មន្ត្រីជាន់ខ្ពស់ពាណិជ្ជកម្មក្រុងប៉េកាំងនៅសប្ដាហ៍នេះ បានថ្លែងឲ្យដឹងថា ក្រុមហ៊ុននានាគួរតែប្រើប្រាស់វិធីសាស្ត្រផ្លូវច្បាប់ ដើម្បីប្រយុទ្ធប្រឆាំងនឹងការរឹតបន្តឹងពាណិជ្ជកម្ម និងដាក់គំនាបលើផលិតផលសូឡារបស់ចិន ជាមួយគ្នានេះឧស្សាហកម្មសូឡាគួរតែបង្កើនស្វ័យភាព និងភាពធន់របស់ខ្លួនផងដែរ។
បើទោះបីមិនបាននិយាយចំៗថា ជាគំនាបពីសហរដ្ឋអាមេរិក និងឥណ្ឌា តែរដ្ឋអំណាចប៉េកាំងបានលើកឡើងថា ភាពតានតឹងផ្នែកពាណិជ្ជកម្មនៅតែមានកម្រិតខ្ពស់នៅទូទាំងពិភពលោក ប្រការនេះ បាននាំមកនូវបញ្ហាប្រឈមយ៉ាងធ្ងន់ធ្ងរដល់ក្រុមហ៊ុន និងសហគ្រាសរបស់ចិន។ ប៉ុន្តែប៉េកាំងនឹងបន្តការពារ ព្រមទាំងជួយដល់ក្រុមហ៊ុនទាំងអស់ នៅពេលដែលពួកគេចង់ពង្រីកទីផ្សារអន្តរជាតិ។
គួរជម្រាបថា ភាគហ៊ុនរបស់ក្រុមហ៊ុនសូឡារបស់ចិនកាលពីថ្ងៃពុធ បានកត់ត្រាពីការធ្លាក់ចុះក្រោយពីរដ្ឋសភាសហរដ្ឋអាមេរិកបានអនុម័តច្បាប់ ដែលនឹងហាមឃាត់ទំនិញ មកពីតំបន់ ស៊ិនជាំង លុះត្រាតែក្រុមហ៊ុនទាំងនោះ អាចបញ្ជាក់បានថា ទំនិញពួកគេមិនត្រូវបានផលិតឡើង ដោយប្រើប្រាស់កម្លាំងពលកម្មដោយបង្ខិតបង្ខំ។អត្ថបទគួរអាន
លើសពីនេះ អាជ្ញាធរគយអាមេរិកបានហាមឃាត់ការនាំចូលបន្ទះសូឡា ពីក្រុមហ៊ុនចិនជាច្រើន ដោយសង្ស័យថា ផលិតផលពួកគេមានផ្ទុកសារធាតុស៊ីលីកូន ដែលផលិតចេញពីក្រុមហ៊ុនមួយផ្សេងទៀត ដែលត្រូវបានអាមេរិកដាក់ក្នុងបញ្ជីខ្មៅ ដោយសារបញ្ហាសិទ្ធិមនុស្សនៅស៊ីនជាំង។
ថ្មីៗនេះទៀតសោត អាជ្ញាធរពាណិជ្ជកម្មរបស់សហរដ្ឋអាមេរិក ក៏បានផ្តល់អនុសាសន៍ឱ្យបន្តការយកពន្ធ ដូចទៅនឹងពេលលោកដូណាល់ ត្រាំ នៅជាប្រធានាធិបតីអាមេរិកដែរ ពោលគឺនៅពេលនោះ អាមេរិកបានដាក់គំនាបពន្ធលើគ្រឿងបន្លាស់ផ្ទាំងសូឡាពីក្រៅប្រទេសយ៉ាងច្រើន ពិសេសប្រទេសចិន។
សូមជម្រាបថា មិនមែនតែអាមេរិកនោះទេ ដែលបានដាក់គំនាបលើពាណិជ្ជកម្មសូឡាជាមួយចិន សូម្បីតែប្រទេសឥណ្ឌាកាលពីដើមឆ្នាំនេះក៏បានប្រកាសដំឡើងពន្ធ៤០% លើការនាំចូលគ្រឿងបង្គុំបន្ទះសូឡាផងដែរ ដោយសម្អាងថា ចង់កាត់បន្ថយការពឹងផ្អែកលើការផ្គត់ផ្គង់ពីបរទេស និងជំរុញការផលិតនៅក្នុងស្រុក៕None
