កម្ពុជាចាក់វ៉ាក់សាំងដល់ប្រជាជនបានជាង១០% នៃប្រជាជនសរុបហើយ ទោះបីករណីឆ្លងនៅបន្ដមានខ្ពស់

តួលេខអ្នកជំងឺកូវីដ-១៩ នៅកម្ពុជានៅតែមានកំណើនខ្ពស់ ក្នុងរយៈពេលប៉ុន្មានថ្ងៃចុងក្រោយនេះ ប៉ុន្ដែ ​រាជរដ្ឋាភិបាល​​បាន​​មានការបន្ធូរបន្ថយ​ការបិទខ្ទប់​ជាងមុន លើកលែងតែ​តំបន់មានការផ្ទុះឆ្លងខ្លាំង គឺនៅបន្ដបិទខ្ទប់តឹងរឹងដដែល។ ជាក់ស្តែង តួលេខ កាលពីថ្ងៃទី ៩ ឧសភា ម្សិលមិញនេះ កម្ពុជារកឃើញអ្នក​ឆ្លងថ្មី​ចំនួន ៥២០នាក់ ដែលធ្វើឲ្យចំនួនអ្នកឆ្លងកូវីដសរុបនៅកម្ពុជាកើនឡើងដល់ជិត​២ម៉ឺននាក់។

យើងសង្កេតឃើញថា ចំនួនអ្នកឆ្លងកូវីដ-១៩ នៅកម្ពុជាបានកើនឡើងយ៉ាងគំហុក បន្ទាប់ពីកម្ពុជាទទួល​រងនូវការឆ្លងជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ដែលបានអូសបន្លាយអស់រយៈពេលជាង​ពីរ​ខែកន្លងមក។ ក្នុងរយៈពេលជាងពីរខែនេះ​កម្ពុជាមានអ្នកឆ្លងកូវីដ-១៩ រហូតដល់ជាង១ម៉ឺន៨ពាន់នា​ក់​ឯណោះ។

ទន្ទឹមនឹងនេះ អ្នកស្លាប់ដោយសារជំងឺកូវីដ-១៩ នៅកម្ពុជាបានកើនឡើងដល់១២០នាក់ ខណៈអ្នក​ជំងឺ​ជាង១ម៉ឺន១ពាន់នាក់កំពុងសម្រាកព្យាបាល និងជាង៧ពាន់៦នាក់បានព្យាបាលជាសះស្បើយ។    

ទន្ទឹមនឹងដាក់ចេញវិធានការការពារ និងទប់ស្កាត់ការឆ្លងរាលដាលនៃជំងឺកូវីដ-១៩ រាជរដ្ឋាភិបាល​កម្ពុជា​កំពុង​មមាញឹកជាមួយយុទ្ធនាការចាក់វ៉ាក់សាំងកូវីដ-១៩ ជូនពលរដ្ឋដែលកំពុងរស់នៅ និងស្នាក់នៅ​ក្នុង​តំបន់ ដែលប្រឈមខ្ពស់ក្នុងការចម្លង និងឆ្លងជំងឺកូវីដ-១៩។

ជាក់ស្តែង គិតត្រឹមថ្ងៃម្សិលមិញ កម្ពុជាមានអ្នកចាក់វ៉ាក់សាំងកូវីដ-១៩ សរុបជាង ១លាន៧១ម៉ឺន​នាក់ ក្នុងនោះអ្នកចាក់រួចពីរលើកមានចំនួនជាង១លាន១០ម៉ឺននាក់។ ដោយឡែកយុទ្ធនាការចាក់វ៉ាក់​សាំងជូនពលរដ្ឋរស់នៅតំបន់ក្រហមសម្រេចបានជាង ៥ម៉ឺន១នាក់។ បើគិតមកទល់ពេលនេះ កម្ពុជាមានវ៉ាក់សាំងកូវីដ-១៩ សរុបជាង៣លានដូសហើយ៕