តាមការរាយការណ៍របស់ភ្នាក់ងារព័ត៌មានវៀតណាមបានឲ្យដឹងថា លោក រ៉ប ចូឌិន យកប្រតិបត្តិក្រុមហ៊ុន SunRice ដែលជាក្រុមហ៊ុនផ្គត់ផ្គង់អង្ករធំជាងគេបំផុតរបស់អូស្ត្រាលី បានប្រកាសនាពេលថ្មីៗនេះថា ប្រទេសអូស្ត្រាលី កំពុងរងការខ្វះខាតយ៉ាងច្រើន នៃការផ្គត់ផ្គង់អង្ករក្នុងស្រុក ដែលតម្រូវឲ្យប្រទេសនេះ ត្រូវការនាំចូលអង្ករបន្ថែមទៀតពីក្រៅប្រទេស ពិសេសពីប្រទេសវៀតណាម ហើយខាងភាគីកម្ពុជាវិញក៏កំពុងស្រវាចាប់យកឱកាសនេះដូចគ្នាដែរ។
តាមប្រភពព័ត៌មានបានឲ្យដឹងថា បញ្ហាដែលធ្វើឲ្យអូស្ត្រាលី មានការខ្វះខាតខ្លាំងនៃការផ្គត់ផ្គង់អង្ករក្នុងស្រុកនេះ គឺដោយសារតែកំណើនសេដ្ឋកិច្ចមានការធ្លាក់ចុះនៅក្នុងពេលមានវិបត្តិកូវីដ-១៩ និងរួមផ្សំដោយផលប៉ះពាល់នៃ ការប្រែប្រួលអាកាសធាតុ បានធ្វើឲ្យប៉ះពាល់ដល់ការផលិតនៅក្នុងស្រុក។
អត្ថបទទាក់ទង
អូស្ត្រាលីមានតម្រូវការអង្ករប្រចាំឆ្នាំ ប្រហែល ៣០ម៉ឺនតោន ហើយក្នុងនោះ មានប្រហែលពាក់កណ្ដាលគឺជាការនាំចូល ដែលមានជាមធ្យមប្រមាណ ជាង១៧ម៉ឺនតោន នៅឆ្នាំ២០១៨-២០១៩។ ការនាំចូលអង្ករភាគច្រើនរបស់អូស្ត្រាលី គឺជាប្រភេទអង្ករគ្រាប់វែង ផលិតផលនៅប្រទេសដូចជាវៀតណាម ថៃ ប៉ាគីស្ថាន និងឥណ្ឌា ហើយនៅរយៈចុងក្រោយនេះ កម្ពុជាយើងក៏មានសន្ទុះការនាំចេញអង្ករទៅអូស្ត្រាលីកើនឡើងដែរ។
បើតាមការអះអាងរបស់លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានលើកឡើងថា ទីផ្សារអូស្ត្រាលី នៅប៉ុន្មានឆ្នាំចុងក្រោយនេះ មានកំណើនគួរឲ្យកត់សម្គាល់។ តួយ៉ាង នៅ៩ខែ ដំបូងឆ្នាំ២០២០នេះ ការនាំចេញអង្ករទៅអូស្ត្រាលី កើនដល់ ទៅ ៦២% ធៀបនឹងរយៈពេលដូចគ្នាកាលពីឆ្នាំមុន។ យ៉ាងណាមិញ លោកថា នៅពេលដែលអូស្ត្រាលីជួបបញ្ហាកង្វះខាតអង្ករបែបនេះ វាក៏ជាឱកាសថ្មីមួយទៀតដែរ សម្រាប់កម្ពុជាក្នុងការនាំចេញអង្ករទៅកាន់ប្រទេសមួយនេះ។
លោក លន់ យ៉េង បន្ថែមទៀតថា រដ្ឋាភិបាលអូស្ត្រាលី ក៏មានការជួយគាំទ្រដល់វិស័យកសិកម្មរបស់កម្ពុជាគួរឲ្យកត់សម្គាល់ដែរនៅមួយរយៈចុងក្រោយនេះ។ ហើយអ្វីដែលគួរឲ្យចាប់អារម្មណ៍ ថ្មីៗនេះ ក៏មានក្រុមហ៊ុនផ្គត់ផ្គង់អង្ករធំមួយរបស់អូស្ត្រាលី ក៏បានមកចាប់ដៃគ្នាជាមួយនឹងក្រុមហ៊ុនក្នុងស្រុក Amru Rice ដើម្បីដាំដុះស្រូវសរីរាង្គសម្រាប់ការនាំចេញផងដែរ។ អគ្គលេខាធិការសហព័ន្ធស្រូវអង្ករកម្ពុជា សង្កត់ធ្ងន់ទៀតថា ទីផ្សារអូស្ត្រាលី សម្រាប់កម្ពុជា គឺនៅជាចំណុចចាប់ផ្ដើមនៅឡើយ ប៉ុន្ដែ អ្វីដែលគួរឲ្យកត់សម្គាល់នោះ គឺយើងបានជោគជ័យមួយកម្រិតហើយនៅដំណាក់កាលដំបូងនេះ ដើមឈានទៅរកកំណើននាំចេញកាន់តែខ្ពស់នៅពេលអនាគត។
តាមការព្យាកររបស់ស្ថាប័នជំនាញ ដោយសារតែមូលដ្ឋានផ្លាស់ប្តូរនៃតម្រូវការទឹក និងផលចំណូលត្រឡប់មកវិញទាបសម្រាប់ផលិតកម្មស្រូវ នោះមានន័យថា អូស្ត្រាលី នឹងដោះដុះស្រូវកាន់តែតិច ហើយផ្លាស់ប្តូរមកដាំដំណាំកបាសវិញដែលអាចទាញប្រយោជន៍ពីការអភិវឌ្ឍបច្ចេកវិទ្យា និងទទួលបានអត្ថប្រយោជន៍ភាគច្រើនពីជម្លោះពាណិជ្ជកម្មរវវាងអាមេរិក និងចិន។
ស្ថាបនិក និងជានាយកគ្រប់គ្រងក្រុមហ៊ុនកសិ-ពាណិជ្ជកម្ម Lefarm របស់វៀតណាម គឺលោក ង្វៀន លី បានលើកឡើងថា ចំពោះនិន្នាការទីផ្សារអង្កររបស់អូស្តាលី វាគឺជាចលនាធម្មជាតិមួយ ដែលឆ្ពោះទៅរកការនាំចូលជំនួសឲ្យការផលិតក្នុងស្រុក។ សំណួរ គឺថា តើអូស្ត្រាលី នឹងផ្ដោតតែលើការនាំចូលពីវៀតណាម ឬក៏មានការសហការសម្រាប់យុទ្ធសាស្ត្រារយៈពេលវែង ប្រកបដោយចីរភាព ដើម្បីចែករំលែក និងសហអភិវឌ្ឍ ជាមួយវៀតណាម ដើម្បីគ្រប់គ្រងតម្រូវការ និងការផ្គត់ផ្គង់ឲ្យាន់កាន់តែប្រសើរ ឬក៏យ៉ាងណា?
សូមបញ្ជាក់ថា ប្រទេសវៀតណាម រំពឹងថានឹងអាចនាំចេញអង្ករទៅក្រៅប្រទេសសរុប កើនឡើងដល់ ជាង៦លានតោននៅឆ្នាំ២០២០នេះនិងអាចកើនដល់ ជិត៨លានតោននៅឆ្នាំ២០២៣ -២០២៤ខាងមុខ។ ការរំពឹងទុកសន្ទុះកើនឡើងការនាំចេញអង្កររបស់វៀតណាមនេះ គឺដោយសារតែតម្លៃអង្ករវៀតណាមមានភាពប្រកួតប្រជែងធៀបនឹងប្រទេសនៅក្នុងតំបន់ ដូចជាថៃ ខណៈរដ្ឋាភិបាលវៀតណាម ក៏មានការបង្កើនការផលិតប្រភេទពូជស្រូវកូនកាត់ ឲ្យបានដល់ ៥០% ដើម្បីជំរុញផលិតកម្ម និងសមត្ថភាពនាំចេញនាពេលអនាគត៕
None
