មជ្ឈមណ្ឌលគ្រប់គ្រង និងការពារជំងឺរបស់ចិន បាននិយាយថា ប្រទេសចិនមិនអាចលុបចោលការរឹតបន្តឹងការធ្វើដំណើរ ដោយមិនមានការចាក់វ៉ាក់សាំងកូវីដ១៩ ឬការព្យាបាលជាក់លាក់នោះទេ។ បើតាមរបាយការណ៍ខាងលើនេះ ករណីឆ្លងថ្មីប្រចាំថ្ងៃរបស់ប្រទេសចិន អាចនឹងកើនឡើងយ៉ាងហោចណាស់ រាប់ម៉ឺននាក់ក្នុងមួយថ្ងៃ ប្រសិនបើប្រទេសនេះអនុវត្តយុទ្ធសាស្ត្រតាម សហរដ្ឋអាមេរិក និងបណ្ដាប្រទេសអឺរ៉ុបមួយចំនួន ដូចជា អង់គ្លេស និងបារាំងជាដើម។
ការរកឃើញនេះ បានព្រមានយ៉ាងច្បាស់ថា សម្រាប់ពេលនេះ ប្រទេសចិនមិនទាន់ត្រៀមខ្លួនជាស្រេចក្នុងការទទួលយកយុទ្ធសាស្ត្រ បើកចំហរ ដោយផ្អែកតែលើសម្មតិកម្មនៃភាពស៊ាំក្នុងរាងកាយមនុស្សដែលបានចាក់វ៉ាក់សាំង គាំទ្រដោយប្រទេសលោកខាងលិចមួយចំនួននោះទេ។
អត្ថបទគួរអាន
ប្រទេសចិននៅតែបន្តរក្សាគោលនយោបាយ គ្មានកូវីដ១៩ ដោយជឿជាក់ពីសារៈសំខាន់នៃគោលនយោបាយនេះ ក្នុងការទប់ស្កាត់ករណីឆ្លងក្នុងប្រទេស ពោលគឺប្រសើរជាង បណ្ដោយឱ្យមានករណីឆ្លងហើយ ទើបខិតខំតាមដាន និងស្វែងរកអ្នកឆ្លងជំងឺយកមកព្យាបាល។ សូមបញ្ជាក់ដែរថា អាជ្ញាធរសុខាភិបាលរបស់ចិន កាលពីថ្ងៃទី ២៧ វិច្ឆិកា បានកត់ត្រាពីករណីឆ្លងថ្មីចំនួនតែ ២៣ ករណីប៉ុណ្ណោះ ហើយរហូតមកទល់ពេលនេះ ករណីឆ្លងសរុបនៅចិនមានចំនួនត្រឹមតែប្រមាណ ៩ម៉ឺន ៨ពាន់នាក់ និងអ្នកស្លាប់ជាង ៤ពាន់ ៦រយនាក់ប៉ុណ្ណោះ។
មកទល់ពេលនេះប្រទេសចិនមានប្រជាជនជិត៧៧ភាគរយហើយ នៃចំនួនប្រជាជនសរុប ដែលបានចាក់វ៉ាក់សាំងកូវីដ១៩គ្រប់ចំនួនដូស ហើយនិងឈានដល់ការចាក់វ៉ាក់សាំងបាន ៨០% ដើម្បីបង្កើតភាពស៊ាំនៃសហគមន៍នៅចុងឆ្នាំនេះ។
យ៉ាងណាក៏ដោយចុះ អ្នកជំនាញខាងជំងឹផ្លូវដង្ហើមរបស់ចិន ក៏បានព្រមានពីមេរោគបំប្លែងថ្មី អូមីក្រុង ដែលអាចបង្កឱ្យមានបញ្ហាប្រឈមបន្ថែមទៀតដល់ការចាក់វ៉ាក់សាំង និងគ្រប់គ្រងជំងឺរាតត្បាតកូវីដ ១៩៕
អត្ថបទ ស៊ើង និមល់
None
