នៅចំពោះមុខថ្នាក់ដឹកនាំក្រសួងមកពីប្រទេសផ្សេងៗក្នុងតំបន់អាស៊ាន ថ្នាក់ដឹកនាំក្រសួងសាធារណការ ក៏បានបង្ហាញពីសក្តានុពលនៃប្រព័ន្ធដឹកជញ្ជូន ដែលបានរៀបចំរួច និងគ្រោងដាក់ឲ្យដំណើរការនាពេលខាងមុខផងដែរ។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអះអាងថា មកទល់ពេលនេះ កម្ពុជា បានបញ្ចប់ការរៀបចំផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្មកម្ពុជាហើយ ក្រោយចំណាយពេលជាច្រើនខែក្នុងការរៀបចំ។ តាមរយៈផែនការមេដែលមានរយៈពេល១០ឆ្នាំនេះ ត្រូវបានក្រសួងសាធារណការវាយតម្លៃថា កម្ពុជាអាចត្រូវការទុនវិនិយោគជិត៥០លានដុល្លារ ដើម្បីអភិវឌ្ឍន៍លើគម្រោងចំនួន៣៣២គម្រោង។
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល គោលបំណងនៃការរៀបចំផែនការមេនេះ គឺដើម្បីធ្វើយ៉ាងណាឲ្យវិស័យដឹកជញ្ជូន និងភស្តុភារកម្ម និងតម្លៃដឹកជញ្ចូននៅកម្ពុជាកាន់តែមានភាពល្អប្រសើរ និងប្រកួតប្រជែងជាមួយប្រទេសក្នុងតំបន់ និងលើពិភពលោក។ លើសពីនេះ គឺដើម្បីរួមចំណែកជួយទាក់ទាញការវិនិយោគពីក្រៅប្រទេស ក៏ដូចជាបង្កើតការងារធ្វើជូនប្រជាពលរដ្ឋនៅកម្ពុជា។
អត្ថបទគួរអាន
ការលើកឡើងបែបនេះរបស់ឯកឧត្តមទេសរដ្ឋមន្ត្រី ស៊ុន ចាន់ថុល ធ្វើឡើងនាកិច្ចប្រជុំក្រុមប្រតិបត្តិប្រចាំតំបន់អាស៊ាន នៃវេទិការសេដ្ឋកិច្ចពិភពលោក ក្រោមប្រធានបទ«មាគ៌ារបស់អាស៊ានឆ្ពោះទៅកាន់សេដ្ឋកិច្ចឌីជីថលប្រកបដោយភាពរស់រវើក បរិយបន្ន និងនិរន្តភាព និងការប្រើប្រាស់ប្រព័ន្ធឌីជីថលសម្រាប់ខ្សែច្រវាក់ផ្គត់ផ្គង់ ភាពធន់ និងការផ្លាស់ប្តូរបៃតងរបស់សហគមន៍អាស៊ាន កាលពីថ្ងៃទី១៣ ខែកញ្ញា ឆ្នាំ២០២២នេះ ។
ក្នុងឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់ពីកិច្ចខិតខំប្រឹងប្រែងរបស់ក្រសួងក្នុងការអភិវឌ្ឍប្រព័ន្ធផ្លាស់ប្ដូរទិន្នន័យអេឡិចត្រូនិចនៅកំពង់ផែ(Port EDI) ដើម្បីសម្រួលដល់ការធ្វើធុរកិច្ចរបស់វិស័យឯកជន និងគម្រោងដាក់ដំណើរការជាបណ្ដោះអាសន្នផ្លូវល្បឿនលឿនភ្នំពេញ-ក្រុងព្រះសីហនុនៅដើមខែតុលា ឆ្នាំ២០២២ ដែលជាផ្លូវល្បឿនលឿនលើកដំបូងបង្អស់របស់កម្ពុជា អាចកាត់បន្ថយពេលវេលា និងការចំណាយលើការដឹកជញ្ជូនប្រកបដោយប្រសិទ្ធភាព។
ទន្ទឹមនឹងនេះ ឯកឧត្តមទេសរដ្ឋមន្ត្រី បានបង្ហាញពីបញ្ហាប្រឈមទាក់ទងនឹងការ អនុវត្តយន្តការច្រកចេញចូលតែមួយ និងបានលើកទឹកចិត្តឱ្យវិស័យឯកជនជំរុញរដ្ឋាភិបាលរបស់ខ្លួនក្នុងការប្រើប្រាស់យន្តការនេះ សម្រាប់ការត្រួតពិនិត្យការដឹកជញ្ជូនទំនិញ ដើម្បីកាត់បន្ថយការកកស្ទះនៅតាមព្រំដែន និងលើកកម្ពស់ការធ្វើពាណិជ្ជកម្មឱ្យកាន់តែប្រសើរឡើងផងដែរ៕
