អគ្គនាយកនៃនាយកដ្ឋានចរចាពាណិជ្ជកម្មថៃ លោកស្រី អារ៉ាមុន ស៊ុបថាវីធំ បាននិយាយថា ការនាំចេញទុរេនរបស់ថៃ ទៅកាន់ទីផ្សារចិននៅត្រីមាសទី១នៃឆ្នាំនេះ សម្រេចបានក្នុងទំហំទឹកប្រាក់ជិត២០០លានដុល្លារអាមេរិក កើនឡើង១៤% តាមពីក្រោយដោយទីផ្សារទីក្រុងហុងកុង មាន១៤លានដុល្លារ និងវៀតណាមមាន១០លានដុល្លារ។
កាលពីឆ្នាំ២០២០ ការនាំចេញទុរេនកាន់ទីផ្សារចិនសម្រេចបានជាង ១ពាន់៥រយលានដុល្លារ កើនឡើង៧៨% ធៀបនឹងឆ្នាំ២០១៩។
អគ្គនាយកនៃនាយកដ្ឋានចរចាពាណិជ្ជកម្មថៃ បានលើកឡើងទៀតថា កិច្ចព្រមព្រៀងពាណិជ្ជកម្មសេរី ដែលប្រទេសថៃបានធ្វើជាមួយបណ្ដាប្រទេសមួយចំនួន បានជួយដល់ប្រទេសថៃក្នុងការទាញ ប្រយោជន៍បានច្រើន សម្រាប់ការនាំចេញទៅកាន់ទីផ្សារអន្តរជាតិ។ ក្រៅតែពី ប្រទេសសមាជិកអាស៊ានចំនួន៩ ពន្ធលើការនាំចូលទុរេនថៃ ក៏ត្រូវបានលើកលែងនៅក្នុងទីផ្សារចិន ហុងកុង អូស្ត្រាលី ញ៉ូវហ្សេឡែន ជប៉ុន ឥណ្ឌា ឈីលី និងប៉េរូជាដើម។
អត្ថបទទាក់ទង!
ជាមួយគ្នានេះ តាមរយៈកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ឬហៅថា RCEP ប្រទេសថៃ ក៏អាចនឹងស្នើឲ្យកូរ៉េខាងត្បូងកាត់បន្ថយពន្ធនាំចូលទុរេន រហូតដល់អត្រាពន្ធស្មើសូន្យផងដែរ ខណៈដែលបច្ចុប្បន្ន ការនាំចេញទុរេនថៃ ទៅកូរ៉េខាងត្បូងនេះ មានការដកហូតយកពន្ធ៣៦%។
ក្រៅតែពីផលិតផលផ្លែទុរេននេះ អ្នកជំនាញរំពឹងថា តម្រូវការសម្រាប់ផលិតផលផ្លែឈើកែច្នៃ ដូចជាដំណាប់ផ្លែឈើ ជាដើមនឹងមានការកើនឡើង ដោយសារតែអ្នកប្រើប្រាស់កំពុងជ្រើសរើសអាហារសម្រន់ ដែលអំណោយផលសម្រាប់សុខភាព។
ដូច្នេះ វាគឺជាឱកាសល្អ សម្រាប់កសិករ និងសហគ្រិនថៃ ក្នុងការជំរុញការដាំដុះដំណាំផ្លែឈើ ផលិតកែច្នៃ សម្រាប់ការនាំចេញ។ ទោះយ៉ាងណា ផលិតផលទាំងនោះ ក៏ត្រូវតែអភិវឌ្ឍឡើងស្របតាមស្ដង់ដារអន្តរជាតិផងដែរ ទើបអាចនាំចេញទៅកាន់ទីផ្សារអន្តរជាតិបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
