អគារពាណិជ្ជកម្ម កាណាឌីយ៉ា ដែលវិនិយោគដោយ ធនាគារ កាណាឌីយ៉ា។
អានអត្ថបទជាភាសាអង់គ្លេស | Read article in English here >>
លោក Raymond Sia នាយកប្រតិបត្តិធនាគារកាណាឌីយ៉ា បានប្រាប់អ្នកសារព័ត៌មាននៅឯសន្និសីទធនាគារអាស៊ាន ដូច្នេះថា ”ក្នុងនាមជាធនាគារ យើងពិតជាមើលឃើញកំណើនទ្វេដង ទាំងប្រាក់កម្ចី និងទាំងប្រាក់បញ្ញើ សម្រាប់ប៉ុន្មានឆ្នាំខាងមុខ ហើយនោះគឺជាអ្វីដែលយើងកំពុងធ្វើការយ៉ាងជិតស្និទ្ធជាមួយគ្នាជាមួយសហការីរបស់ខ្ញុំ ដើម្បីធានាថា កំណើននៅតែបន្ត។”
លោក Raymond Sia បាននិយាយបន្តថា ធនាគារកាណាឌីយ៉ាផ្តល់ហិរញ្ញវត្ថុដល់គ្រប់វិស័យ ក៏ប៉ុន្តែនឹងផ្តោតការផ្តល់ប្រាក់កម្ចីដល់ម្ចាស់អាជីវកម្មជាស្ត្រីនិងសហគ្រាសធុនតូចនិងមធ្យម នាពេលខាងមុខ។
អត្ថបទទាក់ទង
លោក Raymond Sia បាននិយាយដូច្នេះថា “នេះគឺជាការផ្តោតសំខាន់របស់ធនាគារសម្រាប់រយៈពេល ៣ឆ្នាំខាងមុខ ដើម្បីធ្វើឱ្យសហគ្រាសធុនតូចនិងមធ្យមរបស់យើង រីកចម្រើន ដើម្បីធានា ថាយើងផ្តល់លទ្ធភាពហិរញ្ញវត្ថុដល់សហគ្រាសធុនតូច និងមធ្យម ពីព្រោះ សព្វថ្ងៃនេះ ខ្ញុំគិតថា ក្រុមហ៊ុនសហគ្រាសធុនតូចនិងមធ្យមជាច្រើន មិនមានលទ្ធភាពទទួលបានហិរញ្ញប្បទានត្រឹមត្រូវនោះទេ។”
លោក Raymond Sia បាននិយាយថា ធនាគារកាណាឌីយ៉ាកំពុងធ្វើការយ៉ាងជិតស្និទ្ធជាមួយវិស័យសហគ្រាសធុនតូចនិងមធ្យម និងសមាគមសហគ្រិនស្ត្រីកម្ពុជា ដើម្បីផ្តល់លទ្ធភាពដល់ពួកគាត់។
នៅពេលដែលអ្នកសារព័ត៌មានបានសួរថា ហេតុអ្វីបានជាលោកមានការព្យាករវិជ្ជមានខ្លាំងបែបនេះ ខណៈដែលសហគមន៍អឺរ៉ុបព្រមានព្យួរប្រព័ន្ធអនុគ្រោះពន្ធ EBA លោក Raymond Sia បានឆ្លើយថា ”យើងនៅតែមានសុទិដ្ឋិនិយមដោយប្រយ័ត្នប្រយែង។ យើងប្រាកដជាមានសុទិដ្ឋិនិយមដូចអ្វីដែលខ្ញុំលើកឡើងពីមុន ដោយសារគោលនយោបាយគាំទ្រអាជីវកម្ម ដែលរដ្ឋាភិបាលបានដាក់ចេញ បទប្បញ្ញត្តិដែលបានដាក់ចេញ ដូច្នេះ យើងប្រាកដជាមានសុទិដ្ឋិនិយមយ៉ាងប្រុងប្រយ័ត្ន ថា សេដ្ឋកិច្ចកម្ពុជានឹងបន្តរីកចម្រើន”៕
None
