កាលពីខែវិច្ឆិកា ការនាំចេញទំនិញរបស់ចិនសម្រេចបានប្រមាណ ២៦៨ពាន់លានដុល្លារអាមេរិក ដែលមានកំណើនដល់ទៅ ២១% ធៀបនឹងពេលដូចគ្នាកាលពីឆ្នាំមុន ហើយការនាំចូលវិញក៏សម្រេចបាន ១៩២ពាន់លានដុល្លារអាមេរិក មានកំណើន ៤% ដែលធ្វើឲ្យ ចិន សម្រេចបាននូវ អតិរេកពាណិជ្ជកម្មជាង ៧៥ពាន់លានដុល្លារអាមេរិក។
ទីភ្នាក់ងារគយទូទៅចិន បានបង្ហាញថា វិស័យដឹកជញ្ជូនរបស់ប្រទេសចិន គឺកាន់តែមមាញឹកខ្លាំងក្នុងខែវិច្ឆិកាកន្លងទៅនេះ ដោយសារតែការដឹកជញ្ជូនកើនឡើងខ្លាំងមិនធ្លាប់មានក្នុងរយៈពេល ៣ឆ្នាំចុងក្រោយនេះ ដោយសារតែ ទំហំពាណិជ្ជកម្មរបស់ចិន កើនឡើងដល់ទៅ ២១% ក្នុងវិច្ឆិកា ខ្ពស់ជាងខែតុលាទៅទៀត ដែលមានត្រឹមតែ ១១%។
អត្ថបទគួរអាន!
ការនាំចេញរបស់ប្រទេសចិន មានកំណើនជាប់ៗគ្នារយៈពេល ៦ខែមកហើយ បើទោះបីជានៅមានបញ្ហាប្រឈមនឹងមេរោគក៏ដោយ ហើយការនាំចូលទំនិញរបស់ចិនវិញ ក៏មានកំណើនជាប់ៗគ្នា ៣ខែផងដែរ។
ទោះបីជាមានការរឹតបន្តឹងលើការធ្វើដំណើរ និងការបើកអាជីវកម្មទូទាំងប្រទេសក៏ដោយ ចិន នៅតែអាចសម្រេចបានការនាំចេញផលិតផលសំខាន់ៗ ដែលជាតម្រូវការចាំបាច់អំឡុងពេលវិបត្តិនេះដូចជា សម្ភារៈបរិក្ខារពេទ្យ និងគ្រឿងអេឡិចត្រូនិកជាដើម។
សូមជម្រាបដែរថា អំឡុងពេល ១១ខែនេះ ទំហំពាណិជ្ជកម្មទ្វេភាគីរវាង ចិន និងអាស៊ាន សម្រេចបានជាង ៦១០ពាន់លានដុល្លារអាមេរិក ដែលមានកំណើន ៥% ធៀបនឹងពេលដូចគ្នា កាលពីឆ្នាំមុន ខណៈទំហំពាណិជ្ជកម្មដែលសម្រេចបានជាមួយ អាមេរិក គឺមានជាង ៥២៤ពាន់លានដុល្លារអាមេរិក កើនឡើង ៥% ដូចគ្នាដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
