កម្ពុជានឹងប្រើប្រាស់កម្ចី ៧,៦៤លានដុល្លារអាមេរិក ដែលផ្ដល់ដោយធនាគារអភិវឌ្ឍន៍អាស៊ី (ADB) ដើម្បីធ្វើឲ្យប្រភពផ្គត់ផ្គង់ថាមពលឲ្យកាន់តែសម្បូរបែបថែមទៀត ដោយកសាងឧទ្យានថាមពលពន្លឺព្រះអាទិត្យ (សូឡា) ដែលមានសមត្ថភាព ១០០មេហ្គាវ៉ាត់ នៅខេត្តកំពង់ឆ្នាំង។ នេះបើយោងតាមការចុះផ្សាយរបស់ Smart Energyកាលពីថ្ងៃទី២៨ ឧសភា ឆ្នាំ២០១៩។
ឧទ្យានថាមពលពន្លឺព្រះអាទិត្យ ឬឧទ្យានសូឡានេះ នឹងស្ថាបនាឡើងជាផ្នែកមួយនៃគម្រោងឧទ្យានសូឡាជាតិ ដែលទទួលបានកម្ចី ១១លានដុល្លារអាមេរិក ពីធនាគារអភិវឌ្ឍន៍អាស៊ី និងជំនួយឥតសំណង ៣លានដុល្លារអាមេរិក ពីមូលនិធិអាកាសធាតុយុទ្ធសាស្ត្រ (Strategic Climate Fund)។
មូលនិធិភាពជាដៃគូចំណេះដឹង និង e-Asia របស់ប្រទេសកូរ៉េខាងត្បូង នឹងផ្ដល់ជំនួយឥតសំណងផ្នែកបច្ចេកទេស ៥សែនដុល្លារអាមេរិក ដើម្បីជួយ អគ្គិសនីកម្ពុជា (EDC) និងអាជ្ញាធរអគ្គិសនីកម្ពុជា ដើម្បីអភិវឌ្ឍសមត្ថភាពសូឡារបស់ខ្លួន ។
តើបានអានអត្ថបទនេះ ឬនៅ?
ប្រទេសកម្ពុជាក៏នឹងប្រើប្រាស់ជំនួយឥតសំណងពីប្រទេសកាណាដា និងសិង្ហបុរី ដើម្បីពង្រីកសមត្ថភាពថាមពលពន្លឺព្រះអាទិត្យរបស់ខ្លួន។ គិតមកទល់បច្ចប្បន្ន ប្រទេសកម្ពុជាទើបតែមានថាមពលពន្លឺព្រះអាទិត្យ តែ ១០មេហ្គាវ៉ាត់ ប៉ុណ្ណោះ បើទោះបីជាប្រទេសនេះសម្បូរពន្លឺព្រះអាទិត្យក៏ដោយ។ ប្រទេសនេះមានសក្ដានុពលធ្វើសមាហរណកម្មថាមពលពន្លឺព្រះអាទិត្យ ២០០មេហ្គាវ៉ាត់ ទៅក្នុងបណ្ដាញផ្គត់ផ្គង់អគ្គិសនីជាតិ នៅឆ្នាំ២០២១។
លោក Pradeep Tharakan អ្នកជំនាញផ្នែកការប្រែប្រួលអាកាសធាតុរបស់ធនាគារ អភិវឌ្ឍន៍អាស៊ី មានប្រសាសន៍ថា ៖ «ការមានប្រភពថាមពលដែលធូរថ្លៃ អាចជឿជាក់បាន និងមាននិរន្តរភាព គឺសំខាន់ណាស់សម្រាប់ការអភិវឌ្ឍសេដ្ឋកិច្ច នៅក្នុងប្រទេសដែលសេដ្ឋកិច្ចលូតលាស់លឿន ដូច កម្ពុជា»។
អ្នកជំនាញដដែល និយាយបន្តទៀតថា ៖ «ជំនួយរបស់ធនាគារ ADB មិនត្រឹមតែជួយដល់ការធ្វើពិពិធកម្មប្រភពថាមពលរបស់កម្ពុជា តាមរយៈការអភិវឌ្ឍថាមពលពន្លឺព្រះអាទិត្យប៉ុណ្ណោះនោះទេ ប៉ុន្តែ ក៏នឹងជួយកម្ពុជា សម្រេចគោលដៅកាត់បន្ថយការបញ្ចេញឧស្ម័នផ្ទះកញ្ចក់ ស្របទៅតាមកិច្ចព្រមព្រៀងអាកាសធាតុ ក្រុងប៉ារីស ផងដែរ»៕
