ចិនមានបន្ទុកដ៏ធំត្រូវទូទាត់បំណុលរដ្ឋបាលមូលដ្ឋានជាង៦៥០ពាន់លានដុល្លារនៅឆ្នាំនេះ

បំណុលរបស់រដ្ឋបាលមូលដ្ឋាន (LGFV) នៃប្រទេសចិន ជាបំណុលដែលក្រុមហ៊ុននានាខ្ចីតាងនាមឱ្យរដ្ឋបាលថ្នាក់ក្រុង និងថ្នាក់ខេត្តតាមរយៈការបោះផ្សាយសញ្ញាប័ណ្ណ ឬមូលបត្របំណុល ដើម្បីផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធសំខាន់ៗដូចជាគម្រោងផ្លូវថ្នល់ និងកំពង់ផែជាដើម។ បំណុលដែលមានទំហំរហូតដល់ទៅជាង៦៥០ពាន់លានដុល្លារអាម៉េរិកនេះ ត្រូវដល់ពេលកំណត់ទូទាត់ក្នុងឆ្នាំ២០២៤ នេះ ដោយវាមានការកើនឡើងប្រមាណ១៣% បើធៀបនឹងឆ្នាំ២០២៣។ នេះបើយោងតាមទិន្នន័យប្រមូលដោយសារព័ត៌មានដ៏ល្បីល្បាញ Bloomberg។

លោកស្រី ជើលីណា ជឹង (Zerlina Zeng) អ្នកវិភាគឥណទានជាន់ខ្ពស់នៅក្រុមហ៊ុនស្រាវជ្រាវហិរញ្ញវត្ថុអន្តរជាតិ ក្រេឌីតសៃ អ៊ីង (Creditsights Inc) បានលើកឡើងថា ការទប់មិនឱ្យរីករាលដាលនូវការខកខានការទូទាត់បំណុល និងហានិភ័យហិរញ្ញវត្ថុជាប្រព័ន្ធ ដែលបង្កឡើងពីវិស័យបំណុលរបស់រដ្ឋបាលមូលដ្ឋាននៅតែជាអាទិភាពកំពូលសម្រាប់រដ្ឋាភិបាលថ្នាក់ជាតិនៅក្នុងឆ្នាំនេះ។

រដ្ឋាភិបាលក្រុងប៉េកាំង បានចាត់វិធានការមួយចំនួនរួចហើយ ដើម្បីសម្រាលបញ្ហាដ៏រ៉ាំរ៉ៃរបស់ប្រទេសចិន ជាមួយនឹងបំណុលរបស់រដ្ឋបាលមូលដ្ឋាននេះ ដែលបានធ្វើឱ្យបណ្ដាវិនិយោគិនមានសុទិដ្ឋិនិយមឡើងវិញ។

កាលពីឆ្នាំ២០២៣ រដ្ឋាភិបាលក្រុងប៉េកាំង បានដាក់ចេញកម្មវិធីគាំទ្រមួយមានតម្លៃ១៤០ពាន់លានដុល្លារអាម៉េរិក ដែលអនុញ្ញាតឱ្យរដ្ឋបាលមូលដ្ឋានដោះដូរបំណុល LGFV មួយចំនួនជាមួយនឹងសញ្ញាប័ណ្ណ ឬមូលបត្របំណុលផ្លូវការ ដែលមានអត្រាការប្រាក់ទាបជាង។ នេះបើតាមការចុះផ្សាយបស់សារព័ត៌មាន Bloomberg News កាលពីខែសីហា កន្លងទៅ។

ហើយជាលទ្ធផលឃើញថា ក្រុមដែលទូទាត់សងបំណុលលឿនមុនពេលកំណត់បានកើនឡើងយ៉ាងឆាប់រហ័ស ក្រោយពីរដ្ឋាភិបាលក្រុងប៉េកាំង បានដាក់ចេញវិធានការខាងលើនេះ ដែលធ្វើឱ្យបណ្ដាវិនិយោគិនធូរស្រាលចិត្ត និងមានសុទិដ្ឋិនិយមឡើងវិញជាបណ្ដោះអាសន្ន៕

ដោយ: តែម សុខុម