តាមរយៈគេហទំព័រហ្វេសប៊ុកផ្លូវការរបស់ស្ថានទូតចិនប្រចាំកម្ពុជា លោក Wang Wentian ឯកអគ្គរដ្ឋទូតចិនប្រចាំកម្ពុជា បានលើកឡើងថា «មានតែវាយោបក់បោកខ្លាំងទើបអាចដឹងពីភាពស៊ូទ្រាំនៃស្មៅ មានតែក្នុងកាលៈទេសៈនៃការលំបាកទើបស្គាល់ពីមិត្តភក្តិពិតប្រាកដ។ នេះបានបង្ហាញពីប្រទេសកម្ពុជាជា“មិត្តដែកថែប”នៃប្រទេសចិន»។
លោក Wang បានថ្លែងបែបនេះ ក្រោពេលដែលសម្តេច ហ៊ុន សែន នាយករដ្ឋមន្ត្រីកម្ពុជា ក្នុងពេលថ្មីៗនេះបានថ្លែងនៅក្នុងសន្និសីទសារព័ត៌មានអំពីជំងឺរលាកផ្លូវដង្ហើមថ្មីកូរ៉ូណា (Coronavirus)នៅវិមានសន្តិភាពថា រាជរដ្ឋាភិបាល និងប្រជាជនកម្ពុជានឹងឈរយ៉ាងមុតមាំជាមួយរដ្ឋាភិបាល និងប្រជាជនចិន ដើម្បីចាប់ដៃគ្នាប្រយុទ្ធប្រឆាំងនឹងជម្ងឺវីរុសប្រភេទថ្មីនេះ និងឆ្លងទុក្ខលំបាកនេះជាមួយគ្នា។ សម្ដេច ហ៊ុន សែន ក៏បានបញ្ជាក់ទៀតថា កម្ពុជាមិនត្រូវការជម្លៀសសិស្ស និស្សិត ឬមន្ត្រីកុងស៊ុល និងមន្ត្រីស្ថានទូត នៅប្រទេសចិនឲ្យកកម្ពុជាវិញនោះទេ។
អត្ថបទទាក់ទង!
សម្តេចថែមទាំងថ្លែងទៅកាន់ប្រទេសដទៃៗទៀត ដែលកំពុងមានករណីវីរ៉ុសឆ្លងដូចគ្នានេះផងដែរថា “កុំអោយមកបង្កការរករឿងតែមកលើកម្ពុជា។ ក្នុងពេលនេះប្រទេសរបស់លោកឯងក៏មានជំងឺឆ្លងនេះដែរ លោកឯងគួរតែទៅស្តីបន្ទោសរដ្ឋាភិបាលខ្លួនឯងផង កុំចាំបាច់មកបន្ទោសរាជរដ្ឋាភិបាលកម្ពុជា។ ព្រោះករណីឆ្លងវីរ៉ុសថ្មីកូរ៉ូណានេះ ក៏កំពុងកើតឡើងនៅក្នុងប្រទេសដ៏ទៃរួមទាំងប្រទេសរបស់លោកឯងផងដែរ។ ហើយចំពោះប្រទេសកម្ពុជាវិញ គឺមកទល់ពេលនេះមិនមានប្រជាពលរដ្ឋខ្មែរណាម្នាក់បានឆ្លងជំងឺរលាកផ្លូវដង្ហើមថ្មីកូរ៉ូណា (Coronavirus) នៅឡើយទេ”។
យោងតាមការចុះផ្សាយរបស់គេហទំព័របរទេស Chanel News Asia ដែលបានចុះផ្សាយត្រឹមម៉ោង១២ថ្ងៃត្រង់ ថ្ងៃទី០៣ ខែកុម្ភៈនេះបានបង្ហាញពីរបាយការណ៍ចំនួននៃការឆ្លងសរុបនៅក្នុងការឆ្លងវីរុសនៅទូទាំងពិភពលោក គឺបានកើនឡើងដល់ជាង ១៧.៣០០ ករណី ខណៈដែលចំនួនអ្នកស្លាប់បានកើនឡើងដល់ទៅ ៣៦២ នាក់។ ក្នុងនោះដែរ នៅពេលថ្មីៗនេះ ប្រទេសហ្វីលីពីន ក៏មានអ្នកស្លាប់ម្នាក់ផងដែរ។
គិតហូតមកទល់នឹងពេលនេះ នៅលើពិភពលោកមានប្រទេសចំនួន២៧ ដែលមានករណីឆ្លងវីរុសកូរ៉ូណាថ្មីនេះ ហើយមានអ្នកជំងឺប្រមាណតែជិត ៥០០នាក់ប៉ុណ្ណោះ ដែលបានជាសះស្បើយឡើងវិញ។
ក្រសួងសុខាភិបាលកម្ពុជាក៏បានខ្នះខ្នែងផងដែរ ចំពោះការទប់ស្កាត់វីរុសថ្មីនេះ មិនឲ្យឆ្លងមកដល់ពលរដ្ឋកម្ពុជា ដែលមកទល់នឹងពេលនេះ នៅកម្ពុជាមានករណីឆ្លងមានតែ អ្នកជំងឺមានវិជ្ជមានកូរ៉ូណាវីរុសប្រភេទថ្មី ជនជាតិអាយុ៦០ឆ្នាំម្នាក់ប៉ុណ្ណោះ ហើយអ្នកដែលបានប៉ះពាល់ផ្ទាល់៣នាក់ជាមួយអ្នកជំងឺ គឺនៅរក្សាក្នុង សណ្ឋាគារ និងបន្តអវិជ្ជមានកូរ៉ូណាវីរុសនៅឡើយ តែក្រុមមន្ត្រីសុខាភិបាលនៅបន្តតាមដានសុខភាពអ្នកទាំង៣នាក់នេះ រាល់ថ្ងៃរហូត ១៤ថ្ងៃក្រោយពេលប៉ះអ្នកជំងឺចុងក្រោយ៕
None
