លោក ទូច ថារិទ្ធិ អ្នកនាំពាក្យសាលាឧទ្ធរណ៍ បាននិយាយថា ការចោទប្រកាន់ប្រឆាំងនឹងអ្នកទាំង៦រូបនេះ ត្រូវបានទម្លាក់ចោលហើយ។
លោក ទូច ថារិទ្ធិ បាននិយាយដូច្នេះថា ៖ «ក្រុមប្រឹក្សាចៅក្រមសាលាឧទ្ធរណ៍ កាលពីម្សិលមិញ បានលើកលែងការចោទប្រកាន់ហើយ ដល់មេសហជីពទាំង៦នាក់នេះ។»
មេដឹកនាំសហជីពទាំង៦រូបនោះ រួមមាន លោក ប៉ាវ ស៊ីណា លោក អាត់ ធន់ អ្នកស្រី ម៉ម ញឹម លោក ជា មុន្នី អ្នកស្រី យ៉ាង សោភ័ណ និងលោក រ៉ុង ឈុន។
កាលពីឆ្នាំ២០១៨ សាលាដំបូងរាជធានីភ្នំពេញ បានបើកសវនាការជំនំជម្រះលើសំណុំរឿងមេដឹកនាំសហជីពចំនួន៦រូបនេះ ក្រោមបទចោទប្រកាន់ថា បង្កហិង្សាដោយចេតនា ធ្វើឲ្យខូចខាតដោយចេតនា បទគំរាមកំហែង និង បទប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ នៅចំណុចមុខសួនឧស្សាហកម្មកាណាឌីយ៉ា ផ្លូវវេងស្រេង កាលពីអំឡុងឆ្នាំ២០១៣ និងឆ្នាំ២០១៤។
តើបានអានអត្ថបទនេះ ឬនៅ?
នៅពេលនោះ មេដឹកនាំសហជីពទាំង៦រូបនេះ ត្រូវបានតុលាការក្រុងភ្នំពេញផ្តន្ទាទោសដែលមានលក្ខណៈព្យួរដែលមានរយៈពេលចន្លោះពី ៨ខែ ដល់ ៤ឆ្នាំកន្លះ។
នៅថ្ងៃពុធនេះ មេដឹកនាំសហជីពមួយចំនួនបានសម្ដែងការរីករាយជាមួយនឹងការសម្រេចរបស់សាលាឧទ្ធរណ៍។
លោក ប៉ាវ ស៊ីណា ប្រធានសហភាពចលនាកម្មករកម្ពុជា បាននិយាយថា នេះជារឿង«រីករាយបំផុត»សម្រាប់រូបគាត់និងតំណាងសហជីពផ្សេងទៀត ហើយបានថ្លែងអរគុណដល់ថ្នាក់ដឹកនាំដែលបានអន្តរាគមន៍ និងគ្រប់ភាគីពាក់ព័ន្ធ ដែលធ្វើឲ្យសំណុំរឿងនេះមានដំណើរការលឿន។
លោក ប៉ាវ ស៊ីណា បាននិយាយបន្តថា ៖ «អ្វីដែលសំខាន់ គឺពួកយើងមិនបានប្រព្រឹត្តដូចការចោទប្រកាន់ទេ។»
សម្តេចនាយករដ្ឋមន្រ្តី ហ៊ុន សែន កាលពីឆ្នាំមុន បានស្នើឱ្យអាជ្ញាធរពន្លឿននីតិវិធី ឬទម្លាក់រឿងក្ដី លើមេដឹកនាំសហជីពដែលមានរយ:ពេលវែង។
កាលពីឆ្នាំមុនផងដែរ តំណាងមកពីក្រុមហ៊ុនសម្លៀកបំពាក់និងស្បែកជើង រួមមាន Adidas, Nike និង Puma ក៏បានជំរុញឱ្យរដ្ឋាភិបាលទម្លាក់បទចោទប្រកាន់ផងដែរ មកលើមេសហជីព៕
