លោក ជិន ហៃ មន្ត្រីនៃរដ្ឋបាលគយទូទៅចិន បានមានប្រសាសន៍ថា គិតចាប់ពីដើមខែមីនា មកដល់ខែមេសានេះ ប្រទេសចិន បានធ្វើការនាំចេញ ម៉ាស់ពាក់ការពារប្រមាណ ៣ពាន់ ៨០០លានម៉ាស់, សម្លៀកបំពាក់ការពារ ៣៧លានឈុត, និងឧបករណ៍វ៉ាស់កំដៅជាង ២លានគ្រឿងទៀត ក៏ដូចជាវ៉ែនតា និងឧបករណ៍ធ្វើតេស្តរកមេរោគកូវីដ១៩ផងដែរ។
ជាការឆ្លើយតបទៅនឹង សារព័ត៌មានអន្តរជាតិជាច្រើនដែលលើកឡើងថា ចិន បានបិទការនាំចេញឧបករណ៍វេជ្ជសាស្ត្រនោះ មន្ត្រីក្រសួងពាណិជ្ជកម្មចិន បានបញ្ជាក់ថា ចិន មិនដែលហាមឃាត់ ការនាំចេញគ្រឿងបរិក្ខារពេទ្យ អំឡុងពេលមេរោគកូវីដ១៩ កំពុងផ្ទុះឡើងនោះឡើយ ព្រោះគ្មានហេតុផលណាមួយ ដែលចិន ត្រូវប្រកែកមិនព្រមជួយ បណ្តាប្រទេសដែលកំពុងរងគ្រោះនោះឡើយ។
ផ្ទុយទៅវិញ បច្ចុប្បន្ននេះ ចិន មានរោងចក្រសហគ្រាសផលិតគ្រឿងបរិក្ខារពេទ្យជាង ២ពាន់កន្លែង ហើយចិន តែងតែយកចិត្តទុកដាក់ទៅលើ គុណភាព និងសុវត្ថិភាពនៃ ឧបករណ៍បរិក្ខារពេទ្យសម្រាប់នាំចេញ ដោយក្នុងនោះ គយចិន នឹងអនុវត្តលើការនាំចេញផលិតផល ដែលមាន វិញ្ញាបនបត្រចុះបញ្ជី ទទួលស្គាល់ដោយ រដ្ឋបាលគ្រប់គ្រងលើឧបករណ៍វេជ្ជសាស្ត្រ និងអាចបំពេញទៅតាមស្តង់ដារនៃ បណ្តាប្រទេសគោលដៅនាំចេញ។
អត្ថបទគួរអាន
យ៉ាងណាក៏ដោយ ក្រសួងពាណិជ្ជកម្មចិន ស្នើឲ្យអ្នកបញ្ជាទិញទាំងអស់ គឺទិញទំនិញពី អ្នកផ្គត់ផ្គង់ដែលមានចុះបញ្ជីជាមួយ និយ័តករចិន ដែលបានបញ្ជាក់ពី គុណភាពផលិតផល មុននឹងយកទៅប្រើប្រាស់។
សូមជម្រាបថា មន្ត្រីក្រសួងពាណិជ្ជកម្មចិន ប្រកាសថា ចិន មានឆន្ទៈក្នុងការបំពេញការងារជាមួយ សហគមន៍អន្តរជាតិ ដើម្បីបង្កើតបរិយាកាសអំណោយផលសម្រាប់ការនាំចេញបរិក្ខារពេទ្យ និងគាំទ្រដល់ការប្រយុទ្ធប្រឆាំងនឹង មេរោគកូវីដ១៩៕
None
