា អះអាងថា ទីផ្សារអចលនទ្រព្យនៅកម្ពុជាមិនទាន់មានភាពល្អប្រសើរនៅឡើយទេក្នុងពេលប្រមាណ៣ខែកន្លងមកនេះ ពោលគឺវិស័យនេះនៅតែបន្តរងការគំរាមកំហែងពីវិបត្តិកូវីដ-១៩ និងឥទ្ធិពលពីវិបត្តិភូមិសាស្ត្រនយោបាយសកល។ អ្នកជំនាញរូបនេះកត់សម្គាល់ឃើញថា ការទិញលក់អចលនទ្រព្យនានាដែលមានតម្លៃស្មើ ឬលើទីផ្សារនៅតែបន្តធ្លាក់ចុះ ប៉ុន្តែបើអចលនទ្រព្យដែលមានតម្លៃក្រោមទីផ្សារហាក់មានទីផ្សារល្អ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
