កម្ពុជាទទួលបានពានរង្វាន់ជាគោលដៅទេសចរណ៍វប្បធម៌ឈានមុខគេនៅអាស៊ីក្នុងឆ្នាំ២០២៣

ថ្នាក់ដឹកនាំក្រសួងទេសចរណ៍ បានគូសបញ្ជាក់ថា តាមរយៈលទ្ធផលនេះ សបញ្ជាក់ឱ្យឃើញថា កម្ពុជាជាគោលដៅទេសចរណ៍ដែលមានភាពទាក់ទាញ សម្រាប់អ្នកមានចំណាប់អារម្មណ៍អំពីវប្បធម៌។

យោងតាមគេហទំព័រ World Travel Award ដែលបានចេញផ្សាយកាលពីពេលថ្មីៗនេះ បានបង្ហាញថា កម្ពុជា បានជាប់ចំណាត់ថ្នាក់លេខ១ ជាប្រទេសដែលមានគោលដៅទេសចរណ៍វប្បធម៌ឈានមុខគេនៅអាស៊ីក្នុងឆ្នាំ២០២៣ ដែលតោងពីក្រោយដោយប្រទេសចំនួន៦ផ្សេងទៀត ដូចជាឥណ្ឌា ជប៉ុន នេប៉ាល់ ស្រីលង្កា ថៃ និងវៀតណាម។ មិនតែប៉ុណ្ណោះ ក្រៅពីទទួលបានតំណែងជាប្រទេសដែលមានគោលដៅទេសចរណ៍វប្បធម៌ឈានមុខគេប្រចាំតំបន់អាស៊ីហើយនោះ កម្ពុជាក៏បានឈ្នះពានរង្វាន់ជាប្រទេស មានគោលដៅទេសចរណ៍យុវជនឈានមុខគេប្រចាំតំបន់អាស៊ីនៅក្នុងឆ្នាំ២០២៣ ផងដែរ ដោយក្នុងនោះមានប្រទេសឡាវ ថៃ និងវៀតណាម នៅពីក្រោយកម្ពុជា។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានគូសបញ្ជាក់ថា សមិទ្ធផលដែលទទួលបានដ៏គួរឱ្យកត់សម្គាល់នេះ បានសបញ្ជាក់សារជាថ្មីអំពីភាពទាក់ទាញរបស់កម្ពុជាថា គឺជាគោលដៅទេសចរណ៍ដែលដាច់ខាតត្រូវតែទៅទស្សនាសម្រាប់អ្នកមានចំណាប់អារម្មណ៍អំពីវប្បធម៌។

គួរជម្រាបថា នេះគឺជាឆ្នាំទី២ហើយ ដែលកម្ពុជាទទួលបានពានរង្វាន់ទាំងនេះ ពោលគឺកាលពីឆ្នាំ២០២២កន្លងទៅ កម្ពុជាក៏បានឈរនៅកំពូងតារាងជាប្រទេសទទួលបានពានរង្វាន់ជាគោលដៅទេសចរណ៍វប្បធម៌ល្អដាច់គេប្រចាំតំបន់អាស៊ី និងជាប្រទេសមានគោលដៅទេសចរណ៍យុវជនឈានមុខគេប្រចាំតំបន់អាស៊ីផងដែរ។

សូមបញ្ជាក់ថា នៅពេញមួយឆ្នាំ២០២៣ កន្លងទៅនេះ កម្ពុជាទទួលបានភ្ញៀវទេសចរអន្តរជាតិ ប្រមាណជាង៥លាននាក់ កើនឡើងជិត១៥០% បើធៀបនឹងឆ្នាំ២០២២ និងថយចុះប្រមាណជិត២០% បើធៀបនឹងមុនមានវិវបត្តិកូវីដ-១៩។ ទន្ទឹមនេះ កម្ពុជាទទួលបានចំណូលពីភ្ញៀវទេសចរអន្តរជាតិ បានជាង៣ពាន់លានដុល្លារ កើនឡើងជិត១១៨% បើធៀបនឹងឆ្នាំ២០២២។ តាមរយៈលទ្ធផលនេះ ក្រសួងទេសចរណ៍រំពឹងថា ចរន្តភ្ញៀវទេសចរអន្តរជាតិ ដែលចូលមកកម្ពុជានៅឆ្នាំ២០២៤នេះ នឹងអាចត្រឡប់ដូចមុនពេលមានកូវីដ-១៩៕