ការរអិលចុះនៃវិស័យអចលនទ្រព្យនេះ ក៏បានពន្យឺតទៅដល់កំណើនសេដ្ឋកិច្ចរបស់ប្រទេសមហាយក្សសេដ្ឋកិច្ចទីពីរក្នុងពិភពលោកមួយនេះផងដែរ ព្រោះថាវិស័យអចលនទ្រព្យជាវិស័យជន្ទល់សេដ្ឋកិច្ចមួយសម្រាប់ចិន។
យោងតាមទិន្នន័យពីការិយាល័យជាតិស្ថិតិនៃប្រទេសចិនបានឱ្យដឹងថា ការវិនិយោគលើវិស័យអចលនទ្រព្យនៅក្នុងប្រទេសចិនបានធ្លាក់ចុះក្នុងអត្រាតួលេខពីរខ្ទង់ឯណោះ ពោលគឺមានដល់១០%ក្នុងឆ្នាំ២០២២ បើប្រៀបធៀបនឹងឆ្នាំ២០២១ ដោយវាគឺជាការធ្លាក់ចុះលើកដំបូងគិតចាប់ពីឆ្នាំ១៩៩៩មក។
ចំណែកការលក់អចលនទ្រព្យនៅក្នុងប្រទេសនេះ បានធ្លាក់ចុះជាង ២៤% ហើយការសាងសង់សំណង់ថ្មីៗបានធ្លាក់ចុះជាង ៣៩% ផងដែរ ខណៈមូលនិធិដែលបង្កើនដោយអ្នកអភិវឌ្ឍអចលនទ្រព្យរបស់ចិន បានធ្លាក់ចុះដល់ប្រហែល២៦%។
ភាពចុះទន់ខ្សោយនៅក្នុងទីផ្សារអចលនទ្រព្យរបស់ចិន ក៏បានប៉ះពាល់ដល់សេដ្ឋកិច្ចទាំងមូលផងដែរ ខណៈវិបត្តិបំណុលរបស់ក្រុមហ៊ុនអ្នកអភិវឌ្ឍ បានធ្វើឱ្យគម្រោងសង់អគារលំនៅដ្ឋាន មិនបានបញ្ចប់តាមផែនការ។
អត្ថបទគួរអាន
យោងតាមស្ថិតិផ្លូវការមួយដែលចេញផ្សាយកាលពីថ្ងៃទី១៧ ខែមករា ឆ្នាំ២០២៣ បានបង្ហាញថា ផលិតផលក្នុងស្រុកសរុប (GDP) របស់ប្រទេសចិនមានកំណើនត្រឹមតែ៣% ប៉ុណ្ណោះក្នុងឆ្នាំ២០២២ ដែលជាកំណើនទន់ខ្សោយបំផុត ដោយសារគោលនយោបាយសូន្យកូវីដរបស់រដ្ឋាភិបាលក្រុងប៉េកាំង ក៏ដូចជាភាពតានតឹងនូវសង្គ្រាមពាណិជ្ជកម្ម និងបច្ចេកវិទ្យាជាមួយអាមេរិក។ ជាមួយគ្នានេះ ការធ្លាក់ចុះវិស័យអចលនទ្រព្យក៏បានពន្យឺតដល់កំណើនសេដ្ឋកិច្ចចិនផងដែរ ខណៈវិស័យនេះ បានចូលរួមចំណែកជាង២៥%ឯណោះនៃGDPសរុប។
សូមជម្រាបថា អាជ្ញាធរចិន បានដាក់ចេញគោលនយោបាយគាំទ្រ ដែលមានគោលដៅសម្រួលដល់អ្នកទិញផ្ទះ និងអ្នកអភិវឌ្ឍអចលនទ្រព្យនៅក្នុងមួយរយៈកាលចុងក្រោយនេះ បន្ទាប់ពីបានមើលឃើញនូវការធ្លាក់ចុះនៃការទិញអចលនទ្រព្យក្នុងប្រទេស។
សូមជម្រាបថា និយ័តករហិរញ្ញវត្ថុប៉េកាំង មានផែនការផ្តល់នូវការគាំទ្រហិរញ្ញវត្ថុប្រមាណ ២៤ពាន់លានដុល្លារ ដល់អ្នកអភិវឌ្ឍអចលនទ្រព្យ ដែលមានគុណភាពខ្ពស់ ក្នុងត្រីមាសទី១ នៃឆ្នាំ២០២៣នេះ ខណៈរដ្ឋអំណាចកណ្តាលបានអំពាវនាវឱ្យធនាគាររដ្ឋ បង្កើនការផ្តល់កម្ចីដល់អ្នកទិញ និងអ្នកអភិវឌ្ឍអចលនទ្រព្យផងដែរ។ នេះបើតាមការចុះផ្សាយរបស់សារព័ត៌មាន Bloomberg។ ក្រោមគម្រោងនេះ ធនាគារកណ្តាលចិន នឹងផ្តល់កម្ចីពាក់កណ្តាលតាមរយៈក្រុមហ៊ុន Huarong Asset Management ដើម្បីជ្រើសរើសអ្នកអភិវឌ្ឍដែលស័ក្តិសមនឹងទទួលបាន ជាមួយអត្រាការប្រាក់ប្រចាំឆ្នាំ ១,៧៥%៕
អត្ថបទ ៖ នៅ សំភី
