អនុរដ្ឋលេខាធិកា និងជាអ្នកនាំពាក្យរបស់រដ្ឋលេខាធិការដ្ឋានអាកាសចរស៊ីវិល ឯកឧត្តម ស៊ិន ចាន់សិរីវុត្ថា បានគូសបញ្ជាក់នាពេល ថ្មីៗនេះថា ការសាងសង់អាកាសយានដ្ឋានតារាសាគរ គឺមានបែងចែកជា៣ដំណាក់កាលធំៗ ដោយក្នុងនោះ ដំណាក់ទី១ នឹងត្រូវបញ្ចប់នៅឆ្នាំ២០៣០ ហើយក្នុងដំណាក់កាលទី១នេះទៀតសោត គឺមានបែងចែកជាពីរទៀត គឺដំណាក់កាលទី១ក និងទី១ ខ។ ដំណាក់កាលទី១ក អាកាសយានដ្ឋាននេះ បាននិងកំពុងសាងសង់ផ្លូវរត់យន្ដហោះប្រវែង៣.២០០ ម៉ែត្រ និងស្ថានីយអ្នកដំណើរដែលអាចទទួលបានអ្នកដំណើរដល់ទៅ ៧ម៉ឺន៥ពាន់នាក់។ ដំណាក់កាលទី១ក នេះ នឹងបញ្ចប់នៅចុងឆ្នាំនេះ ខណៈដែលដំណាក់កាលទី១ខ នឹងបញ្ចប់នៅឆ្នាំ២០៣០ ដែលមានសមត្ថភាពអាចនឹងទទួលអ្នកដំណើរបានដល់១២ម៉ឺននាក់។ រីឯ ការសាងសង់ដំណាក់កាលទី២វិញ គឺនឹងត្រូវធ្វើឡើងនៅឆ្នាំ២០៣០ ដល់ឆ្នាំ២០៥០ ដោយរំពឹងថា នឹងទទួលបានអ្នកដំណើរដល់៤លាននាក់ ខណៈដែលដំណាក់កាលទី៣ គឺក្រោយឆ្នាំ២០៥០ រំពឹងថា នឹងទទួលបានអ្នកដំណើរ ដល់ទៅ ៥០លាននាក់។
អត្ថបទទាក់ទង!
បើតាមការគូសបញ្ជាក់របស់ឯកឧត្តម សិន ចាន់សិរីវុត្ថា នៅក្នុងដំណាក់កាលទី១ និងទី២ អាកាសយានដ្ឋាននេះ នឹងត្រូវបានសាងសង់ឡើងជាប្រភេទ 4E ប៉ុន្ដែនៅឆ្នាំ២០៥០ នឹងអភិវឌ្ឍជាប្រភេទ4F។
អាកាសយានដ្ឋានតារាសាគរខេត្តកោះកុង ត្រូវបានគេដឹងថា មានតម្លៃវិនិយោគប្រមាណ៣ ពាន់៨ រយលានដុល្លារអាមេរិក ស្ថិតក្រោមការសាងសង់ដោយក្រុមហ៊ុនចិនមួយឈ្មោះថា Union Development Group (UDG) និងត្រូវបានវិនិយោគលើដីសម្បទានពីរាជរដ្ឋាភិបាលកម្ពុជា ដែលមានទំហំផ្ទៃដីសរុប ៤ ម៉ឺន ៥ពាន់ហិកតា៕
None
