លោកស្រី ម៉ាលីកា ប៊ូនមេត្រាកុក ទីប្រឹក្សារដ្ឋមន្ត្រីក្រសួងពាណិជ្ជកម្មថៃបាននិយាយនៅថ្ងៃពុធសប្តាហ៍នេះថា អាជ្ញាធរចិនបានផ្តល់ភ្លើងខៀវដល់ក្រុមហ៊ុនវេចខ្ចប់មៀនចំនួន ៥៦ អាចនាំចេញមៀនទៅទីផ្សារចិនបាន តែក្រុមហ៊ុនទាំងនោះ ត្រូវតែជាក្រុមហ៊ុនដែលមានការត្រួតពិនិត្យអត្រាចំនួនសត្វល្អិតចង្រៃ នៅលើផ្លែមៀនតិចបំផុត។
សូមបព្ជាក់ថា ក្រុមហ៊ុនទាំង ៥៦ ដែលទទួលបានភ្លើងខៀវពីចិនឡើងវិញនេះ គឺស្ថិតនៅក្នុងចំណោមក្រុមហ៊ុនវេចខ្ចប់មៀនចំនួន ៧៥ ក្រុមហ៊ុន ដែលត្រូវបានភាគីចិនហាមឃាត់មិនឱ្យនាំចេញមៀនពីប្រទេសថៃទៅទីផ្សារចិន ក្នុងនេះក្រុមហ៊ុនចំនួន ៩ ត្រូវបានហាមឃាត់ចាប់តាំងពីខែមីនាមកម្ល៉េះ។
ប្រឹក្សារដ្ឋមន្ត្រីក្រសួងពាណិជ្ជកម្មថៃបានបន្តទៀតថា ក្រុមហ៊ុនដែលនៅសេសសល់មិនទាន់បានភ្លើងខៀវពីអាជ្ញាធរចិនទាំងអស់នេះ នៅតែអាចមានក្ដីសង្ឃឹមក្នុងបន្តការនាំចេញមៀនរបស់ពួកគេទៅកាន់ប្រទេសចិននាពេលមុខ ប្រសិនបើពួកគេអាចបង្ហាញថា បានអនុវត្តវិធានការដ៏មានប្រសិទ្ធភាពដើម្បីកំចាត់សត្វល្អិតលើផ្លែមៀនមុននឹងនាំចេញទៅទីផ្សារប្រទេសចិន។
អត្ថបទគួរអាន
សូមជម្រាបថា ការហាមឃាត់នាំចូលផ្លែមៀនពីថៃទៅកាន់ទីផ្សារចិនចុងក្រោយនេះ ត្រូវបានដាក់ចេញកាលពីថ្ងៃសុក្រ ទី១៣ សប្តាហ៍មុនបន្ទាប់ពីត្រូវបានគេរកឃើញថា ផ្លែមៀនដែលនាំចូលពីថៃ មានសត្វល្អិតចង្រៃ នៅលើផ្លែមៀនទាំងអស់នោះ។ យ៉ាងណាមិញ ស្របពេលដែលការនាំចេញផ្លែមៀនរបស់ថៃទៅចិនត្រូវបានហាមឃាត់ វាក៏បានធ្វើឱ្យទីផ្សារមៀនប៉ៃលិនរបស់កម្ពុជាឯណេះវិញក៏កំពុងជួបបញ្ហាដែរ ពោលគឺថៃបានផ្អាកការនាំចូលផ្លែមៀនប៉ៃលិនពីកម្ពុជាខណៈដែលប្រទេសថៃ គឺជាជាទីផ្សារធំស្ទើរតែទាំងស្រុងសម្រាប់ផ្លែមៀនប៉ៃលិនរបស់កម្ពុជា។
យើងនឹងរង់ចាំមើលថា តើក្រោយពីទទួលបានភ្លើងខៀវនាំចេញមៀនទៅកាន់ទីផ្សារចិនឡើងវិញ ថាតើប្រទេសថៃអាចនឹងបើកឲ្យកម្ពុជានាំចេញផ្លែមៀនទៅកាន់ទីផ្សារថៃឡើងវិញដែរ ឬក៏យ៉ាងណា?
អត្ថបទ៖ ស៊ើង និមល់
None
