យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១ ខែមេសា ឆ្នាំ២០២២ ឯកអគ្គរាជទូតអូស្ត្រាលី ឯកឧត្តម Pablo Kang បានគូសបញ្ជាក់ថា កិច្ចសហប្រតិបត្តិការយ៉ាងជិតស្និទ្ធ រវាងរាជរដ្ឋាភិបាលអូស្ត្រាលី និងរាជរដ្ឋាភិបាលកម្ពុជា មានជាយូរណាស់មកហើយ។ យ៉ាងណាមិញ នៅឆ្នាំនេះ ជាខួបគម្រប់ទី ៧០ឆ្នាំ នៃការចាប់ផ្តើមទំនាក់ទំនងការទូតរវាងប្រទេសទាំងពីរ ដោយឯកឧត្តមបានគូសបញ្ជាក់ថា អូស្ត្រាលីនឹងបន្តពង្រឹង និងពង្រីកកិច្ចសហប្រតិបត្តិការរបស់ខ្លួន និងបន្តផ្តល់ការគាំទ្ររបស់ខ្លួននៅកម្ពុជា។
បើតាមឯកឧត្តម Pablo Kang ដើម្បីអបអរសាទរខួបទី ៧០ឆ្នាំ នៃទំនាក់ទំនងការទូតប្រទេសទាំងពីរ តាមរយៈមូលនិធិរបស់ក្រសួងកិច្ចបរទេស និងពាណិជ្ជកម្ម អូស្ត្រាលី គ្រោងនឹងផ្តល់កិច្ចសហប្រតិបត្តិការហិរញ្ញប្បទានឥត សំណងថ្មី ក្រោមកម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ ដែលមានទឹកប្រាក់សរុប ៦៥លានដុល្លារ សម្រាប់រយៈ ពេល៥ឆ្នាំដំបូង ដោយគិតចាប់ពីពាក់កណ្ដាលឆ្នាំ ២០២២ ដល់ឆ្នាំ២០២៧។
ជាមួយគ្នានេះ ឯកឧត្តម Pablo Kang ក៏បានគូសបញ្ជាក់ទៀតថា រដ្ឋាភិបាលអូស្រ្ដាលី អាចនឹងបន្តផ្តល់ហិរញ្ញប្បទាន ដល់កម្ពុជាប្រមាណ ៤២លានដុល្លារបន្ថែម សម្រាប់រយៈពេលបន្ថែម ៣ឆ្នាំបន្ទាប់ទៀត ដោយអាចបន្តទៅដល់ពាក់កណ្តាលឆ្នាំ២០៣០។ បើតាមឯកអគ្គរាជទូតអូស្ដ្រាលី គម្រោងផ្ដល់ហិរញ្ញប្បទានឥតសំណងដល់កម្ពុជា ខាងលើនេះ ក្នុងគោលបំណងដើម្បី បន្តពង្រឹង និងពង្រីកកិច្ចសហប្រតិបត្តិការរបស់អូស្ត្រាលីនឹងកម្ពុជា ក៏ដូចជា ការបន្តផ្តល់ការគាំទ្ររបស់ខ្លួននៅកម្ពុជា ផងដែរ។
អត្ថបទគួរអាន
កម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ មានគោលបំណងធំៗចំនួន៣ គឺទី១.ជួយជ្រោមជ្រែងដល់កម្ពុជា ក្នុងការអភិវឌ្ឍលើផ្នែកកសិកម្ម ដែលមានតម្លៃខ្ពស់ និងចាប់ផ្តើមលើវិស័យកែច្នៃកសិផល។ ទី២. សហការ ជាមួយរាជរដ្ឋាភិបាលកម្ពុជា លើការងារជុំវិញគោលនយោបាយពាណិជ្ជកម្ម និងវិនិយោគ ព្រមទាំងអភិវឌ្ឍន៍ សហគ្រាស ដើម្បីជួយជ្រោមជ្រែងកម្ពុជា ក្នុងការពង្រីកទីផ្សាររបស់ខ្លួន ដើម្បីអាចនាំចូលទៅទីផ្សារនានា។ និងទី៣. បន្តវិនិយោគដើម្បីពង្រីកវិស័យហេដ្ឋារចនា សម្ព័ន្ធប្រកបដោយគុណភាពនៅកម្ពុជា ជាពិសេស ក្នុងវិស័យទឹក ថាមពល និងភស្តុភារ។
របាយការណ៍ពីក្រសួងពាណិជ្ជកម្មបង្ហាញថា នៅឆ្នាំ២០២១ ទំហំពាណិជ្ជកម្មទ្វេភាគីរវាងកម្ពុជា-អូស្រ្តាលី សម្រេចបាន ៣២៤លានដុល្លារ កើនឡើង ៥២ភាគរយ បើធៀបនឹងឆ្នាំ ២០២០ បើទោះបីជាស្ថិតក្នុងវិបត្តិកូវីដ១៩ក៏ដោយ៕
None
