ឯកឧត្តម ឡៅ ទិព្វសីហា រដ្ឋលេខាធិការក្រសួងដែនដីនគរូបនីយកម្ម និងសំណង់បានគូសបញ្ជាក់ថា ក្នុងរយៈពេល ៨ខែឆ្នាំ២០២០ នេះទាំងសមត្ថកិច្ចថ្នាក់ជាតិ និងរាជធានីខេត្តបានផ្តល់លិខិតអនុញ្ញាតសាងសង់ជិត ៣ពាន់គម្រោង និងទន្ទឹមជាមួយគ្នានេះ ក៏នៅមានគម្រោងជាច្រើនទៀត ដែលក្រសួង និងមន្ទីររាជធានីខេត្តកំពុងបន្តពិនិត្យ ដើម្បីផ្តល់លិខិតអនុញ្ញាតសាងសង់ជាបន្តបន្ទាប់ទៀតផងដែរ។
ឯកឧត្តម ឡៅ ទិព្វសីហា បន្ថែមថា ភាគច្រើននៃគម្រោងដែលបានស្នើសុំសាងសង់នាពេលនេះ រួមមានអគារពាណិជ្ជកម្ម អគារផ្សារ លំនៅដ្ឋានលក្ខណៈបុរី ប្រភេទផ្ទះល្វែង សំណង់អគាររោងចក្រឧស្សាហកម្មនានានៅតែដំណើរការស្នើសុំសាងសង់ជាបន្តបន្ទាប់ និងពិសេស គឺសំណង់អគារខ្ពស់ៗស្ថិតនៅខេត្តព្រះសីហនុ។
អត្ថបទទាក់ទង!
ឯកឧត្តមឡៅ ទិព្វសីហាបន្តអះអាងថា ជារួមក្នុងរយៈពេល២០ ឆ្នាំចុងក្រោយនេះ វិស័យនេះបានបន្តរីកចម្រើនជាលំដាប់ ទាំងនៅរាជធានីភ្នំពេញ និងតាមបណ្តាខេត្តគឺសុទ្ធសឹងតែបានបង្ហាញពីតួលេខនៃការអភិវឌ្ឍកើនឡើងជាមួយនឹងសំណង់អគារលំនៅដ្ឋាន សំណង់អគារពាណិជ្ជកម្មខ្ពស់ៗ សំណង់សណ្ឋាគារ និងសំណង់លំនៅដ្ឋានលក្ខណៈបុរី។
សូមជម្រាបថា ក្នុងរយៈពេល ២០ឆ្នាំមកនេះតម្លៃទុនវិនិយោគនៅក្នុងវិស័យសំណង់របស់ជនបរទេស នៅកម្ពុជាកើនដល់ ៩ពាន់លានដុល្លារ ជាមួយនឹងគម្រោងសរុប ៦១៤ គម្រោងនេះ បើគិតរាប់ចាប់តាំងពីឆ្នាំ២០០០ រហូតមកដល់ដំណាច់ខែសីហា ឆ្នាំ២០២០នេះ ក្នុងនោះចិន និងកូរ៉េខាងត្បូងនៅតែជាប្រទេសនាំមុខគេ ក្នុងការវិនិយោគនៅកម្ពុជា៕
None
