យោងតាមលទ្ធផលនៃសម័យប្រជុំពេញអង្គគណៈរដ្ឋមន្ត្រីនាពេលថ្មីៗនេះ បានឲ្យដឹងថា សេដ្ឋកិច្ចកម្ពុជានៅឆ្នាំ២០២០ ត្រូវបានគេប៉ាន់ប្រមាណថា នឹងមានកំណើនអវិជ្ជមានក្នុងអត្រា -១,៩% ហើយត្រូវបានព្យាករថា នឹងងើបឡើងវិញនៅឆ្នាំ២០២១ ក្នុងកំណើនរង្វង់ ៣,៥% ដែលនឹងធ្វើឲ្យផលិតផលក្នុងស្រុកសរុបរបស់កម្ពុជា សម្រេចបានប្រមាណ ២៩ពាន់លានដុល្លារអាមេរិក ស្របពេលដែល ផលិតផលក្នុងស្រុកសរុបសម្រាប់មនុស្សម្នាក់ ត្រូវបានរំពឹងដែរថា នឹងកើនដល់ ១.៧៧១ ដុល្លារ នៅឆ្នាំ២០២១ ដែលកើនឡើងពី ១.៦៨៣ដុល្លារក្នុងឆ្នាំ២០២០។
នៅឆ្នាំ២០២០ វិស័យសំខាន់មួយចំនួន ដែលគាំទ្រដល់កំណើនសេដ្ឋកិច្ច ត្រូវបានរំពឹងថា នឹងមានអត្រាកំណើនអវិជ្ជមាន តួយ៉ាង កំណើនវិស័យឧស្សាហកម្មរំពឹងថា នឹងមាន -២,២% វិស័យសេវាកម្មមាន -៣% និងវិស័យកសិកម្មវិញ រំពឹងថានឹងមានកំណើនជាវិជ្ជមានប្រមាណ០,៩%។
អត្ថបទទាក់ទង
ទោះយ៉ាងណា សម្រាប់ឆ្នាំ២០២១ កំណើននៃវិស័យទាំងនេះ ត្រូវបានរំពឹងថា នឹងមានវិជ្ជមានត្រឡប់មកវិញដោយវិស័យឧស្សាហកម្មរំពឹងថា នឹងកើន ៤,១% វិស័យសេវាកម្ម កើន៣,៦% និងវិស័យកសិកម្មនឹងកើនដល់ ១,៦%។ ចំពោះអត្រាអតិផរណាប្រចាំឆ្នាំវិញ នៅឆ្នាំ២០២១ ត្រូវបានប៉ាន់ស្មានថា ស្ថិតនៅក្នុងកម្រិតអាចគ្រប់គ្រងបានក្នុងអត្រា ៣,១% រីឯទុនបម្រុងអន្តរជាតិសរុបវិញ រំពឹងថា នឹងកើនដល់ទៅប្រមាណ ១៧ ពាន់លានដុល្លារអាមេរិក ដែលធានាដល់ការនាំចូលបានដល់ ៨ខែ។
ទាក់ទងនឹងការខ្ចីបំណុលពីបរទេសវិញ រាជរដ្ឋាភិបាលកម្ពុជា បានសម្រេចកំណត់ពិដានខ្ចីប្រាក់ពីដៃគូអភិវឌ្ឍន៍វិញ សម្រាប់ឆ្នាំ២០២១ ដោយបានកំណត់ទំហំនៃការខ្ចីក្នុងកម្រិត ១.៥០០លាន SDR ឬស្មើនឹងប្រមាណជាង ២.១០០ លានដុល្លារអាមេរិក គឺមានការកើនឡើងត្រឹមតែជាង ១៤០លានដុល្លារធៀបនឹងឆ្នាំ២០២០។
សូមបញ្ជាក់ដែរថា ក្នុងកាលៈទេសៈនៃវិបត្តិសេដ្ឋកិច្ចធ្លាក់ចុះ ដែលបង្កឡើងដោយបញ្ហាកូវីដ-១៩ នេះ ឃើញថា សេដ្ឋកិច្ចរបស់ប្រទេសកម្ពុជា នៅឆ្នាំ២០២០ ត្រូវបានបានអន្តរជាតិធំច្រើនបានព្យាករថា គឺនឹងមានកំណើនអវិជ្ជមាន ពោលគឺ មានកំណើនដក តែម្ដង។ តួយ៉ាង ស្ថាប័នមូលនិធិអន្តរជាតិ IMF បានព្យាករចុងក្រោយនេះថា កំណើនសេដ្ឋកិច្ចកម្ពុជានឹងមាន -២,៨% ខណៈធនាគារ ADB ព្យាករថា នឹងមាន -៤% រីឯធនាគារពិភពលោកវិញ ព្យាករថា នឹងមាន -២%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
