ថ្លែងនៅក្នុង ពិធីដាក់ឱ្យដំណើរការជាផ្លូវការ ការទូទាត់ឆ្លងដែនតាម ឃ្យូអរកូត រវាងប្រទេសកម្ពុជា និងប្រទេសឥណ្ឌា (ដំណាក់កាលទី១៖ ឥណ្ឌាស្កេនខេអេចឃ្យូអរកូតនៅប្រទេសកម្ពុជា) កាលពីថ្ងៃទី ០២ ខែមិថុនា ឆ្នាំ ២០២៦ លោកជំទាវ បណ្ឌិត ជា សិរី ទេសាភិបាលធនាគារជាតិ នៃកម្ពុជា បានលើកឡើងថា កម្ពុជា និងឥណ្ឌា មានអរិយធម៌បុរាណបានផ្សារភ្ជាប់គ្នាមកអស់រយៈពេលរាប់ពាន់ឆ្នាំមកហើយ រួមទាំងវប្បធម៌ ជំនឿ និងការធ្វើពាណិជ្ជកម្ម។ យ៉ាងណាមិញ សម្រាប់កិច្ចសហប្រតិបត្តិការលើការទូទាត់ឆ្លងដែនតាម ឃ្យូអរកូតនេះ លោកជំទាវជឿជាក់ថា នឹងជួយសម្រួលដល់ភ្ញៀវទេសចរឥណ្ឌាមកកាន់កម្ពុជា អាចធ្វើការទូទាត់ថ្លៃទំនិញ និងសេវាកម្ម បានយ៉ាងងាយស្រួល រហ័ស និងសុវត្ថិភាពខ្ពស់នៅកម្ពុជា តាមរយៈការស្កេន ខេអេចឃ្យូអរកូត របស់អាជីវកម្មប្រមាណ ៤លាន៥សែនទីទាំងនៅទូទាំងប្រទេស។
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ដែរថា “ការដាក់ឱ្យដំណើរការជាផ្លូវការការទូទាត់ឆ្លងដែនដំណាក់កាលទី១ ឥណ្ឌាស្កេនខេអេចឃ្យូអរកូតនៅប្រទេសកម្ពុជា ដោយ ធនាគារ អេស៊ីលីដា ភីអិលស៊ីនេះ គឺតំណាងឱ្យសមិទ្ធិផលដ៏សំខាន់មួយនៅក្នុងផែនទីបរិវត្តកម្មឌីជីថល។ លោកបណ្ឌិតបន្ថែមថា ការតភ្ជាប់ការទូទាត់ឆ្លងដែនតាមរយៈឃ្យូអរកូតរវាងកម្ពុជា និងឥណ្ឌា នឹងជួយសម្រួលការទូទាត់ និងបម្រែបម្រួលអត្រាប្តូរប្រាក់សម្រាប់អ្នកធ្វើដំណើរ។ មិនត្រឹមតែប៉ុណ្ណោះ កិច្ចសហការនេះ នឹងផ្តល់អត្ថប្រយោជន៍យ៉ាងច្រើនដល់អាជីវករក្នុងស្រុក តាមរយៈការទទួលបានទីផ្សារ ឌីជីថល ដែលមានសន្ទុះខ្ពស់ ការជួយបង្កើនប្រសិទ្ធភាពនៃការគ្រប់គ្រងសាច់ប្រាក់ និងការបង្កើនសមត្ថភាពប្រតិបត្តិការ តាមរយៈការទូទាត់ភ្លាមៗ និងមានសុវត្ថិភាពខ្ពស់។
លោក Ritesh Shukla, នាយកប្រតិបត្តិ ក្រុមហ៊ុន NPCI International បានគូសបញ្ជាក់ថា ការដាក់ឱ្យដំណើរការសម្រាប់ការទូទាត់តាមរយៈកម្មវិធី UPI (Unified Payments Interface) នៅលើបណ្តាញខេអេចឃ្យូអរកូត (KHQR) របស់ពាណិជ្ជករទូទាំងប្រទេសកម្ពុជានេះ គឺជាព្រឹត្តិការណ៍ដ៏សំខាន់មួយនៅក្នុងដំណើរការនៃការទូទាត់ឆ្លងដែន។ កិច្ចសហការនេះ មិនត្រឹមតែពង្រឹងការតភ្ជាប់ការទូទាត់តាមពេលវេលាជាក់ស្តែង រវាងប្រព័ន្ធអេកូនៃប្រទេសទាំងពីរប៉ុណ្ណោះទេ ប៉ុន្តែថែមទាំងជាមូលដ្ឋានគ្រឹះសម្រាប់ការចូលរួមជំរុញវិស័យ ទេសចរណ៍ និងពាណិជ្ជកម្មផងដែរ។
គួររំលឹកថា ធនាគារ អេស៊ីលីដា បានដាក់ឱ្យដំណើរការជាផ្លូវការនូវសេវាទូទាត់ឆ្លងដែនតាមឃ្យូអរកូត ចាប់តាំងពីឆ្នាំ២០២០ ដើម្បីឆ្លើយតបនឹងតម្រូវការទីផ្សារ ដែលជួយឱ្យអតិថិជនអាចធ្វើប្រតិបត្តិការទូទាត់តាមរយៈឃ្យូអរកូតបានភ្លាមៗ និងដោយរលូន នៅទូទាំងតំបន់អាស៊ាន និងប្រទេសដៃគូជាច្រើន៕
