រដ្ឋមន្ត្រីពាណិជ្ជកម្មប្រទេសឆេក លោក ចូសេប ស៊ីគីឡា ប្រាប់អ្នកយកព័ត៌មានថា ឥលូវនេះគេអាចធ្វើបានហើយនូវរឿង ដែលសឹងតែមិនអាចធ្វើទៅរួចនោះ គឺការបើកភ្លើងខៀវឱ្យមានការកំណត់ថ្លៃឧស្ម័ននៅសហភាពអឺរ៉ុប។ ទោះយ៉ាងណា ការកំណត់នេះមិនត្រូវតែជាកាតព្វកិច្ចនោះទេ ប៉ុន្ដែ ជាចំបងវាជាភារកិច្ចដែលត្រូវធ្វើសម្រាប់ពលរដ្ឋអឺរ៉ុប និងអាជីវកម្មដែលរង់ចាំសកម្មភាពដោះស្រាយបញ្ហាថាមពលក្នុងប្លុកនេះ។
វិធានការដែលមិនធ្លាប់មានពីមុនមកនេះ គឺសំដៅលើការទប់ស្កាត់តម្លៃថាមពល ខណៈដែលប្លុកនេះព្យាយាមរកវិធីរើចេញពីវិបត្តិដែលកាន់តែធ្ងន់ធ្ងរឡើងៗ ដោយការសម្រេចចិត្តរបស់រុស្ស៊ីក្នុងការបញ្ឈប់ការផ្គត់ផ្គង់ឥន្ធនៈហ្វូស៊ីលដល់សហភាពអឺរ៉ុប ជាការសងសឹកនឹងទណ្ឌកម្មជុំវិញសង្គ្រាមរបស់ខ្លួននៅអ៊ុយក្រែន។
វិធានការថ្មីនេះ នឹងត្រូវអនុវត្តការទម្លាក់តម្លៃ និងកំណត់តម្លៃរបស់ថាមពល នៅពេលដែលតម្លៃឧស្ម័នឡើងដល់១៨០អឺរ៉ូក្នុងមួយមេហ្គាវ៉ាត់ម៉ោង ក្នុងអំឡុងពេលយ៉ាងហោចណាស់បីថ្ងៃជាប់ៗគ្នា។ កាលពីសប្តាហ៍មុនតម្លៃឧស្ម័នមានប្រហែល ១៣៥អឺរ៉ូ ក្នុងមួយមេហ្គាវ៉ាត់ម៉ោង។
អត្ថបទគួរអាន
ការកំណត់តម្លៃឧស្ម័ននឹងនឹងត្រូវចាប់អនុវត្តពីថ្ងៃទី១ខែកុម្ភៈ ហើយចូលជាធរមាននៅថ្ងៃទី១៥ ខែកុម្ភ ឆ្នាំក្រោយ។ ប៉ុន្តែវាបានភ្ជាប់មកជាមួយនូវលក្ខខណ្ឌតឹងរ៉ឹង ជាមួយការប្រុងប្រៀបទុកជាមុន សម្រាប់ការផ្អាកអនុវត្តវិធានខាងលើ ក្នុងករណីដែលផែនការមិនដំណើរការទៅតាមការគ្រោងទុក។
គួររំឭកថា ការកើនឡើងនៃតម្លៃថាមពល និងឧស្ម័ន បានធ្វើឱ្យក្រុមហ៊ុនថាមពលនៅទូទាំងទ្វីបអឺរ៉ុប ស្វែងរកមូលនិធិបន្ថែមពីរដ្ឋាភិបាល និងធនាគារ ដើម្បីទិញថាមពលឱ្យគ្រប់តាមតម្រូវការ។ ជាក់ស្តែង ក្រុមហ៊ុន Uniper របស់អាល្លឺម៉ង់បានខាតប្រាក់រាប់ពាន់លានអឺរ៉ូ ក្រោយពេលដែលខ្លួន ខិតខំបំពេញស្តុកដែលនៅសេសសល់បន្ទាប់ពីរុស្ស៊ីកាត់បន្ថយការផ្គត់ផ្គង់។
ជាមួយគ្នានេះដែរ អ្នកនាំពាក្យវិមានក្រឹមឡាំង របស់រុស្ស៊ី លោក Dmitry Peskov បាននិយាយថា ការកំណត់តម្លៃឧស្ម័នពីសហភាពអឺរ៉ុប គឺជាការវាយប្រហារលើតម្លៃទីផ្សារ ហើយវាជារឿងមិនអាចទទួលយកបានឡើយ។ នេះបើតាមទីភ្នាក់ងារសារព័ត៌មាន Interfax របស់រុស្ស៊ី៕
