តើមកទល់ពេលនេះវិស័យដឹកជញ្ជូនរបស់កម្ពុជា មានស្ថានភាពយ៉ាងណាដែរ?

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា កត់សម្គាល់ឃើញថា ដំណើរការដឹកជញ្ជូនចេញចូលរបស់កម្ពុជា នៅមានសកម្មភាពជាប្រក្រតី ប៉ុន្តែថ្លៃដឹកជញ្ជូនមានការកើនឡើងចន្លោះពី២០ ទៅ៣០% ដោយសារការឡើងថ្លៃ នៃប្រេងឥន្ធនៈ។ សម្រាប់អ្នកជំនាញរូបនេះ ប្រសិនបើភាពមិនប្រាកដប្រជារបស់ពិភពលោកនៅតែបន្តអូសបន្លាយនោះមិនត្រឹមតែប៉ះពាល់ដល់វិស័យដឹកជញ្ជូនប៉ុណ្ណោះទេ តែវាក៏នឹងធ្វើឱ្យប៉ះពាល់ដល់វិស័យជាច្រើនទៀតផងដែរ។

ដោយឡែកឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលបានគូសបញ្ជាក់ថា នៅក្នុងរយៈពេល៩ខែឆ្នាំ២០២៦ ការដឹកជញ្ជូនទំនិញចេញ-ចូលតាមផ្លូវអាកាសរបស់កម្ពុជា មានចំនួន៧៦,២៩៤តោន មានការកើនឡើង១៨% បើធៀបនឹងរយៈពេលដូចគ្នាកាលពីឆ្នាំមុន។

ក្រុមអ្នកជំនាញក្នុងវិស័យដឹកជញ្ជូន និងឡូជីស្ទីកនៅកម្ពុជា បានគូសបញ្ជាក់ថា បញ្ហាថ្លៃដើមខ្ពស់ និងភាពស្មុគស្មាញ នៃនីតិវិធីឯកសារ ដែលត្រូវឆ្លងកាត់ភាគីពាក់ព័ន្ធច្រើន និងប្រើប្រាស់ពេលវេលាយូរ គឺជាបញ្ហាប្រឈមចម្បងក្នុងវិស័យដឹកជញ្ជូន។ ដើម្បីដោះស្រាយបញ្ហាទាំងនេះបាន លុះណាមានការកែទម្រង់ទៅប្រើប្រាស់ឌីជីថលដោយតភ្ជាប់ទៅគ្រប់ស្ថាប័នពាក់ព័ន្ធលើប្រព័ន្ធរួមតែមួយ និងដំណើរការដោយស្វ័យប្រវត្តិនោះទើបការដឹកជញ្ជូនរបស់កម្ពុជាមានភាពប្រកួតប្រជែង កាត់បន្ថយថ្លៃដើម លឿនរហ័ស និងចំណេញពេលវេលា ស្របតាមបរិបទនៃការអភិវឌ្ឍក្នុងតំបន់៕

អត្ថបទ៖ បូ ដូឡា