កម្ពុជាគ្រោងនឹងទទួលចំណូលមិនមែនសារពើពន្ធ ១៤លានដុល្លារក្នុងឆ្នាំ២០២១ពីដំណក់ប្រេងរបស់ខ្លួន

កម្ពុជានៅក្នុងឆ្នាំ២០២១នេះ រំពឹងថានឹងទទួលបានចំណូលមិនមែនសារពើរពន្ធពីវិស័យប្រេង ប្រមាណ ១៤លានដុល្លារអាមេរិកដើម្បីចាក់បញ្ចូលបន្ថែមទៅក្នុងចំណូលថវិកាជាតិ។ នេះបើតាមការលើកឡើងរបស់ ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ មានប្រសាសន៍ក្នុងកម្មវីធីវេទិកាសាធារណៈស្តីពី«ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២១ រៀបចំដោយក្រសួងសេដ្ឋកិច្ចនៅថ្ងៃទី ២៧មករាឆ្នាំ២០២១។

ចំណូល១៤លានដុល្លារនេះ ត្រូវបានរដ្ឋាភិបាលកម្ពុជាប៉ាន់ប្រមាណដោយមិនបានរាប់បញ្ជូលនូវសារពើពន្ធនោះទេ។ បើរាប់បញ្ជូលទាំងសារពើពន្ធទៀត កម្ពុជាអាចនឹងទទួលចំណូលពីប្រេងប្រមាណ២៧លានដុល្លារនៅក្នុងឆ្នាំនេះ ជាមួយនឹងសេណារីយ៉ូប្រេងមួយប៉ារែលថ្លៃប្រមាណ៥០ដុល្លារអាមេរិក។

ជុំវិញទៅនឹងចំណូលពីវិស័យប្រេងនេះដែរ ឯកឧត្តម បណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិធ្លាប់បានលើកឡើងដែរថា ជាការពិតចំណូលប្រេងនេះ នឹងជួយបង្កើនចំណូលថវិកាជាតិបន្ថែមទៀតពិសេសនៅអំឡុងពេលកូវីដ-១៩កំពុងបន្ដរាតត្បាតនេះ។

ទោះយ៉ាងណា ឯកឧត្តមបានគូសបញ្ជាក់ថា បើទោះបីជាបានចំណូលពីវិស័យប្រេងក៏ដោយ ទាំងរដ្ឋាភិបាល និងប្រជាពលរដ្ឋក៏មិនត្រូវភ្លេចការខិតខំប្រឹងប្រែងរបស់ខ្លួនក្នុងការជំរុញកំណើនសេដ្ឋកិច្ចនោះដែរ។

សូមបញ្ជាក់ដែរថា កម្ពុជាផ្តើមទាញយកបានដំណក់ប្រេងដំបូងរបស់ខ្លួនកាលពីថ្ងៃទី ២៩ ខែធ្នូឆ្នាំ២០២០កន្លងទៅ ពីអណ្តូងប្រេងស្ថិតនៅក្នុងប្លុក A នៃឈូងសមុទ្រកម្ពុជា៕

សូមទស្សនាសេចក្តីរាយការណ៍បន្ថែមខាងក្រោមនេះ៖

None