ឧកញ៉ា ស៊ិន ចន្ធី អគ្គនាយកក្រុមហ៊ុន ឡាញហល អ៊ិចប្រេស និងជាអ្នកជំនួញដ៏ល្បីមួយរូបនៅកម្ពុជា កត់សម្គាល់ឃើញថា ការធ្វើពាណិជ្ជកម្មរវាងកម្ពុជា ជាមួយសហរដ្ឋអាម៉េរិក នៅដើមឆ្នាំនេះ នៅតែរក្សាបានកំណើនគួរឱ្យកត់សម្គាល់ ជាពិសេសការនាំចេញរបស់កម្ពុជា ទៅកាន់ទីផ្សារអាម៉េរិក តែម្តង។ កំណើននាំចេញរបស់កម្ពុជានេះ ត្រូវបានអ្នកជំនាញរូបនេះវាយតម្លៃថា អាចដោយសារបណ្ដាក្រុមហ៊ុន អាម៉េរិក បង្កើនការបញ្ជាទិញផលិតផលដើម្បីស្តុកទុក ក្រោយបារម្ភពីគោលនយោបាយដំឡើងពន្ធរបស់លោក ដូណាល់ ត្រាំ ធ្វើឱ្យប៉ះពាល់ដល់ការនាំចូល និងជំរុញឱ្យតម្លៃទំនិញកើនឡើង។
ជាមួយគ្នានេះ លោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានចាត់ទុកកំណើននាំចេញផលិតផលរបស់កម្ពុជា ទៅកាន់ទីផ្សារសហរដ្ឋអាម៉េរិក បានសបញ្ជាក់ពីសារសំខាន់នៃទំនិញកម្ពុជា សម្រាប់សហរដ្ឋអាម៉េរិក ហើយវាក៏បានបង្ហាញផងដែរថា សហរដ្ឋអាម៉េរិក ពុំទាន់មានការគិតគូរ ឬមានការដំឡើងពន្ធគយណាមួយមកលើកម្ពុជា នោះទេ។ សម្រាប់លោកបណ្ឌិត ហុង វណ្ណៈ កំណើននាំចេញរបស់កម្ពុជា ទំនងជាមិនពាក់ព័ន្ធនឹងគោលនយោបាយដំឡើងពន្ធរបស់លោក ត្រាំ លើប្រទេសផ្សេងៗនោះទេ ហើយបើអាម៉េរិក ចង់ដាក់ពន្ធលើកម្ពុជា ក៏ដូចជាប្រទេសតូចៗផ្សេងទៀត ក៏មិនពិបាកនោះដែរ។
សូមបញ្ជាក់ថា ការធ្វើពាណិជ្ជកម្មទ្វេភាគីរវាងកម្ពុជា ជាមួយអាម៉េរិក នៅរយៈពេល២ខែដើមឆ្នាំ២០២៥ នេះ មានទំហំ១,៦៧៥លានដុល្លារ កើនឡើងជាង២៥% បើធៀបនឹងរយៈពេលដូចគ្នាកាលពីឆ្នាំ២០២៤ ក្នុងនោះកម្ពុជា នាំចេញទៅសហរដ្ឋអាម៉េរិក មានទំហំជាង១,៦២៦លានដុល្លារ ខណៈការនាំចូលមកវិញមានតែជាង៤៨លានដុល្លារតែប៉ុណ្ណោះ៕
អត្ថបទ៖ បូ ដូឡា
