អឺរ៉ុបប្រឈមនឹងការខ្វះខាតឧស្ម័ន ៤០ លានតោនក្នុងមួយឆ្នាំ ក្រោយកាត់ផ្ដាច់ការនាំចូលពីរុស្ស៊ី

 ការកាត់ផ្ដាច់ឧស្ម័នពីរុស្ស៊ីនេះ បានជំរុញឱ្យតំបន់អឺរ៉ុបកំពុងស្វែងរកប្រភពធនធានប្រេងពីតំបន់ផ្សេងមកជំនួសរុស្ស៊ីវិញផងដែរ។ នេះបើយោងតាមការចុះផ្សាយដោយសារព័ត៌មាន Nikkei Asia។ក្រុមការងារខេមបូណូមីសលម្អិតរឿងនេះដូចតទៅ។

តម្លៃឧស្ម័នធម្មជាតិនៅអឺរ៉ុបបានកើនឡើងកាន់តែខ្ពស់ ចំពេលមានក្តីបារម្ភថា ការកើនឡើងនៃការប្រយុទ្ធវាយប្រហារនៅអ៊ុយក្រែន អាចជំរុញឱ្យសហរដ្ឋអាមេរិក និងសហភាពអឺរ៉ុបហាមឃាត់ប្រតិបត្តិការទាក់ទងនឹងអាជីវកម្មថាមពលជាមួយធនាគាររុស្ស៊ី។

គួរជម្រាបថា ស្តុកឧស្ម័ននៅអឺរ៉ុបមានកម្រិតទាបបំផុតក្នុងរយៈពេល ៥ ឆ្នាំចុងក្រោយ ស្របពេលដែលការនាំចូលពីប្រទេសរុស្ស៊ីបានធ្លាក់ចុះ ហើយការប្រើប្រាស់មានការកើនឡើងក្នុងអំឡុងអាកាសធាតុត្រជាក់នៅឆ្នាំ ២០២១។ យ៉ាងណាមិញ អឺរ៉ុបក៏បានស្ដុកឧស្ម័ន ២១ លានតោននៅក្នុងឃ្លាំងក្រោមដីផងដែរ គិតត្រឹមចុងខែកុម្ភៈ ប៉ុន្តែវាតិចជាង ៣០% នៃសមត្ថភាពប្រើប្រាស់សរុបរបស់ខ្លួន។

បន្ទាប់ពីមានការបារម្ភជុំវិញការកាត់ផ្ដាច់ឧស្ម័ននេះ ធនាគារ Commerzbank របស់អាល្លឺម៉ង់បាននិយាយនៅក្នុងរបាយការណ៍កាលពីពាក់កណ្តាលខែកុម្ភៈថា សហភាពអឺរ៉ុបមានស្តុកគ្រប់គ្រាន់ ដើម្បីជំនួសការផ្គត់ផ្គង់របស់រុស្ស៊ីក្នុងរយៈពេលប្រហែលមួយខែកន្លះ។ អឺរ៉ុបមានតម្រូវការប្រើប្រាស់អគ្គិសនីច្រើននៅអំឡុងរដូវត្រជាក់ដើម្បីប្រើប្រាស់ម៉ាស៊ីនកម្ដៅនៅតាមផ្ទះ ប៉ុន្ដែសម្រាប់នៅរដូវក្ដីការប្រើប្រាស់មានការធ្លាក់ចុះវិញ។

យ៉ាងណាក៏ដោយចុះ ក្តីបារម្ភចំពោះការផ្គត់ផ្គង់ឧស្ម័ននឹងនៅតែមាន។ ជាធម្មតា សហភាពអឺរ៉ុបប្រមូលបានប្រហែល ៦៥ លានតោននៃឧស្ម័នបម្រុងរបស់ខ្លួន ដែលស្មើនឹង ៩០% នៃសមត្ថភាពស្ដុកទុករបស់វាជារៀងរាល់ឆ្នាំ។ ប៉ុន្តែប្រទេសក្នុងតំបន់អឺរ៉ុបប្រហែលជាមិន អាចទទួលបានឧស្ម័នគ្រប់គ្រាន់សម្រាប់រដូវរងាបន្ទាប់ទៀតទេ ប្រសិនបើរុស្ស៊ីកាត់ផ្តាច់ការផ្គត់ផ្គង់ របស់ខ្លួន ខណៈទីភ្នាក់ងារថាមពលអន្តរជាតិបានប៉ាន់ប្រមាណថាការផលិតឧស្ម័នក្នុងស្រុកអាចគ្របដណ្តប់បានតែ ៤០% នៃការប្រើប្រាស់នៅអឺរ៉ុបក្នុងឆ្នាំនេះ។ ដូចនេះតំបន់នេះត្រូវការស្វែងរកប្រភពជំនួសឧស្ម័នរុស្ស៊ីប្រហែល ១៤០ លានតោន ឬជាង ៣០% នៃការប្រើប្រាស់ដែលមកពីប្រទេសរុស្ស៊ី៕

អត្ថបទ៖ ស៊ើង និមល់