ក្នុងបទពិសោធន៍ប្រមាណជាង៣ឆ្នាំ ជាមួយនឹងរបរដាំដុះនិងលក់ទុរេន លោក ឃឹម ប៊ុនឡែន ម្ចាស់សហគមន៍ចម្ការស្តេចទុរេន បានប្រាប់ថា បច្ចុប្បន្ននេះ ប្រជាពលរដ្ឋខ្មែរភាគច្រើន មានទំនោរនៃការហូបទុរេនកើនឡើង។ ឈ្មួញទុរេនរូបនេះបញ្ជាក់ថា « តម្រូវការទុរេនមានការកើនឡើងហ្នឹង គឺទីមួយទុរេនក៏វាសម្បូរដែរ ការដាំដុះកើនឡើង ចឹងកាលណាសម្បូរអ្នកហូបក៏គាត់ហូបកាន់តែច្រើនតាមហ្នឹងដែរ។ ទី២ជីវភាពរបស់ពលរដ្ឋមានការកើនឡើង ដល់ពេលអញ្ចឹងគាត់ហ៊ានចំណាយ! ទុរេនជួនកាលមួយប្រអប់២០ ទៅ ៣០ ដុល្លារក៏គាត់ហ៊ានទិញដែរ»។
លោកបានបន្ថែមថា «ទោះបីជា ការដាំដុះក្នុងស្រុកមានការកើនឡើងគួរឲ្យកត់សម្គាល់ តែបើនិយាថា អាចផ្គត់ផ្គង់តម្រូវការគ្រប់គ្រាន់ឬអត់ គឺអត់ទាន់ទេ។ អញ្ចឹងបានជាជាក់ស្តែងរាល់ថ្ងៃមានការនាំចូលពីប្រទេសជិតខាងនូវទុរេនស្រស់ហ្នឹងណា ជាពិសេសគឺពីវៀតណាម និងថៃតែម្តង ព្រោះប្រទេសគេ គេដាំបានច្រើន ថាទៅ មិនមែនតែទុរេនទេ ផលិតផលកសិកម្មរបស់ខ្មែរយើងស្ទើរគ្រប់មុខហ្នឹង ត្រូវពឹងផ្អែកលើប្រទេសជិតខាង ទាំងបន្លែទាំងអីចឹងទៅ»។
អត្ថបទទាក់ទង!
បើតាមការឲ្យដឹងពីលោក ឃឹម ប៊ុនឡែន ក្នុងមួយឆ្នាំ ប្រទេសថៃអាចនាំចេញទុរេនបានក្នុងទំហំទឹកប្រាក់ ១ពាន់លានដុល្លារ ទៅកាន់ទីផ្សារប្រទេសចិន ខណៈដែលវៀតណាម មិនអាចនាំទៅបាន រីឯកម្ពុជា មិនអាចផ្គត់ផ្គង់ឲ្យគេ ព្រោះគ្រាន់តែក្នុងស្រុកក៏មិនបំពេញតម្រូវការបានគ្រប់គ្រាន់ផង។
តែយ៉ាងណាមិញ សហគ្រិនកសិកម្មវ័យក្មេងរូបនេះ មានគោលដៅនឹងដាំដុះឲ្យបានច្រើន ដើម្បីអាចបំពេញសេចក្តីត្រូវការនៅក្នុងស្រុកផង ហើយអាចឈានទៅដល់ការនាំចេញបានផងដែរ ដោយក្នុងរយៈពេល៣ឆ្នាំមកនេះ លោកដាំទុរេន បាន៦ ទៅ៧ពាន់ដើមហើយ ដោយមានការវិនិយោគសហការជាមួយដៃគូនៅសាំងហ្គារពួរ ហើយនិងដៃគូរនៅស្រុកខ្មែរ។ ម្ចាស់ចម្ការរូបនេះ ក៏គ្រោងនឹងពង្រីកផ្ទៃដីដាំដុះបន្ថែមទៀតនាពេលខាងមុខ។
កន្លងទៅ ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពត លោក ចាន់រិទ្ធិ ធ្លាប់បានប្រាប់ខេមបូណូមីសថា កន្លងទៅធ្លាប់វិនិយោគិនចិន បានចុះទៅទស្សនកិច្ចនៅចម្ការទុរេនខេត្តកំពត និងមានគម្រោងចង់នាំទុរេនចេញទៅកាន់ប្រទេសចិនដែរ តែក្រោយមកត្រូវបរាជ័យវិញ ដោយសារតែយើងមិនអាចផ្គត់ផ្គង់បានតាមតម្រូវការដែលគេចង់បាន។
នៅក្នុងសន្និសីទសារព័ត៌មាននាពេលថ្មីនេះ នាទីស្តីការក្រសួងកសិកម្ម ឯកឧត្តម វេង សាខុន រដ្ឋមន្រ្តីក្រសួងកសិកម្ម ធ្លាប់បានមានប្រសាសន៍ថា ដំណាំទុរេន អាចជាដំណាំសក្តានុពលមួយទៀត ដែលកម្ពុជាអាចនាំចេញទៅកាន់ប្រទេសចិន បន្ទាប់ពីស្វាយ ចេក ប៉ុន្តែដោយសារនៅខ្វះការដាំដុះរបស់កម្ពុជានៅខ្វះស្តង់ដា និងនៅមានតិចតួច ដែលមិនទាន់អាចបំពេញតម្រូវការរបស់ចិនបាននៅឡើយ៕
None
