ការនាំចូលចំណីអាហារនៅក្នុងប្រទេសចិននៅឆ្នាំក្រោយ នឹងត្រូវជួបនូវការរឹតត្បិត ការត្រួតពិនិត្យ និងការតម្រូវថ្មីៗជាច្រើនទៀត។ នេះបើតាមការបញ្ជាក់របស់រដ្ឋបាលគយចិន នៅក្នុងសេចក្ដីជូនដំណឹងមួយកាលពីថ្ងៃទី ១៣ ខែធ្នូ។ វិធានការរឹតបន្ដឹងលើការនាំចូលចំណីអាហារ ដែលបានប្រកាសឡើងតាំងពីខែមេសា របស់រដ្ឋាភិបាលចិន គឺគ្របដណ្ដប់លើប្រភេទផលិតផលចាប់តាំងពីអាហារបំប៉ន ប្រេងឆា និងអាហារសម្រាប់កុមារជាដើម។
អ្នកការទូតមកពីប្រទេសសេដ្ឋកិច្ចធំៗទាំង៧ ដែលរួមទាំងអូស្ត្រាលី ជប៉ុន កាណាដា និងប្រទេសស្វីសផងដែរនោះ បានទទូចឲ្យចិនពន្យារពេលអនុវត្តគោលនយោបាយនេះ យ៉ាងតិច១៨ខែសិន ដោយបញ្ជាក់ថា វានៅខ្វះភាពច្បាស់លាស់អំពីរបៀបដែលវានឹងត្រូវបានអនុវត្ត។ ក្រុមប្រទេសលោកខាងលិច មានការព្រួយបារម្ភថា ការបរាជ័យក្នុងការអនុវត្តតាមច្បាប់ថ្មីនេះ នឹងបណ្ដាលឲ្យមានការពន្យារពេលដឹកជញ្ជូន និងអាចបង្កជាហានិភ័យទៅដល់ខ្សែចង្វាក់ផ្គត់ផ្គង់ចំណីអាហារសកលផងដែរ នៅគ្រាដែលពិភពលោកបច្ចុប្បន្ននេះ កំពុងជួបប្រទះនឹងការកកស្ទះការដឹកជញ្ជូនធ្ងន់ធ្ងររួចទៅហើយនោះ ដោយសារតែជំងឺរាតត្បាតកូវីដ១៩។
សូមបញ្ជាក់ថា ច្បាប់ថ្មីនៃការនាំចូលចំណីអាហាររបស់ចិន តម្រូវឲ្យក្រុមហ៊ុនផលិត កែច្នៃ និងស្ដុកចំណីអាហារនៅក្រៅប្រទេសទាំងអស់ ត្រូវតែចុះបញ្ជីនៅជាមួយរដ្ឋបាលគយចិន។ ប្រទេសចិន បាននិយាយថា វិធានការនេះនឹងជួយបង្កើត ប្រព័ន្ធគ្រប់គ្រងសុវត្ថិភាពចំណីអាហារ និងធានាបានថា ចំណីអាហារនាំចូលទាំងនោះ គឺត្រឹមត្រូវតាមស្ដង់ដារសុវត្ថិភាព និងបទប្បញ្ញត្តិជាតិរបស់ចិន។ នេះបើតាមសេចក្ដីជូនដំណឹងរបស់រដ្ឋបាលគយចិន៕
