ក្នុងនោះ ខែមីនា គឺប្រមូលបានច្រើនជាងគេបំផុតដល់ទៅប្រមាណ ៧០០លានដុល្លារអាមេរិក។ ជាមួយគ្នានេះ សម្តេច តេជោ ក៏បានកើតសរសើរ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ដែលបានបំបែកឯកទគ្គកម្មសម្រាប់ការប្រមូលចំណូលផ្ទៃក្នុងរបស់កម្ពុជាផងដែរ។
ថ្លែងនាឱកាសសម្ពោធដាក់ឲ្យប្រើប្រាស់ជាផ្លូវការស្ពានអាកាស និងផ្លូវក្រោមដីចោមចៅ នៅថ្ងៃទី៣១ ខែមីនា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ដូច្នេះ រហូតមកដល់ពេលនេះ ស្ថានភាពជំងឺកូវីដ-១៩ នៅកម្ពុជា កាន់តែធូរស្បើយ និងមិនប៉ះពាល់ខ្លាំងដល់សេដ្ឋកិច្ចកម្ពុជា ដូចកាលពីមុននោះទេ។ ភាពធូរស្បើយនៃកូវីដ១៩នេះ បានធ្វើឲ្យកិច្ចការប្រមូលចំណូលពន្ធរបស់កម្ពុជា សម្រេចបាននូវលទ្ធផលវិជ្ជមានគួរឲ្យកត់សម្គាល់។ ជាក់ស្ដែង ក្នុងរយៈពេល ៣ខែ ដំបូង ឆ្នាំ២០២២ កម្ពុជា ទទួលបានចំណូលសរុបជាង ១ពាន់២០០លានដុល្លារពីការប្រមូលចំណូលពន្ធដារ។ សម្តេចតេជោ ហ៊ុន សែន បានចាត់ទុកការសម្រេចបាននូវលទ្ធផលដ៏ល្អប្រសើរនេះ ជាកំណត់ត្រាប្រវត្តិសាស្ត្រនៃការប្រមូលចំណូលពន្ធ ដែលអគ្គនាយកដ្ឋានពន្ធដារសម្រេចបានលើសផែនការរហូតដល់ជាង ២៤% កាលពីឆ្នាំ២០២១ ដោយប្រមូលចំណូលបានជាង២ពាន់៧រយលានដុល្លារអាមេរិក ។
យ៉ាងណាមិញ បើតាមសម្ដេច ហ៊ុន សែន ជាទូទៅនៅខែមីនា គឺជាខែដែលត្រូវប្រមូលចំណូលពន្ធលើប្រាក់ចំណេញរបស់អាជីវកម្មនានា ដូច្នេះ សម្ដេចជឿជាក់ថា នៅខែមីនា ឆ្នាំ២០២២នេះ ចំណូលពន្ធដារនឹងកើនលើស ៧រយលានដុល្លារ។
អត្ថបទគួរអាន
ជាមួយគ្នានេះ សម្ដេចគូសបញ្ជាក់ទៀតថា
បញ្ហាកូវីដ១៩ លែងសូវជាបញ្ហាខ្លាំងដល់សេដ្ឋកិច្ចកម្ពុជា ទៀតហើយ
តែអ្វីដែលសម្ដេចមានក្ដីព្រួយបារម្ភនោះ
គឺផលប៉ះពាល់ដែលបណ្ដាលមកពីសង្គ្រាមរវាងរុស្សី និងអ៊ុយក្រែន ទៅវិញទេ
ព្រោះថាបញ្ហានេះ កំពុងគំរាមកំហែងសេដ្ឋកិច្ចពិភពលោក
រួមទាំងប្រទេសក្នុងតំបន់
ពិសេសបាននិងកំពុងជំរុញឲ្យបណ្ដាប្រទេសក្នុងតំបន់មួយចំនួនមានវិបត្តិអតិផរណា។
សម្ដេចបន្ថែមទៀតថា បញ្ហានេះ ទោះចង់ ឬមិនចង់ វាក៏នឹងអាចជះឥទ្ធិពល
ដល់សេដ្ឋកិច្ចកម្ពុជា។
ជុំវិញវិបត្តិសង្គ្រាមនៅអ៊ុយយក្រែន ដែលកំពុងរុញឲ្យតម្លៃប្រេងទូទាំងពិភពលោកហក់ឡើងថ្លៃខ្ពស់នេះដែរ សម្តេចតេជោ ហ៊ុន សែន កំពុងពិចារណាឱ្យក្រសួងសេដ្ឋកិច្ច និងហិរញ្ញវត្ថុ រៀបចំដាក់យុទ្ធសាស្ត្របន្ថែមទៅលើបញ្ហាប្រេងឥន្ធនៈ ដោយចង់ឱ្យមានរៀបចំស្តុកយុទ្ធសាស្ត្រលើបញ្ហាប្រេង ដើម្បីឆ្លើយតបសេចក្តីត្រូវការផងដែរ។
សូមបញ្ជាក់ថា នៅឆ្នាំ២០២១ អគ្គនាយកដ្ឋានពន្ធដារប្រមូលចំណូលបានជាង២ពាន់៧រយលានដុល្លារ កើនលើសផែនការរហូត២៤% បើប្រៀបនឹងឆ្នាំ២០២០។ ដោយឡែក រយៈពេល ៣ខែ ឆ្នាំ២០២២នេះ អគ្គនាយកដ្ឋានពន្ធដារប្រមូលចំណូលបាន ១,២ពាន់លានដុល្លារអាមេរិក។ ខណៈនៅខែមករា អគ្គនាយកដ្ឋានពន្ធដារប្រមូលចំណូលបាន ២៨៨លានដុល្លារ។ រីឯ ខែកុម្ភៈ អគ្គនាយកដ្ឋានពន្ធដារប្រមូលចំណូលបាន ២២៣លានដុល្លារ។ ចំណែក ខែមីនា វិញអគ្គនាយកដ្ឋានពន្ធដារប្រមូលចំណូលបាន ៧០០លានដុល្លារ។ នេះបើការគូសបញ្ជាក់ពីសម្ដេចតេជោហ៊ុន សែន៕
None
