នៅក្នុងវេទិការជួបជុំសមាជិកអាជីវករលក់សាច់ជ្រូកនៃសមាគមផ្គត់ផ្គង់ជ្រូកកម្ពុជា ប្រធានសមាគមផ្គត់ផ្គង់សាច់ជ្រូកបានអះអាងថា តម្លៃសាច់ជ្រូកនៅលើទីផ្សារមានការឡើងថ្លៃទាំងជ្រូកនាំចូល និងជ្រូកក្នុងស្រុក ដោយសារតែមានការប្រមូលផ្តុំជ្រូកនាំចូលពីក្រុមហ៊ុនតែមួយ។
លោកសាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជា បានឲ្យដឹងថា តម្លៃជ្រូកដែលនាំចូលពីប្រទេសថៃមកលក់នៅកម្ពុជា ជាពិសេសនៅតាមបណ្តាខេត្តមានការឡើងថ្លៃ ហើយការថ្លៃនេះ ដោយសារតែឈ្មួញនាំចូលជាអ្នកដំឡើងថ្លៃខ្លួនឯង។
លោកថា «គោលបំណងសំខាន់ដែលសមាគមក៏ដូចជាអាជីវករចង់បាននោះគឺ ទី១ សុំឲ្យខាងក្រសួងលុបបំបាត់ការប្រមូលផ្តុំនាំចូលសាច់ជ្រូកតែមួយក្រុមហ៊ុនបែបនេះ សុំកុំឲ្យអ្នកដែលទទួលបានអាជ្ញាបណ្ណនាំចូលជ្រូកពីក្រសួងហើយនោះ លក់អាជ្ញាបណ្ណឲ្យគេ គឺសុំឲ្យនាំចូលខ្លួនឯង ដើម្បីឲ្យក្លាយជាទីផ្សារសេរី ជៀសវាងការឡើងថ្លៃសាច់ជ្រូកលើទីផ្សារហួសហេតុពេក ទី២ ស្នើឲ្យក្រសួងមានការពិចារណាផ្តល់អាជ្ញាបណ្ណឲ្យក្រុមហ៊ុន ដានី ឲ្យនាំចូលជ្រូកវិញ»។
អត្ថបទទាក់ទង!
ជុំវិញបញ្ហានេះដែរ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ បានអះអាងថា ការលើកឡើងថា ការនាំចូលជ្រូកក្នុងស្រុកមានការប្រមូលផ្តុំនោះ គឺជាការយល់របស់ក្រុមហ៊ុនមួយដែលបានប្រព្រឹត្តបទល្មើសប៉ុណ្ណោះ។
ឯកឧត្តមបញ្ជាក់ថា «កន្លងទៅនេះក្រសួងកសិកម្មបានចាប់នូវអ្វីដែលគាត់បានប្រព្រឹត្តបទល្មើសជាបន្តបន្ទាប់ មួយដងជាពីរដង ហើយបទល្មើសមុនដំបូងគឺថា យើងអនុញ្ញាតឲ្យគាត់នាំចូលជ្រូកមកកាន់ទីក្រុងភ្នំពេញប្រមាណ ៣០០ក្បាល គាត់នាំមករហូតដល់៦០០ក្បាល យើងបានចាប់ផាកពិន័យ ឲ្យគាត់ធ្វើកិច្ចសន្យា តែគាត់មិនត្រឹមតែមិនឈប់នោះទេ គាត់បែរជានៅតែប្រព្រឹត្ត ហើយមានករណីមានបន្តបន្ទាប់ កន្លងទៅយើងបានដឹងថា ក្រុមហ៊ុននេះជាក្រុមហ៊ុនព្រហើន មិនមែនថាយើងទៅចាប់គាត់ហើយ គាត់ទទួលកំហុសនោះទេ គាត់ទៅស្រាវជ្រាវរកព្រះរាជអាជ្ញាឲ្យមកចាប់មន្ត្រីរបស់យើងទៀត នេះគឺជាកិច្ចការមួយព្រហើនមែនទែន ដែលមិនគួរអត់ឱនឲ្យបាន»។
ដោយឡែកខាងប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ វិញបានបញ្ជាក់ថា និន្នាការសាច់ជ្រូកឡើងថ្លៃនេះ នឹងបន្តកើនឡើងថែមទៀត នៅក្រោយចប់កូវីដ-១៩។ លោកបន្ថែមថា
កាលពីមុនកម្ពុជាបាននាំចូលជ្រូកពីវៀតណាម តែសព្វថ្ងៃនេះកសិករចិញ្ចឹមជ្រូកនៅតាមខេត្តជាប់ព្រំដែនវៀតណាមបាននាំចេញទៅលក់នៅវៀតណាមវិញ ព្រោះបានតម្លៃថ្លៃជាងនាំមកភ្នំពេញ។
លោកប្រធានសមាគមអ្នកចិញ្ចឹមសត្វកម្ពុជារូបនេះបានបញ្ជាក់ថា «ទីផ្សារវៀតណាមសាច់ជ្រូកឡើងមួយគីឡូជាង៣ម៉ឺនរៀលហើយ ដូច្នេះខេត្តនៅតាមព្រំដែនជាមួយវៀតណាម មិនបាននាំជ្រូកមកលក់នៅភ្នំពេញទៀតទេ គឺនាំទៅលក់នៅវៀតណាមវិញបានថ្លៃជាងនៅភ្នំពេញពី៣ពាន់ទៅ៤ពាន់រៀលឯណោះ»។
លោកអះអាងទៀតថា «បញ្ហាជំងឺកូវីដ១៩ បានធ្វើពិភពលោកសព្វថ្ងៃនេះខ្វះស្បៀងអាហារ ហើយបើសិនក្រសួងកសិកម្មក៏ដូចជារាជរដ្ឋាភិបាលមិនខំជំរុញវិស័យចិញ្ចឹមសត្វនេះទេ ពេលដែលចប់កូវីដ យើងមានអីហូប អញ្ចឹងសព្វថ្ងៃនេះតម្លៃសាច់ជ្រូកយើងនៅថោកជាងវៀតណាមឆ្ងាយណាស់ ដូច្នេះខ្ញុំគិតថាឡើងថ្លៃប៉ុណ្ណោះ មិនជាបញ្ហានោះទេ»។
បើតាមលោកប្រធានសមាគមទាំងពីរ បច្ចុប្បន្ននេះ តម្លៃជ្រូករស់នៅទាំងនៅក្នុងស្រុក និងជ្រូកនាំចូលមានតម្លៃពី១៣.៨០០រៀល ទៅ១៥.០០០រៀល ក្នុងមួយគីឡូក្រាម ខណៈដែលតម្លៃលក់រាយនៅលើទីផ្សារ សាច់សុទ្ធនិងសាច់បីជាន់មានតម្លៃប្រហាក់ប្រហែលគ្នាគឺ ពី២០.០០០រៀល ទី២២.០០០រៀល ក្នុងមួយគីឡូក្រាម៕
None
