ក្នុងនោះប្រទេសថៃមានសភាពធ្ងន់ធ្ងរជាងប្រទេសវៀតណាម ដោយសារការឆ្លងរាលដាលនៅថៃបានអូសបន្លាយយូរជាងប្រទេសវៀតណាម ជាមួយនឹងចំនួនអ្នកឆ្លងថ្មីៗឡើងដល់ទៅ៥ខ្ទង់ ពោលគឺមានអ្នកឆ្លងដល់ជាង១ម៉ឺននាក់ក្នុងមួយថ្ងៃ អស់រយៈពេលជាង១សប្ដាហ៍មកហើយ ខណៈដែលវៀតណាមវិញ មានអ្នកឆ្លងរាប់ពាន់នាក់ ហើយតួលេខអាចនឹងកើនឡើងគ្រប់ពេលវេលា។
ប្រទេសវៀតណាមនៅចុងសប្តាហ៍មុននេះ បានកត់ត្រាពីចំនួនអ្នកឆ្លងកូវីដ១៩ថ្មី ច្រើនជាងពេលណាៗទាំងអស់ ពោលគឺបានរកឃើញចំនួនជាង ៩.២០០ករណី ដែលភាគច្រើនបានរកឃើញក្នុងទីក្រុងធំៗរបស់វៀតណាមទាំងពីរគឺ ក្រុងហូជីមិញ និង ក្រុងហាណូយ។ នេះបើតាមការចុះផ្សាយដោយសារព័ត៌មានក្នុងស្រុកវៀតណាម VN Express។
អត្ថបទទាក់ទង
ដោយឡែក សម្រាប់ព្រឹកថ្ងៃអាទិត្យទី ២៥កក្កដាម្សិលមិញ វៀតណាមបន្តរកឃើញករណីឆ្លងថ្មីប្រមាណជិត ៤ពាន់ករណីបន្ថែមទៀត។ អ្វីដែលគួរឲ្យព្រួយបារម្ភគឺនៅត្រង់ថា ក្នុងចំណោម៤ពាន់ករណី ដែលរកឃើញនៅព្រឹកថ្ងៃអាទិត្យម្សិលមិញនេះ មាន៣ពាន់ករណីរកឃើញក្នុងតំបន់ក្រហម នៃទីក្រុងហូជីមិញ និង ខេត្តជុំវិញ ខណៈជិត១ពាន់ករណីទៀត មិនទាន់អាចកំណត់បានពីប្រភពនៃការឆ្លងរាលដាលបាននៅឡើយទេ។
នេះបានសេចក្តីថា កូវីដ១៩ បាននិងកំពុងចរាចរយ៉ាងសកម្មនៅក្នុងប្រទេសវៀតណាមរួចស្រេចទៅហើយ ដោយករណីឆ្លងថ្មីនឹងបន្តកើនឡើងជាបន្តបន្ទាប់ទៀត។ នេះបើតាមការសន្និដ្ឋានរបស់រដ្ឋាភិបាលវៀតណាម។
បច្ចុប្បន្នខេត្តក្រុងចំនួន៦២ ក្នុងចំណោមខេត្តទាំង ៦៣របស់វៀតណាមសុទ្ធតែបានរកឃើញករណីឆ្លងកូវីដ១៩ ដោយក្នុងនោះ ទីក្រុងហូជីមិញ នៅបន្តមានឈ្មោះជាតំបន់មានការឆ្លងរាលដាលខ្លាំងជាងគេដដែល បើធៀបនឹងខេត្តក្រុងផ្សេងៗទៀតរបស់វៀតណាម។
អត្ថបទពិសេសគួរអាន
សូមបញ្ជាក់ត្រង់នេះបន្តិចដែរថា វៀតណាមគិតត្រឹមព្រឹកថ្ងៃអាទិត្យម្សិលមិញ មានករណីឆ្លងកូវីដ១៩សរុបដល់ជាង៩ម៉ឺនករណី ស្លាប់ជិត៤រយករណី ក្នុងនោះ ក្រុងហូជីមិញតែឯងប៉ុណ្ណោះ មានករណីឆ្លងជិត ៦ម៉ឺនករណី នៃករណីឆ្លងសរុប។
ដោយឡែក ចំពោះប្រទេសថៃវិញ មិនទាន់ស្គាល់ពាក្យថាថមថយនៅឡើយទេ ក្រោយព្យុះកូវីដ១៩បានវាយប្រហារអស់ពេលជាច្រើនខែមកនេះ។
នៅថ្ងៃអាទិត្យម្សិលមិញនេះ ថៃកត់ត្រាពីចំនួនអ្នកឆ្លងថ្មីដល់ទៅជាង ១ម៉ឺន៥ពាន់នាក់ និងអ្នកស្លាប់មានដល់១២៩នាក់បន្ថែមទៀត។ នេះបើតាមតួលេខពីក្រសួងសុខាភិបាលថៃ ចេញផ្សាយនៅព្រឹកថ្ងៃអាទិត្យទី ២៥កក្កដា។
អ្វីដែលគួរកត់សម្គាល់ពីករណីឆ្លងថ្មីទាំងជាង១ម៉ឺន៥ពាន់នាក់នេះ គឺមានជាង ៦០០ករណីត្រូវបានរកឃើញលើជនជាប់ឃុំឃាំងក្នុងពន្ធនាគារនៃប្រទេសថៃ ដែលប្រការនេះបង្ហាញថា កូវីដ១៩កំពុងចរាចរនិងរាតត្បាតស្ទើរគ្រប់ទីកន្លែងទៅហើយក្នុងប្រទេសថៃ សូម្បីក្នុងពន្ធនាគារក៏មានអ្នកឆ្លងកូវីដ១៩ដែរ។
យ៉ាងណាមិញ ថៃមិនដូចជាវៀតណាមនោះទេ ក្រុងបាងកករបស់ថៃនៅប៉ុន្មានថ្ងៃចុងក្រោយនេះ បានកត់សម្គាល់ការថយចុះបន្តិចនៃចំនួនអ្នកឆ្លងកូវីដ១៩ ប៉ុន្តែតួលេខបានហក់ឡើងនៅតាមបណ្តាខេត្តជំនួសវិញ។
សូមជម្រាបថា ប្រទេសថៃបានរកឃើញអ្នកឆ្លងថ្មីប្រចាំថ្ងៃដល់តួលេខជាង១ម៉ឺននាក់អស់រយៈពេលប្រហែល១សប្ដាហ៍មកហើយ ហើយចំនួនតួលេខនេះ នៅមិនទាន់ឃើញស្រុតចុះមកវិញទេ។ គិតមកត្រឹមថ្ងៃទី ២៥ ខែកក្កដា ថៃមានអ្នកឆ្លងកូវីដ១៩សរុបកើនឡើងដល់ជិត ៥០ម៉ឺននាក់ហើយ ស្របពេលដែលចំនួនអ្នកស្លាប់សរុបដោយសារកូវីដ១៩វិញមានជាង ៤ពាន់នាក់៕
None
