ក្រុមហ៊ុន China Telecom Americas ដែលជាបុត្រសម្ព័ន្ធរបស់ក្រុមហ៊ុនចិន China Telecom Corp Ltd កាលពីថ្ងៃទី២៦តុលា ត្រូវបានគណៈកម្មការទូរគមនាគមន៍រដ្ឋសហព័ន្ធរបស់អាមេរិក ហៅកាត់ថា FCC បញ្ជាឲ្យបញ្ឈប់ការផ្តល់សេវាកម្មនៅក្នុងទឹកដីសហរដ្ឋអាមេរិកតទៅទៀត ឲ្យបានមុនខែមករាឆ្នាំ២០២២។ ការបញ្ជាឲ្យឈប់ដូចនេះ ត្រូវបានគណៈកម្មការទូរគមនាគមន៍រដ្ឋសហព័ន្ធ FCC អះអាងថា ក្រុមហ៊ុនចិនខាងលើបានបង្កក្តីបារម្ភដល់សន្តិសុខជាតិអាមេរិក។
ប្រការនេះហើយបានធ្វើឲ្យ ក្រុមហ៊ុនទូរគមនាគមន៍ចិនដ៏ធំរបស់ចិនដដែល បានប្រាប់ទៅតុលាការឧទ្ធរណ៍ប្រចាំនៅតំបន់របស់ខ្លួន ក្នុងសង្កត់កូឡំប៊ី ថាបញ្ហានេះ បង្កគ្រោះថ្នាក់ធំណាស់ដល់ក្រុមហ៊ុនរបស់ខ្លួន។ គ្រោះថ្នាក់ក៏ដោយសារតែ ខ្លួនមិនមានពេលវេលារៀបចំគ្រប់គ្រាន់នោះទេ។
ក្រុមហ៊ុន China Telecom អះអាងថា ខ្លួនត្រូវជូនដំណឹងដល់អតិថិជនឲ្យបានមុនថ្ងៃទី០៤ ធ្នូ ហើយដែលវាជារឿងពិបាកធ្វើទៅបាន។ ក្រុមហ៊ុនត្រូវបង្ខំចិត្តបិទខ្ទប់បណ្តាញភ្លាមៗ ដែលនឹងធ្វើឲ្យប៉ះពាល់ដល់ការរកស៊ី របស់អតិថិជនខ្លួន ហើយធ្វើឲ្យខូចកេរ្តិ៍ឈ្មោះក្រុមហ៊ុនផងដែរ។
អត្ថបទគួរអាន
គួរជម្រាបថា គណៈកម្មការទូរគមនាគមន៍រដ្ឋសហព័ន្ធរបស់អាមេរិក (FCC) បានរកឃើញថាក្រុមហ៊ុនទូរគមនាគមន៍ចិនខាងលើនេះ រកស៊ីដោយកេងប្រវ័ញ្ច, គ្រប់គ្រងនិងទទួលរងឥទ្ធិពលពីរដ្ឋាភិបាលចិន ហើយទំនងជាត្រូវបានបង្ខំឱ្យអនុវត្តតាមសំណើរបស់រដ្ឋាភិបាលក្រុងប៉េកាំងថែមទៀត។
ប៉ុន្តែក្រុមហ៊ុនទូរគមនាគមន៍ចិន បានបដិសេធថា គណៈកម្មការទូរគមនាគមន៍រដ្ឋសហព័ន្ធរបស់អាមេរិក FCC គួរតែបើកសវនាការរដ្ឋបាល ដើម្បីសួរដេញដោលសិន មុននឹងធ្វើការចោទប្រកាន់ ហើយដាក់បទបញ្ជាបែបនេះ។ ក្រុមហ៊ុន China Telecom ចោទប្រកាន់ថាFCC មិនបានផ្តល់ភស្តុតាងដាក់បន្ទុកគ្រប់គ្រាន់ឡើយ។
សូមជម្រាបថា មិនមែនមានតែក្រុមហ៊ុន China Telecom មួយទេដែលត្រូវបានចោទប្រកាន់ពី FCC កាលពីខែមីនា ក្រុមហ៊ុនចិនសរុបចំនួន៥ ត្រូវបានអាមេរិកចោទប្រកាន់ដូចគ្នា ដោយចាត់ទុកជាការគម្រាមកំហែងសន្តិសុខអាមេរិក ក្នុងរួមមានទាំងក្រុមហ៊ុនយក្យ Huawei និង ZTEផងដែរ៕
None
