ប្រជាជនចិន ដែលមានប្រាក់ចំណូលកម្រិតមធ្យមបានកើនដល់៥០០លាននាក់

កាសែតរបស់ចិន Economic Daily បានចេញផ្សាយអត្ថបទមួយនៅលើទំព័រមុខរបស់ខ្លួនកាលពីថ្ងៃអាទិត្យថា ចំនួនប្រជាជនចិន ដែលមានប្រាក់ចំណូលកម្រិតមធ្យមកើនលើស៥០០លាននាក់ហើយក្នុងចំណោមចំនួនប្រជាជនចិនសរុបចំនួន១ពាន់៤រយលាននាក់។ តួលេខនេះមានការកើនឡើងប្រមាណ១០០លាននាក់ បើធៀបនឹងចំនួនប្រជាជនចិន មានប្រាក់ចំណូលកម្រិតមធ្យមគិតត្រឹមឆ្នាំ២០១៩ ដែលមានប្រមាណ៤០០លាននាក់។ បើយោងតាមទិន្នន័យរបស់ការិយាល័យស្ថិតិជាតិរបស់ចិន ប្រាក់ចំណូលក្នុងមនុស្សម្នាក់ក្រោយពីកាត់ពន្ធរួចហើយនៅប្រទេសចិន ជាមធ្យមមានចំនួនជាង៥ពាន់ដុល្លារអាម៉េរិក នៅឆ្នាំ២០២៣ មានការកើនឡើងជាង៦% បើធៀបនឹងឆ្នាំ២០២២។

កាសែតនេះបានរាយការណ៍ថា ខណៈដែលចិនកំពុងតែព្យាយាមជំរុញបង្កើនការប្រើប្រាស់ក្នុងស្រុកនោះ ដូច្នេះអំណាចទិញរបស់ក្រុមមនុស្សដែលមានប្រាក់ចំណូលមធ្យមនេះនឹងក្លាយជាកម្លាំងជំរុញសេដ្ឋកិច្ចរបស់ចិនរួមទាំងការពង្រីកទីក្រុង និងនវានុវត្តន៍បច្ចេកវិទ្យានាពេលអនាគតផងដែរ ខណៈដែលអាជ្ញាធរចិន កំពុងពឹងផ្អែកលើអំណាចចំណាយរបស់ប្រជាជនចិនសរុបទាំងជាង១ពាន់៤រយលាននាក់នោះក្នុងការជួយជំរុញកំណើនសេដ្ឋកិច្ចរបស់ខ្លួនក្រោយពីមានវិបត្តិទីផ្សារអចលនទ្រព្យ និងការធ្លាក់ចុះតម្រូវការខាងក្រៅ។

ទោះយ៉ាងណាក៏ដោយ មានអ្នកវិភាគជាច្រើនព្រួយបារម្ភថា ចិនអាចប្រឈមនឹងការបន្ថយល្បឿនមុនពេលក្លាយជាប្រទេសអ្នកមាន។ លោក ចាង វិនគួ (Zhang Wenkui) អ្នកស្រាវជ្រាវនៅមជ្ឈមណ្ឌលស្រាវជ្រាវអភិវឌ្ឍន៍នៃក្រុមប្រឹក្សារដ្ឋ បាននិយាយជារឿយៗដោយបានព្រមានថា វាចាំបាច់ណាស់ដែលចិនត្រូវរក្សាកំណើនប្រចាំឆ្នាំលើសពី៥%។

សេដ្ឋកិច្ចចិន បានកើនឡើងជាផ្លូវការជាង៥% ក្នុងឆ្នាំ២០២៣ ប៉ុន្តែកំណើននៅឆ្នាំនេះត្រូវបានក្រុមអ្នកវិភាគឯករាជ្យបានប៉ាន់ប្រមាណថា នឹងធ្លាក់ចុះច្រើន ហើយ GDP សម្រាប់មនុស្សម្នាក់នៅចិន គឺមានជាង១ម៉ឺនដុល្លារ គឺស្នើនឹងប្រហែល១៧%នៃកម្រិតដូចគ្នានៅសហរដ្ឋអាម៉េរិក។ បើទោះជាចិនអាចក្លាយជាប្រទេសដែលមានប្រាក់ចំណូលខ្ពស់ក្នុងរយៈពេល២ទៅ៣ឆ្នាំខាងមុខទៀតតាមការព្យាកររបស់ធនាគារពិភពលោកក៏ដោយ ប៉ុន្តែគេនៅតែចាត់ទុកថា ចិននៅមិនទាន់ក្លាយជាប្រទេសអ្នកមានពិតប្រាកដនៅឡើយទេ៕

អត្ថបទ៖ សុខ ជា