តម្លៃស្រូវ នៅតាមខេត្តជាប់ព្រំដែនវៀតណាមដូចជាខេត្តព្រៃវែង និងតាកែវ ដែលធ្លាប់បានធ្លាក់ចុះមកនៅត្រឹម៦៥០រៀលក្នុងមួយគីឡូក្រាម ឥឡូវបានងើបឡើងថ្លៃវិញដល់ទៅជាង៧០០ ទៅ៨០០រៀល គិតមកទល់ពេលថ្មីៗនេះ ស្របពេលដែលបរិមាណនាំចេញប្រចាំថ្ងៃក៏ស្ទុះកើនច្រើន និង លែងកកស្ទះដូចពីមុនទៀតផងដែរ។
លោក ចាន់ សីហា អ្នកនាំពាក្យធនាគារអភិវឌ្ឍន៍ជនបទ និងកសិកម្ម បានបញ្ជាក់ថា កន្លងមក រាជរដ្ឋាភិបាល តាមរយៈធនាគារអភិវឌ្ឍន៍ជនបទ និងកសិកម្ម ក៏បានឱ្យរោងម៉ាស៊ីនកិនស្រូវក្នុងស្រុក ប្រមូលទិញស្រូវទាំងនោះពីកសិករ ក្នុងតម្លៃមួយដែលស្របនឹងទីផ្សារ ដើម្បីដោះស្រាយបញ្ហាទីផ្សារជូនកសិករ។ អ្នកនាំពាក្យរូបនេះយល់ឃើញថា ស្ថិតក្នុងវិបត្តិកូវីដ-១៩ ទោះបីកម្ពុជា ពិបាកនាំចេញស្រូវមួយរយៈ និងធ្វើឱ្យតម្លៃស្រូវធ្លាក់ចុះបន្តិចក្ដី តែស្ថានភាព ក្នុងវិស័យស្រូវហាក់កំពុងងើបឡើងវិញ។
ដោយឡែក លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង បានបញ្ជាក់ថា សព្វថ្ងៃ ខេត្តព្រៃវែង បាននាំចេញស្រូវ ទៅវៀតណាម ដំណើរការធម្មតាវិញជាបណ្ដើរៗ ហើយតម្លៃក៏ប្រសើរបន្តិចដែរ ក្រោយកម្ពុជា បានសម្របសម្រួល ជាមួយភាគីវៀតណាមឲ្យមានការបើកច្រកព្រំដែនឡើងវិញ។ បើតាមលោក អ៊ុក សំណាង សព្វថ្ងៃ តម្លៃស្រូវក្នុង ខេត្តព្រៃវែង អាចលក់បានតម្លៃ ៧៦០រៀល ក្នុងមួយគីឡូក្រាម ខណៈ កាលពីកាល ពាក់កណ្ដាល ខែកក្កដា តម្លៃស្រូវ ក្នុងខេត្តព្រៃវែង អាចលក់បានតម្លៃ ៦៥០រៀល ទៅ ៧២០រៀល ក្នុងមួយគីឡូក្រាមប៉ុណ្ណោះ សម្រាប់ស្រូវមិនប្រកាន់រដូវ។ ដ្បិតថា តម្លៃមិនសូវឡើងខ្លាំង តែប្រធានមន្ទីរកសិកម្មខេត្តព្រៃវែងរូបនេះ បញ្ជាក់ថា ពេលនេះ ស្រូវក្នុងខេត្តព្រៃវែង គ្មានការកកស្ទះទៀតនោះទេ។
អត្ថបទទាក់ទង
ខេត្តព្រៃវែង ជាខេត្តដែលនាំចេញស្រូវបានច្រើនជាងគេ ទៅប្រទេសវៀតណាម ព្រោះខេត្តនេះ មានព្រំប្រទល់ជាប់ប្រទេសវៀតណាម និងមានច្រកទ្វារព្រំដែនចំនួន៥។ ក៏ប៉ុន្តែ បច្ចុប្បន្ន ខេត្តនេះ ទើបតែអាចនាំស្រូវទៅប្រទេសវៀតណាម បានត្រឹមតែមួយច្រកប៉ុណ្ណោះ ក្នុងបរិមាណ ២ពាន់តោន ក្នុងមួយថ្ងៃ។ នេះបើតាមការអះអាងរបស់ប្រធានមន្ទីរកសិកម្មខេត្តព្រៃវែង។
ចំណែក ដំណើរការនៃការនាំចេញស្រូវ ទៅវៀតណាម ក្នុងខេត្តតាកែវ ឯណោះវិញ នៅតែមានដំណើរការជាធម្មតា និងមានតម្លៃ ប្រមាណ ៧៧០រៀល ទៅ៨០០រៀល ក្នុងមួយគីឡូក្រាម សម្រាប់ស្រូវមិនប្រកាន់រដូវ។ បើតាមលោក ញឹប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តតាកែវ អំឡុងពេលភាគីវៀតណាម ផ្អាកបណ្ដោះអាសន្ននូវច្រកទ្វារព្រំដែនក្នុងខេត្តព្រៃវែង បានធ្វើឱ្យការនាំចេញស្រូវ របស់ខេត្តតាកែវ កើនឡើងគួរឱ្យកត់សម្គាល់។
បើតាមលោក ញឹប ស្រ៊ន បច្ចុប្បន្ន ការនាំចេញស្រូវ ទៅប្រទេសវៀតណាម តាមច្រកទ្វារព្រំដែន ក្នុងខេត្តតាកែវ មានចំនួនប្រមាណ ៦ពាន់តោន ទៅ ៧ពាន់តោន ក្នុងមួយថ្ងៃ ខណៈអំឡុងមុនការផ្ទុះខ្លាំងនូវកូវីដ-១៩ ខេត្តតាកែវ អាចនាំចេញស្រូវ ទៅវៀតណាម ក្នុងបរិមាណ ៤ពាន់តោន ប៉ុណ្ណោះ ក្នុងមួយថ្ងៃ។
របាយការណ៍ពីក្រសួងកសិកម្មបង្ហាញថា នៅ៧ខែឆ្នាំ២០២១ ការនាំចេញស្រូវទៅកាន់ទីផ្សារវៀតណាមសម្រេចបានប្រមាណ ២លានតោន កើនឡើងជាង៨០%ធៀបនឹងរយៈពេលដូចគ្នាកាលពីឆ្នាំមុន៕
អត្ថបទ៖ ខន ណារី
None
