ឯកឧត្តម កុយ គួង អ្នកនាំពាក្យក្រសួងការបរទេសកម្ពុជា បានលើកឡើងថា ស្ថានទូតកម្ពុជាប្រចាំនៅប្រទេសមីយ៉ាន់ម៉ា បានយកចិត្តទុកដាក់យ៉ាងខ្លាំងដល់ពលរដ្ឋពលខ្មែរ ដែលកំពុងរកស៊ី និងធ្វើការនៅមីយ៉ាន់ម៉ា ក្រោយការបាតុកម្មនៅទីនោះបន្ដឡើងកម្តៅកាន់តែក្តៅគគុក បន្ទាប់ពីក្រុមបាតុករបានឈានដល់ការដុតរោងចក្រ និងអាជីវកម្មមួយចំនួនរបស់ចិន។ អ្នកនាំពាក្យក្រសួងការបរទេសបានគូសបញ្ជាក់ទៀតថា ស្ថានទូតកម្ពុជាបានទាក់ទងជាប្រចាំជាមួយសមាគមខ្មែរនៅទីក្រុងរ៉ង់ហ្គូន ដើម្បីសួរនាំពីស្ថានភាពរបស់ពលរដ្ឋខ្មែរ។
អ្នកនាំពាក្យក្រសួងការបរទេសកម្ពុជា ឯកឧត្តម កុយ គួង បានអះអាងដែរថា មកទល់ពេលនេះ ពុំទាន់មានអ្នករកស៊ី វិនិយោគិន បុគ្គលិក ឬពលករខ្មែរណាម្នាក់រងផលប៉ះពាល់ពីការបាតុកម្មនេះនោះទេ។ ព្រោះពលរដ្ឋខ្មែរជាង១ពាន់នាក់ដែលកំពុងស្នាក់នៅនិងធ្វើការនៅមីយ៉ាន់ម៉ាភាគច្រើនធ្វើការនៅរោងចក្រ សហគ្រាស និងឧស្សាហកម្មនៅតាមបណ្តោយព្រំដែនមីយ៉ាន់ម៉ា និងថៃ។
អត្ថបទទាក់ទង
ជាមួយគ្នានេះ លោក បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ដែលមានក្រុមហ៊ុនបុត្រសម្ព័ន្ធកំពុងប្រតិបត្តិការអាជីវកម្មមីក្រូហិរញ្ញវត្ថុនៅប្រទេសមីយ៉ាន់ម៉ាដែរនោះ បានបញ្ជាក់ប្រាប់ខេមបូណូមីសថា ដំណើរការអាជីវកម្មរបស់មីក្រូហិរញ្ញវត្ថុអេស៊ីលីដានៅទីនោះ នៅតែបើកដំណើរការដោយគ្មានផលរំខានអ្វីនោះទេ។
សូមបញ្ជាក់ថា គិតមកដល់ពេលនេះចលនាបាតុកម្មប្រឆាំងអំពើរដ្ឋប្រហាររបស់ពលរដ្ឋមីយ៉ាន់ម៉ាបានអូសបន្លាយពេលជាង១ខែមកហើយ និងបានធ្វើឲ្យបាត់បង់ជីវិតមនុស្សជាង១០០នាក់ផងដែរ។ អ្វីដែលគួរឲ្យចាប់អារម្មណ៍នាពេលចុងក្រោយនេះ ក្រុមបាតុករចាប់ផ្ដើមផ្ទុះកំហឹងខ្លាំងជាមួយនឹងប្រទេសចិន ដោយពួកគេយល់ថាចិននៅពីក្រោយការជួយក្រុមយោធាភូមា។ កំហឹងបាតុករបានធ្វើឲ្យមានការដុតរោងចក្ររបស់ចិនជាច្រើនកន្លែងនៅភូមា ហើយបើតាមការរាយការណ៍ ទំហំខូតខាតនេះ អាចមានតម្លៃគិតជាទឹកប្រាក់ប្រមាណ ៣២លានដុល្លារអាមេរិក៕
None
