ក្រុមហ៊ុន WorldBridge Group របស់អ្នកឧកញ៉ា សៀ ឫទ្ធី នៅថ្ងៃទី ២០ ខែមិថុនា បានសម្រេចបើកសម្ពោធជាផ្លូវការនូវធនាគារ Bridge បន្ទាប់ពីធនាគារពាណិជ្ជមួយនេះនេះ បានទទួលអាជ្ញាបណ្ណពីធនាគារជាតិនៃកម្ពុជាកាលពីដើមឆ្នាំ២០២២។
ធនាគារ Bridge ត្រូវបានកម្លាយខ្លួនមកពីធនាគារឯកទេស WorldBridge Specialize Bank Plc បន្ទាប់ពីធនាគារឯកទេសមួយនេះ បានចាប់ផ្ដើមប្រតិបត្តិការតាំងពីឆ្នាំ២០១៤ ក្រោមការវិនិយោគទុនដោយក្រុមហ៊ុនសិង្ហបុរី Oxley Holdings និងក្រុមហ៊ុនក្នុងស្រុក WorldBridge Group។
ធនាគារ Bridge មានគោលបំណងផ្ដល់ជូននូវផលិតផល និងដំណោះស្រាយផ្នែកសេវាធនាគារសម្រាប់បម្រើដល់សេចក្ដីត្រូវការរបស់អតិថិជន រួមទាំង សេវាធនាគារផ្ទាល់ខ្លួន ធនាគារអាជីវកម្ម ធនាគារឈានមុខគេ និងអភិវឌ្ឍខ្លួនឲ្យក្លាយទៅជាធនាគារ ឌីជីថលនៅពេលអនាគតផងដែរ។
បើតាមរបាយការណ៍របស់ធនាគារជាតិនៃកម្ពុជា គិតត្រឹមចុងឆ្នាំ២០២២ ប្រព័ន្ធធនាគារនៅកម្ពុជា មានធនាគារពាណិជ្ជសរុបចំនួន ៥៩ធនាគារ, ធនាគារឯកទេសមានចំនួន ៩គ្រឹះស្ថាន, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជនចំនួន ៥គ្រឹះស្ថាន, គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើមានចំនួន ៨២គ្រឹះស្ថាន និងគ្រឹះស្ថានឥណទានជនបទមាន ២២៤ គ្រឹះស្ថាន។ របាយការណ៍ដដែលនេះ បានសង្កត់ធ្ងន់ថា ទ្រព្យសកម្មរបស់ប្រព័ន្ធធនាគារ បន្ដមានកំណើន១៤,៥% ដល់ ប្មរាណជិត៨០ពាន់លានដុល្លារ ដោយសារតែការកើនឡើងនៃចំនួនគ្រឹះស្ថានថ្មីៗចំនួន៧ ពោលគឺ គ្រឹះស្ថានធនាគារពាណិជ្ជកើនឡើងចំនួន៤ និងគ្រឹះស្ថានមីក្រូហិរញ្ញវត្ថុកើនចំនួន៣៕
