យោងតាមរបាយការណ៍របស់ក្រសួងពាណិជ្ជកម្មកម្ពុជា ផ្ដល់ឱ្យសារព័ត៌មានខេមបូណូមីសបានបង្ហាញឱ្យដឹងថា ការធ្វើពាណិជ្ជកម្មរបស់កម្ពុជា ជាមួយប្រទេសក្នុងក្របខណ្ឌ RCEP ហាក់មានទំនោរធ្លាក់ចុះបន្តិចនៅក្នុងរយៈពេល១១ខែឆ្នាំនេះ ដោយសម្រេចបានជាង២៦ពាន់លានដុល្លារថយចុះជាង៦% បើធៀបនឹងរយៈពេលដូចគ្នាកាលពីឆ្នាំមុន។ ទោះបីទំហំពាណិជ្ជកម្មជារួមមានការធ្លាក់ចុះក្តី តែបើក្រឡេកទៅមើលការនាំចេញរបស់កម្ពុជាទៅកាន់ប្រទេសសមាជិក RCEP នៅក្នុងរយៈពេលដូចគ្នានេះវិញ ហាក់មានសន្ទុះកើនឡើងគួរឲ្យកត់សម្គាល់ ពោលគឺសម្រេចបានទំហំទឹកប្រាក់ជាង៧ពាន់លានដុល្លារកើនឡើងជាង២៧% បើធៀបនឹងឆ្នាំមុន។ ក្នុងនោះវៀតណាម គឺជាទីផ្សារធំជាងគេសម្រាប់ការនាំចេញរបស់កម្ពុជា ដែលមានទំហំទឹកប្រាក់ប្រមាណជាង២ពាន់៦លានដុល្លារ បន្ទាប់មក គឺទីផ្សារចិនស្ថិតក្នុងចំណាត់ថ្នាក់ទី២មានទំហំជាង១ពាន់៣រយលានដុល្លារ បន្ទាប់មក គឺទីផ្សារជប៉ុនមានទំហំជាង១ពាន់លានដុល្លារ។
អត្ថបទគួរអាន
ជុំវិញកំណើននាំចេញនេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានវាយតម្លៃថា កត្តាដែលធ្វើឱ្យការនាំចេញរបស់កម្ពុជា ទៅកាន់ប្រទេសក្រោមកិច្ចព្រមព្រៀង RCEP នៅតែរក្សាបានកំណើនខ្ពស់នៅ១១ខែឆ្នាំនេះ គឺដោយសារទំនាក់ទំនងរវាងប្រទេសកម្ពុជា ជាមួយប្រទេសទាំងនោះនៅតែរក្សាបានភាពល្អប្រសើរជាមួយគ្នា ខណៈទំនិញកម្ពុជានៅតែមានសក្តានុពល និងគុណភាពខ្ពស់ ដែលអាចឆ្លើយតបទៅតាមតម្រូវការបញ្ជាទិញរបស់ប្រទេសទាំងនោះ ជាពិសេសទំនិញកសិកម្មតែម្តង។ ម្យ៉ាងទៀត ដោយសារបច្ចុប្បន្នតម្លៃស្បៀងអាហារនៅលើសកលលោកមានការកើនឡើងខ្ពស់ដែលធ្វើឱ្យប្រទេសទាំងនោះងាកមករកប្រទេសជាដៃគូក្នុងក្របខណ្ឌ RCEP រួមទាំងកម្ពុជា។
យ៉ាងណាមិញ អ្នកជំនាញរូបនេះ នៅតែមានសុទិដ្ឋិនិយមខ្ពស់ចំពោះការនាំចេញទំនិញរបស់កម្ពុជាទៅកាន់ទីផ្សារក្រោមក្របខណ្ឌ RCEP នេះ ដោយរំពឹងថា នៅឆ្នាំ២០២៤ខាងមុខ ការនាំចេញរបស់កម្ពុជានឹងកាន់តែមានកំណើនខ្ពស់បន្ថែមទៀត ស្របពេលដែលកម្ពុជាបានត្រៀមខ្លួន និងមានកម្លាំងផលិតកម្មគ្រប់គ្រាន់សម្រាប់នាំចេញទំនិញរបស់ខ្លួនទៅកាន់ទីផ្សារ RCEP ជាពិសេសផលិតផលកសិកម្ម និងឧស្សាហកម្មតែម្តង។
គួរបញ្ជាក់ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ មានប្រទេសជាសមាជិកចំនួន១៥រួមមាន ប្រទសសមាជិកអាស៊ានចំនួន១០ បូករួមជាមួយប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ដែលបានក្លាយជាកិច្ចព្រមព្រៀងធំជាងគេបំផុតលើពិភពលោក៕
None
