ថ្នាក់ដឹកនាំកំពូលរូបនេះ បាននិយាយថា កីឡាអូឡាំពិករដូវរងារនៅទីក្រុងប៉េកាំងឆ្នាំ២០២២ នឹងចាប់បើកការប្រកួតនៅល្ងាចថ្ងៃទី០៤ខែកុម្ភៈ ហើយលោកប្រធានាធិបតីចិន ជឿថា គ្រប់គ្នានឹងកំពុងរង់ចាំតាមដានមកលើប្រទេស ចិន។ លោកស៊ី បានបន្ថែមថា ប្រទេសចិនបានត្រៀមខ្លួនរួចជាស្រេចក្នុងការបង្ហាញការប្រកួតកីឡាអូឡាំពិកប្រកបដោយសុវត្ថិភាព និងដ៏អស្ចារ្យមួយទៅកាន់ពិភពលោក។
ទោះបីមានការអុកឡុកពីមេរោគកូវីដ១៩ និងភាពចម្រូងចម្រាសជាច្រើនរវាងចិន និងប្រទេសលោកខាងលិចនៅមុនការចូលមកដល់នៃកីឡាអូឡាំពិករដូវរងាក៏ពិតមែន ប៉ុន្តែព្រឹត្តិការណ៍កីឡាខាងលើនេះ នឹងត្រូវធ្វើឡើងដោយរលូន និងប្រកបដោយសុវត្ថិភាព។ នេះជាការអះអាងដោយការជឿជាក់ព្រមៗគ្នា ពីថ្នាក់ដឹកនាំក្រុងប៉េកាំង និងអ្នករៀបចំកម្មវិធីអូឡាំងពិក។
ដូចការព្រាងទុកកីឡាអូឡាំពិករដូវរងាឆ្នាំ២០២២ដែលចិនធ្វើជាម្ចាស់ផ្ទះ នឹងចាប់ផ្តើមពីថ្ងៃទី០៤កុម្ភៈដល់ថ្ងៃទី២០កុម្ភៈឆ្នាំ២០២២ ដែលមានការចូលរួមពីអត្តពលិកជិត៣ពាន់នាក់ មកពី៩១ប្រទេស។ ទន្ទឹមនឹងនេះ ទីក្រុងប៉េកាំងកាលពីពេលថ្មីៗនេះ បានបង្ហាញរួចទៅហើយ នូវបញ្ជីឈ្មោះមេដឹកនាំប្រទេស ដែលនឹងមានវត្តមាននៅក្នុងកម្មវិធីបើកសម្ពោធកីឡាអូឡាំពិក។ ដោយសារពហិការការទូតរបស់ប្រទេសលោកខាងលិច នាំមុខដោយអាមេរិក បញ្ជីឈ្មោះមេដឹកនាំប្រទេស ដែលមានវត្តមាននៅទីក្រុងប៉េកាំង មិនសូវច្រើនប៉ុន្មានទេ។
អត្ថបទគួរអាន
នៅក្នុងបញ្ជីនោះគេឃើញមានឈ្មោះមេដឹកនាំប្រទេសមួយចំនួន ដែលកំពុងមានទំនាក់ទំនងល្អក់កករ ជាមួយបស្ចិមលោក តួយ៉ាងដូចជាលោកប្រធានាធិបតីរុស្ស៊ី វ្លាឌីមៀរ ពូទីន ដែលកំពុងតានតឹងខ្លាំងក្នុងសំណុំរឿងអ៊ុយក្រែន។ ក្រៅពីនោះនៅមានប្រទេសដែលជាមិត្ត និងមានទំនាក់ទំនងល្អជាមួយប្រទេសចិនមួយចំនួន ក៏នឹងមានវត្តនៅក្នុងថ្ងៃកម្មវិធីផងដែរ។
សូមជម្រាបថា ត្រូវបាននាំមុខដោយសហរដ្ឋអាមេរិក ប្រទេសលោកខាងលិច បានធ្វើពហិកាការទូត ដោយមិនទៅចូលរួមក្នុងកម្មវិធីបើកសម្ពោធការប្រកួតកីឡាអូឡាំពិក រដូវរងានោះទេ ដើម្បីជាការប្រឆាំងនឹងការរំលោភសិទ្ធិជនជាតិអ៊ុយហ្គួរនៅតំបន់ស៊ីនជាំង។ បន្ថែមពីលើនេះ អាមេរិកបានព្យាយាមស្នើឲ្យ អគ្គលេខាធិការអង្គការសហប្រជាជាតិលោក Antonio Guterres កុំទៅចូលរួមព្រឹត្តិការណ៍អូឡាំពិកផងដែរ ប៉ុន្តែត្រូវបានលោក Guterres បដិសេធ។
សូមបញ្ជាក់ដែរថា សម្រាប់ភាគីកម្ពុជា ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រឹកថ្ងៃទី០៣ ខែកុម្ភៈ ក៏បានយាងទៅកាន់ទីក្រុងប៉េកាំងប្រទេសចិន ដើម្បីយាងចូលរួមពិធីបើកសម្ពោធព្រឹត្តិការណ៍កីឡាអូឡាំពិករដូវរងាឆ្នាំ២០២២នេះផងដែរ៕
None
